ەلباسىنىڭ باستاماسىمەن جاريالانعان جاستار جىلىندا ەلىمىزەگى جاس بۋىن وكىلدەرىنە تولايىم مۇمكىندىكتەر جاسالۋدا. اسىرەسە، كوزىندە جالىنى، جۇرەگىندە جارقىن بولاشاققا دەگەن ۇمتىلىسى بار ازاماتتاردىڭ ۇسىنىستارى نازارعا الىنىپ، ىستەرىنىڭ قولداۋ تابۋى ولاردىڭ جىگەرىن قايراپ، قۇلشىنىستارىنا قانات ءبىتىرىپ وتىر. بۇل يگى ىستەردەن جامبىل وبلىسى دا شەت قالىپ وتىرعان جوق. ماسەلەن، جۋىردا ايماق باسشىسى اسقار مىرزاحمەتوۆتىڭ قاۋلىسىمەن وبلىسىمىزداعى دارىندى جاستاردىڭ باسىن قوسقان جاس اقىن-جازۋشىلار كەڭەسى قۇرىلدى.
وبلىس اكىمدىگى جانىنان قۇرىلعان اتالمىش كەڭەسكە وبلىس اكىمىنىڭ ورىنباسارى سۇلۋشاش قۇرمانبەكوۆا ءتوراعالىق ەتەدى. ال، ونىڭ ورىنباسارى قىزمەتىن اقىن، قازاقستان جازۋشىلار وداعى جامبىل وبلىستىق فيليالىنىڭ ديرەكتورى حاميت ەسامان اتقارماق. حاتشى بولىپ اقىن، وبلىس اكىمى باسپا ءسوز قىزمەتىنىڭ باس مامانى نۇربولات ساتىمقۇل بەكىتىلدى.
جالپى، جاس قالامگەرلەردىڭ شىعارماشىلىعىن دامىتۋ جانە ناسيحاتتاۋ باعىتىندا جۇمىس ىستەيتىن كەڭەس ادەبيەت پەن ونەر سالالارىندا جاستار ساياساتىن جەتىلدىرۋ، ادەبي فورۋمدار، ءمۇشايرالار مەن وزگە دە شارالار وتكىزۋ، اتالعان باعىتتاعى ۇيىمدارمەن بايلانىس ورناتىپ، جۇمىس جۇرگىزۋ سەكىلدى ماسەلەلەردى دە نازارعا الادى. جەرگىلىكتى اتقارۋشى ورگاندارعا مادەنيەت سالاسىندا تۋىنداعان سۇراقتار بويىنشا كونسۋلتاتيۆتى كومەك كورسەتەدى. سونداي-اق، قازاقستان رەسپۋبليكاسى مادەنيەت جانە سپورت مينيسترلىگىنە ماڭىزدى دەپ تاپقان ماسەلەلەرى بويىنشا ۇسىنىستار بەرۋگە دە قۇقىلى.
كەڭەس قۇرامىنا وبلىسىمىزعا عانا ەمەس، ەلىمىزدىڭ كولەمىندە ەسىمدەرى تانىمال قالامگەرلەر ەنگەن. كەڭەس مۇشەلەرى قاتارىندا اقىندار – «ARAI» گازەتى باس رەداكتورىنىڭ ورىنباسارى تۇرسىنبەك سۇلتانبەكوۆ پەن ءبولىم باسشىسى نۇرجان ءقادىرالى، «Aq jol» گازەتى باس رەداكتورىنىڭ ورىنباسارى اسحات رايقۇل، ءبولىم باسشىسى تابيعات ابايلدايەۆ، دانيار ءالىمقۇل، جانعازى احمەت، نۇربولات جولداسبەك، مارال يساقۇلوۆا، ەرنار ءابدىرازاق، ارايلى جاقسىلىق، ءقۇربانالى شاحابايلار بار. سونداي-اق پروزايكتەردەن ارداق ۇسەيىنوۆا، قانات تىلەپبەرگەنوۆ، «ARAI» گازەتىنىڭ تىلشىلەرى – تالعات نۇرحانوۆ پەن شىنبولات كۇزەكبايەۆتار كەڭەس مۇشەلەرى اتانعان.
وسىلايشا جاڭادان قۇرىلعان كەڭەس ءوڭىردىڭ رۋحانياتىن دامىتۋعا، جاستاردىڭ شىعارماشىلىعىن شىڭداۋعا وزىندىك ۇلەسىن قوساتىن بولادى.
باقىت جالعاس
