بۇگىندە جامبىل وبلىسىنىڭ اكىمدىگى بۇقارانى باسپانامەن قامتۋعا باسا نازار اۋدارۋدا. بۇل ەلباسى ن.نازاربايەۆتىڭ جىل سايىنعى ءداستۇرلى جولداۋلارى مەن «بەس الەۋمەتتىك باستاماسىندا» ايقىندالعان ماڭىزدى مىندەتتەر. سوندىقتان دا جۇمىر جوسپار ءتۇزىلىپ، جۇيەلى جۇمىستار جۇرگىزىلۋدە. وتان قورعاۋشى كۇنى مەرەكەسىنە وراي ۇيىمداستىرىلعان قونىستوي وسى ءسوزىمىزدى نىقتاي تۇسكەندەي.

ءدال وسى كۇنى تاراز قالاسىنداعى «بايتەرەك» ىقشام  اۋدانىنداعى 100 پاتەرلى №26 ارەندالىق-كوممۋنالدىق كوپقاباتتى تۇرعىن ءۇي پايدالانۋعا بەرىلدى. تۇرعىنداردىڭ قۋانىشىمەن ورتاقتاسۋعا جامبىل وبلىسىنىڭ اكىمى اسقار مىرزاحمەتوۆ ارنايى كەلدى.

سۋ جاڭا پاتەرلەردىڭ  كىلتى ۇلى وتان سوعىسىنىڭ ارداگەرلەرى، اتا-انانىڭ قاراۋىنسىز قالعان بالالار، الەۋمەتتىك از قامتىلعاندار، مەملەكەتتىك جانە بيۋدجەتتىك ۇيىم قىزمەتكەرلەرىنە تابىستالدى. ولاردىڭ ىشىندە بارلىعى 35 كوپبالالى   وتباسى           باسپانالى بولدى.

– وبلىس كولەمىندە ءاربىر مەرەكە قارساڭىندا جاڭا نىسانداردى پايدالانۋعا بەرۋ، حالىققا پاتەر كىلتىن تابىستاۋ سياقتى يگى شارالار داستۇرگە اينالدى. 8-ناۋرىز مەرەكەسىنە جاڭاتاس قالاسىندا 60 وتباسىنا پاتەر كىلتى تاپسىرىلسا، 1-مامىردا تاراز جانە قاراتاۋ قالالارىندا بارلىعى 120 پاتەر تاپسىرىلدى. ونىڭ ىشىندە، 57 پاتەر كوپبالالى وتباسىنا بەرىلدى. بۇگىن وسى يگى ءۇردىس جالعاسىن تاۋىپ، تاعى 80 پاتەر بەرىلىپ وتىر. ونىڭ ىشىندە 35 پاتەر كوپبالالى وتباسىنا ءبولىنىپ وتىر،- دەدى اسقار يسابەك ۇلى ءوز سوزىندە.

ايتا كەتسەك، قۇرىلىسىن «اگروسپەسستروي» جاۋاپكەرشىلىگى شەكتەۋلى سەرىكتەستىگى جۇرگىزگەن جالدامالى كوپ پاتەرلى تۇرعىن ءۇي الەۋمەتتىك جاعىنان قورعالعان توپتاردىڭ ازاماتتارىنا جەكەشەلەندىرۋ قۇقىعىنسىز بەرىلىپ وتىر. تاعى ءبىر ەسكەرە كەتەتىن جايت، «بايتەرەك» ىقشام اۋدانىندا ورنالاسقان بۇل №26 ۇيدەگى 20 پاتەر اقپان ايىندا «مىڭبۇلاق» اۋدانىنداعى №62 ۇيدە جارىلىس كەزىندە زارداپ شەككەندەرگە ۋاقىتشا قونىستانۋعا بەرىلگەن بولاتىن. ال مەرەكە قارساڭىندا ونداعى 80 پاتەردىڭ كىلتى تۇرعىن ءۇي الۋ كەزەگىنە تىركەلگەن ازاماتتارعا تابىستالدى.

جالپى، وبلىس بويىنشا پاتەر الۋ ءۇشىن كەزەكتە 24 533 ادام تۇرسا، ونىڭ 14 046-ى حالىقتىڭ وسال توبىنا جاتاتىندار ەكەن. بۇل قاتاردا 2 346  كوپ بالالى وتباسى بار. اعىمداعى جىلى «نۇرلى جەر» باعدارلاماسى اياسىندا 12،1 ميلليارد تەڭگەگە 2 118 كوپپاتەرلى 30 تۇرعىن ءۇيدىڭ قۇرىلىسى جۇرگىزىلىپ، 1 988 پاتەرلى 28 ءۇي پايدالانۋعا بەرىلەدى دەپ جوسپارلانعان. ال 130 پاتەرلى 2 ارەندالىق ءۇي – 2020 جىلعا وتپەلى ەكەن.

سونداي-اق ەلباسى نۇرسۇلتان ءابىش ۇلى نازاربايەۆتىڭ «نۇر وتان» پارتياسىنىڭ حVءىىى سەزىندە بەرگەن تاپسىرماسى اياسىندا بولىنگەن قارجى ەسەبىنەن 187 وتباسىنا باسپانا الىپ بەرۋ جوسپارلانىپتى. جالپى، بيىل بيۋدجەت ەسەبىنەن 2 175 وتباسىن پاتەرمەن قامتۋ كۇتىلۋدە. سونىمەن قاتار، تۇرعىن ءۇي كەزەگى جەتكەنشە كوپبالالى وتباسىلارىن جاتاقحانالارمەن قامتۋ جۇمىستارى دا قولعا الىنعان. بۇل جۇمىستارعا جەرگىلىكتى بيۋدجەتتەن 2،6 ميلليارد  تەڭگە باعىتتالىپ، تاراز، جاڭاتاس، قاراتاۋ جانە شۋ قالالارىندا باسپاناعا مۇقتاج دەپ انىقتالعان وسى ساناتتاعى 612 وتباسىنا جاتاقحانالار سالىنباق.

ال دەمەۋشىلەر ەسەبىنەن جالپى قۇنى 100 ميلليون  تەڭگەگە 33 كوپبالالى وتباسىنا تۇرعىن ءۇي بەرۋ كوزدەلىپ وتىرعان كورىنەدى. ءدال مەرەكە قارساڭىندا پاتەر كىلتىن قولىنا الىپ، كوڭىلى تولقىعان تۇرعىنداردىڭ قۋانىشىنان-اق جوسپاردىڭ ىزگىلىكپەن ىسكە اسىپ جاتقاندىعىن اڭعارۋعا بولادى.

باقىت جالعاس