قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازاربايەۆ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىندا حالىق تۇرمىسىنىڭ كوتەرىلۋى، تۇرعىنداردىڭ الەۋمەتتىك جاعدايىنىڭ ارتۋى ءۇشىن مەملەكەت تاراپىنان بارلىق مۇمكىندىكتەردىڭ جاسالىپ وتىرعانىن ايتقان بولاتىن. بۇل رەتتە ەلباسى «ءبىلىم بەرۋدىڭ، دەنساۋلىق ساقتاۋ سالاسىنىڭ، تۇرعىن ءۇيدىڭ ساپاسى مەن قولجەتىمدىلىگى، جايلى جانە ءقاۋىپسىز جاعدايدا ءومىر ءسۇرۋ ماسەلەلەرى ءاربىر قازاقستاندىق وتباسىنا قاتىستى»، دەپ اتاپ كورسەتكەن ەدى. بۇگىنگى تاڭدا جەرگىلىكتى حالىقتىڭ تۇرمىسىن جاقسارتۋ، الەۋمەتتىك الەۋەتىن ارتتىرۋ جامبىل وبلىسىندا لايىقتى جۇزەگە اسىرىلىپ كەلەدى. وبلىس اكىمى اسقار مىرزاحمەتوۆتىڭ باستاماسىمەن از قامتىلعان وتباسىلارعا ءتيىستى قولداۋ كورسەتىلىپ وتىر.

7 مامىر – وتان قورعاۋشىلار كۇنى مەرەكەسىنە وراي تاراز قالاسىنداعى «بايتەرەك» ىقشاماۋدانىنان 100 پاتەرلى ارەندالىق-كوممۋنالدىق كوپقاباتتى تۇرعىن ءۇي پايدالانۋعا بەرىلدى. باسپانالى بولعاندار قاتارىندا ۇلى وتان سوعىسىنىڭ ارداگەرلەرى، جەتىم بالالار، الەۋمەتتىك از قامتىلعان وتباسىلار مەن مەملەكەتتىك جانە بيۋدجەتتىك ۇيىم قىزمەتكەرلەرى بار. سونىمەن قاتار، كوپبالالى 35 وتباسى دا «بايتەرەك» ىقشاماۋدانىنان پاتەر يەلەندى. جامبىل وبلىسىنىڭ اكىمى اسقار مىرزاحمەتوۆ سالتاناتتى شاراعا ارنايى قاتىسىپ، باسپانالى بولعان تۇرعىنداردى قۇتتىقتادى. 

«وبلىس كولەمىندە ءاربىر مەرەكە قارساڭىندا جاڭا نىسانداردى پايدالانۋعا بەرۋ، حالىققا پاتەر كىلتىن تابىستاۋ سياقتى يگى شارالار داستۇرگە اينالدى. 8 ناۋرىز مەرەكەسىنە وراي جاڭاتاس قالاسىندا 60 وتباسىنا پاتەر كىلتى تاپسىرىلسا، 1 مامىر مەرەكەسىندە تاراز جانە قاراتاۋ قالالارىندا بارلىعى 120 پاتەر بەرىلدى. ونىڭ ىشىندە، 57 پاتەر يەلەنگەن كوپبالالى وتباسىلار دا بار. بۇگىن وسى يگى ءۇردىس جالعاسىن تاۋىپ، تاعى 80 پاتەر بەرىلىپ وتىر. ونىڭ ىشىندە 35 پاتەر كوپبالالى وتباسىنا ءبولىنىپ وتىر. ءبارىڭىزدى دە قۋانىشتارىڭىزبەن قۇتتىقتايمىن»، دەدى اكىم ءوز سوزىندە.

  پايدالانۋعا بەرىلگەن تۇرعىن ءۇي مەملەكەتتىك «نۇرلى جەر» باعدارلاماسى اياسىندا وتكەن جىلى سالىنعان بولاتىن. نىسان قۇرىلىسىن مەردىگەر «اگروسپەسستروي» جاۋاپكەرشىلىگى شەكتەۋلى سەرىكتەستىگى جۇرگىزگەن. اتالعان كوپقاباتتى تۇرعىن ءۇي الەۋمەتتىك جاعىنان از قورعالعان توپتاردىڭ ازاماتتارىنا جەكەشەلەندىرۋ قۇقىعىنسىز بەرىلىپ وتىر جانە ارەندالىق ايلىق تولەم كورسەتكىشى ايىنا 5500-6000 تەڭگە كولەمىندە بەلگىلەنگەن. ايتا كەتەيىك، «بايتەرەك» ىقشاماۋدانىندا ورنالاسقان بۇل №26 ۇيدەگى 20 پاتەر اعىمداعى جىلى اقپان ايىندا «مىڭبۇلاق» اۋدانىنداعى №62 ۇيدە جارىلىس كەزىندە زارداپ شەككەندەرگە ۋاقىتشا قونىستانۋعا بەرىلگەن بولاتىن. ال، ەندى مۇنداعى 80 پاتەردىڭ كىلتى تۇرعىن ءۇي الۋ كەزەگىنە تىركەلگەن ازاماتتارعا تابىستالدى. جامبىل وڭىرىندە تۇرعىنداردى باسپانامەن قامتۋ جۇمىستارى ءالى دە جالعاسىن تابا بەرەتىن بولادى.

دۋلات ايتباي