ەلباسى ن.نازاربايەۆ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا   «سوڭعى جىلدارى ءبىز «نۇرلى جول» باعدارلاماسى بويىنشا رەسپۋبليكالىق ماڭىزى بار ينفراقۇرىلىم قالىپتاستىردىق. 2015 جىلدان باستاپ 2400 شاقىرىم اۆتوموبيل جولى سالىندى جانە قايتا جوندەلدى. بۇل جۇمىستار جالعاسۋدا جانە 2020 جىلعا دەيىن قوسىمشا 4600 شاقىرىم جول پايدالانۋعا بەرىلەدى» دەپ اتاپ كورسەتكەنى بەلگىلى.

جولداۋدان تۋىنداعان مىندەتتەر جامبىل وبلىسىندا دا ويداعىداي ىسكە اسۋدا. ونىڭ ناقتى ءبىر دالەلى -«مەركى-بۋرىلبايتال» اۆتوجولىن جاڭعىرتۋ جۇمىستارىنىڭ باستالۋى.

اشىعىن ايتۋ كەرەك،  «مەركى-بۋرىلبايتال» تاس جولىنىڭ مۇشكىل كۇيى تالاي جىلدان بەرى تەمىر تۇلپار تىزگىندەگەندەردىڭ جانىنا باتىپ كەلەدى. مىنە، وسىنى ەسكەرگەن ەل بيلىگى بيىل ۇزىندىعى 262 شاقىرىمدى قۇرايتىن «مەركى-بۋرىلبايتال» اۆتوجولىن قايتا جاڭعىرتۋ جۇمىستارىن قولعا الدى.

جالپى، اتالمىش تاس جولىنىڭ بويىنداعى قۇرىلىس 4 ۋچاسكەگە بولىنگەن. ونىڭ ىشىندە مەركى كەنتىنەن شۋ قالاسىنا دەيىنگى جول قۇرىلىسى 86 شاقىرىمدى قۇرايدى. جانە اسفالت جابىندى ءتورت جولاقتى قوزعالىسقا ارنالىپ توسەلمەك. ال شۋ قالاسىنان بۋرىلبايتالعا دەيىنگى جول 176 شاقىرىمدى قامتىماق. مۇندا ەكى جولاقتى ءىى-شى تەحنيكالىق ساناتتاعى جول سالىنادى.

تولىعىمەن جاڭارتىلعان اۆتوموبيل جولى ءتاتتى، شۋ، بىرلىك ەلدى مەكەندەرى ارقىلى وتەدى دەپ كۇتىلۋدە. قايتا قۇرۋ جوباسى اياسىندا كۇرە جولدىڭ بويىندا  6 كوپىر، 3 تەمىرجول وتكەلى، 11 جارىقتاندىرىلعان كولىك ايرىعى، 276 سۋ وتكىزۋ قۇبىرلارى، دەمالىس الاڭدارى جانە اۆتوپاۆيلون سالىنادى.  جانە ەرەكشە ايتا كەتەرلىگى، «مەركى-بۋرىلبايتال» اۆتوجولىنىڭ قۇرىلىسىنا  توزىمدىلىگى جوعارى قيىرشىق تاس-ماستيكالىق اسفالبەتون پايدالانىلماق.  جوبانى تولىقتاي اياقتاۋ 2022 جىلدىڭ ماۋسىم ايىنا جوسپارلانىپ وتىر.

بۇل ءسوز جوق، باس بارماقپەن باعالاۋعا تۇرارلىق . سەبەبى اتالمىش اۆتوجول بۇگىندە ەلدى مەكەندەر اراسىن بايلانىستىرىپ عانا قويماي، ءوڭىرارالىق قاتىناستا دا ايرىقشا ءرول اتقارۋدا. ءارى بۇل جوبا كوپتىڭ تىلەۋى قابىل بولعانىن كورسەتىپ تۇر.  

حالىق دانالىعىندا «جاقسى باستالعان ءىس-جارتىلاي بىتكەن ءىس» دەگەن ءسوز بار. ال، جوسپارلانعان جۇمىستار ويداعىداي جۇزەگە اسقان جاعدايدا وڭتۇستىك ايماقتار مەن ەلوردانىڭ ارالىعىندا كولىك قاتىناسى الدەقايدا جاقسارادى تۇسەتىندىگى ءسوزسىز.  ەندەشە قۇرىلىسى قارقىن العان مەگاجوبانىڭ جەمىسىن كورەتىن كۇنگە جەتكىزسىن دەپ تىلەيىك.    

باقىت جالعاس