بۇگىنگى تاڭدا جامبىل وبلىسىنىڭ اكىمى اسقار مىرزاحمەتوۆتىڭ تاپسىرماسىمەن كونە تاراز قالاسىنىڭ ساۋلەتتىك كەلبەتىن ارتتىرۋ ماسەلەسى قولعا الىنىپ وتىر. سونىمەن قاتار، قالاداعى تولە بي كوشەسىنىڭ بويىندا ورنالاسقان «شاحريستان» كەشەنىن قايتا جاڭعىرتۋ جۇمىستارىن قولعا الۋ، قالپىنا كەلتىرۋ جۇمىستارى دا باستاۋ الدى. سول سەبەپتى ءوڭىر باسشىسىنىڭ تاپسىرماسىمەن «شاحريستان» تاريحي-مادەني كەشەنىن جاڭعىرتۋعا جوعارى دەڭگەيدە كوڭىل ءبولىندى.
جالپى، كەشەن اۋماعى 200 گەكتارعا سوزىلىپ جاتىر. بولاشاقتا كەشەن اۋماعىنا كوركەمسۋرەت گالەرەياسى، وبلىستىق ولكەتانۋ مۇراجايى، 700-800 ورىندىق امفيتەاتر، كولەمدى ساعات ستەللاسى، كورمە زالى جانە «رۋحانيات» ورتالىعى سالىنادى دەپ كۇتىلۋدە. قازىرگى تاڭدا مۇندا ءتيىستى جۇمىستار اتقارىلۋدا. جىل باسىنان بەرى تاراز قالاسىن تۇلەتۋدىڭ تىڭ جولدارى قاراستىرىلىپ، ءتيىستى ۇسىنىستار ەنگىزىلۋدە. ەكى مىڭ جىلدان استام تاريحى بار كونە قالانىڭ ساۋلەتتىك كەلبەتىن ارتتىرۋعا بۇگىندە ءتيىستى مەكەمەلەردىڭ ءبارى دە اتسالىسىپ كەلەدى. تاراز قالالىق ساۋلەتتىك بيۋرو مەكەمەسىنە قالا ىشىنەن بوي كوتەرەتىن نىسانداردىڭ نوبايىن سىزىپ، سۇلباسىن دايىنداۋ جۇكتەلىپتى. بيۋرو باسشىسى ارمان ابدەشوۆ قازىرگى ۋاقىتتا «شاحريستان» ەتنومادەني ورتالىعىنىڭ جوباسىنا ەرەكشە ءمان بەرىلىپ وتىرعانىن جەتكىزدى. سوندىقتان دا اتالعان ورتالىقتىڭ قۇرىلىسى اعىمداعى جىلدىڭ كۇز مەزگىلىنە دەيىن اياقتالاتىن بولادى.
سونىمەن قاتار، بولاشاقتا «كونە تاراز» كەشەنى مەن «شاحريستان» ەتنومادەني ورتالىعى قوسىلادى. سول ەكى نىساننىڭ اراسىنان ءبىر شاقىرىمعا سوزىلاتىن اربات قۇرىلىسى جۇرگىزىلىپ، شاھار كوركىن ارتتىرۋعا ەرەكنە سەرپىن بەرەدى. بۇدان بولەك، «تەكتۇرماس» ەتنوتاريحي كەشەنىندە «كونە تاراز» ستانساسى سالىنىپ، اسپالى جول تارتىلادى دەپ جوسپارلانۋدا. اسپالى جول «تەكتۇرماس» كەشەنىنەن «شاحريستان» ورتالىعىنا دەيىن سوزىلاتىن بولادى. مۇنىڭ ءبارى دە كونە تاراز شاھارىنىڭ تاريحىن بىلگىسى كەلگەن تۋريستەرگە جاسالعان جاقسى جاعداي بولىپ ەسەپتەلەدى. بۇل ورايدا جامبىل وبلىسى اكىمدىگى تۋريزم باسقارماسىنىڭ باسشىسى قارلىعاش ارالبەكوۆا الداعى ۋاقىتتا «شاحريستان» ورتالىعىندا 60 شاقتى شەبەرحانا ورنالاسقان قولونەرشىلەر قالاشىعى پايدا بولاتىنىن، بۇل ءوز كەزەگىندە قالا تۇرعىندارى مەن قوناقتارى ءۇشىن دە جاقسى بولاتىنىن ايتتى.
«شاحريستان» كەشەنىن قايتا تۇلەتۋگە ارنالعان جاڭعىرتۋ شارالارىن جىل سوڭىنا دەيىن اياقتاۋ جوسپارلانىپ وتىر. سونىمەن قاتار، جەرگىلىكتى اكىمدىك اۋليەاتا جەرىنە كەلەتىن تۋريستەردىڭ قاتارىن بيىل 400 مىڭنان اسىرۋعا بارىنشا كۇش سالۋدا. ال، جەرگىلىكتى اكىمدىكتىڭ مالىمەتىنشە، بۇگىندە جوعارىدا اتالعان باعىتتا 50-گە جۋىق كاسىپكەرلىك نىسان ارنايى تىركەۋدەن ءوتىپ، قىزمەت كورسەتۋگە ءازىر ەكەن. سونداي-اق، جۋىردا تاراز قالاسىنداعى «تورتكۇل» تاريحي كەشەنى ماڭىنان بىرەگەي «قازاق اۋىلى» ەتنوجوباسى دا باستاۋ الىپ، كوپتىڭ قىزىعۋشىلىعىن تۋدىردى. ول ءۇشىن تاراز قالاسىنان 12 ارنايى تۋريستىك باعىت ازىرلەنىپ، قوناقتارعا ىڭعايلى جاعداي تۋعىزۋ ماقساتىندا 33 تۋريستىك ورتالىق ارنايى ءموبيلدى قوسىمشاعا ەگجەي-تەگجەيلى ءتۇسىندىرىلىپ، ەنگىزىلگەن. ول جەردەن بارلىق قاجەتتى مالىمەتتەردى QR كود ارقىلى دا بەس تىلدە الۋعا مۇمكىندىك بار ەكەن. سونداي-اق، ول قوسىمشادا جامبىل وبلىسىندا قىزمەت ەتەتىن 178 قوناق ءۇي مەن 300-دەن استام تاماقتانۋ ورنىنىڭ جانە كولىك تاسىمالىنىڭ سىزباسى، اقشا ايىرباستاۋ پۋنكتتەرى مەن تۋريستىك اگەنتتىكتەردىڭ ءتىزىمى، باعالارى جاساقتالعان.
دۋلات ايتباي
