جاستىق شاق – ادام ءومىرىنىڭ ەڭ قىزىقتى ءارى ەڭ جاقسى كەزەڭى ەكەنى بەلگىلى. ۇستىمىزدەگى جىل — ەلباسى جارلىعىمەن "جاستار جىلى" بولىپ بەكىتىلگەنى بەلگىلى. جاستار ساياساتى جاستاردىڭ ءبىلىم، ەڭبەك جانە جۇمىسپەن قامتۋ، دەنساۋلىق ساقتاۋ سالاسىنداعى الەۋمەتتىك قۇقىقتارىن قامتاماسىز ەتۋگە، شىعارماشىلىق الەۋەتىن دامىتۋعا، جاستاردى اۋقىمدى الەۋمەتتەندىرۋ جانە پاتريوتيزم قۇندىلىقتارىن قالىپتاستىرۋ ءۇشىن جاعداي جاساۋعا باعىتتالىپ وتىر. وسى ورايدا، جامبىل وبلىسىنىڭ بايزاق اۋدانىندا دا اتقارىلىپ جاتقان جۇمىستار اۋقىمدى. بۇل تۋرالى اۋدان اكىمى  ءراحماتىلدا راحمانبەردييەۆ اڭگىمەلەپ بەردى.  

— بۇگىنگى كۇنى اۋداندا جالپى تۇرعىندار سانى 105827  بولسا، ونىڭ 25 365ء-ى 14 پەن 29 جاس ارالىعىنداعى جاستاردى قۇرايدى، نەمەسە 24،4 پايىز.  مەملەكەتتىك جاستار ساياساتىنىڭ ءتيىمدى ىسكە اسىرىلۋىنا جاۋاپتى «جاستار رەسۋرستىق ورتالىعى» مەكەمەسىن قارجىلاندىرۋ جىل سايىن وسۋدە. 2017 جىلى 26،8 ميلليون  تەڭگە قاراستىرىلسا، وتكەن جىلى - 39،6 ميلليون  تەڭگە، اعىمداعى جىلى 44،4 ميلليون  تەڭگە قاراستىرىلدى.  ورتالىقتا جالپى 25 مامان قىزمەت اتقارادى. وڭىردە جاستار ساياساتىن جۇرگىزۋگە مەملەكەتتىك الەۋمەتتىك تاپسىرىسقا 1 ميلليون  تەڭگە ءبولىندى،-دەيدى اۋدان باسشىسى.  

سونىمەن قاتار، بارلىق اۋىلدىق وكۋرگتەردە جاس تولقىنمەن جۇمىس جۇرگىزەتىن ارنايى ماماندار قامتىلعان. ولار تولىقتاي ماتەريالدىق-تەحنيكالىق بازامەن قامتىلىپ وتىر. «جاستار رەسۋرستىق ورتالىعى» قىزمەتكەرلەرىنىڭ الەۋمەتتىك ليفتىمەن جوعارىلاۋى نەگىزىندە مەملەكەتتىك قىزمەتكە 15 ادام اۋىسىپ، قىزمەت اتقارۋدا. بۇگىندە اۋدان بويىنشا جاس مەملەكەتتىك قىزمەتكەرلەر سانى  46 ادامدى قۇرايدى.

ال، جاستار اراسىندا جۇمىسسىزدىق دەڭگەيىن تومەندەتۋ باعىتىندا ءتۇرلى فورماتتاعى شارالار، ونىڭ ىشىندە "كەڭەس بەرۋ الاڭدارى" جۇمىس جاساۋدا. بۇگىنگى كۇنگە 1578 جاسقا ءتۇرلى ماسەلەلەر بويىنشا كەڭەستەر بەرىلدى. ەگەر اۋدان بويىنشا  جۇمىسسىزدىق دەڭگەيى 4،5 پايىز بولسا، جاستار اراسىندا 3،1 پايىزعا دەيىن تومەندەتۋ جوسپارلانۋدا.

— ايتا كەتۋ كەرەك، اعىمداعى جىلى 793 جاستى جۇمىسقا تارتۋ كوزدەلىپ وتىر. العاشقى توقساننىڭ وزىندە  343 جاس جۇمىسقا تارتىلدى. ونىڭ ىشىندە: «جاستار پراكتيكاسى» بويىنشا 165 جاس، اقىلى قوعامدىق جۇمىسقا 50 جاس، الەۋمەتتىك جۇمىس ورنىنا 35، ۆاكانتتىق بوس جۇمىس ورىندارىنا 93 جاس جولداما الدى. قىسقا مەرزىمدى كاسىپتىك وقىتۋ كۋرسىنا 30 جاستى قامتۋ كوزدەلۋدە. سونىمەن قاتار كاسىپكەرلىك نەگىزدەرىنە وقۋدان وتۋگە 20 ادام، 8 جاس ميكروكرەديت الاتىن بولادى.

سونىمەن قاتار «ديپلوممەن اۋىلعا» باعدارلاماسى اياسىندا 10 جاس كوتەرمە جاردەماقىمەن، 2 جاس تۇرعىن ءۇي الۋ ءۇشىن نەسيەمەن قامتىلدى.

 سونداي-اق، «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021  جىلدار ارالىعىنداعى «ەڭبەك» باعدارلاماسى اياسىندا ءوز ءىسىن اشاتىن 29 جاسقا دەيىنگى ازاماتتارعا  قايتارىمسىز گرانتتار بەرۋ بويىنشا جۇمىستار اتقارىلۋدا. بۇگىنگى تاڭدا جۇمىسپەن قامتۋ ورتالىعىنا  تىركەلگەن 117 ۇمىتكەردىڭ  جەتەۋى  «باستاۋ –بيزنەس» جوباسى، ال ۇشەۋى  قىسقا مەرزىمدى ءۇش ايلىق كاسىپتىك وقۋدى ءبىتىرىپ، ارنايى سەرتيفيكات العان، جوبالارى دايىن. بۇل باعىتتاعى جۇمىستار جالعاسىن تاباتىن بولادى،-دەيدى ر.راحمانبەردييەۆ.

جاستار جىلىندا بايتەرەك اۋىلدىق وكرۋگىندە اشىلعان جاڭا ساياباق ىشىنەن "جاستار اللەياسىن" اشۋ جوسپارلانۋدا ەكەن.

اۋداندا جاستاردى تاربيەلەۋ، «ەرىكتىلەر مەكتەبى» جوباسى اياسىندا ۆولونتەرلاردى اۋدانداعى الەۋمەتتىك جاعدايى تومەن وتباسىلارعا «جان جىلۋى» اتتى اكسياسىن جىل بويىندا وتكىزۋ دە تۇراقتى تۇردە ۇيىمداستىرىلماق. بۇگىنگى كۇنگە دەيىن اكسيا اياسىندا  40  ادامعا كومەك كورسەتىلىپتى.

جاستاردىڭ جاعدايىنا ءتيىمدى تالداۋ جاساۋ ماقساتىندا، جاستار ءتولقۇجاتى دايىندالىپ جانە ۇنەمى جاڭارتىلىپ وتىرادى. پاسپورتتا جاستاردىڭ نەگىزگى دامۋ باعىتتارى بويىنشا ستاتيستيكالىق كورسەتكىشتەر مەن اقپاراتتى-اناليتيكالىق ماتەريالدار كورسەتىلگەن. بۇل جاستار سالاسىنداعى جۇمىستى جەتىلدىرۋگە جانە ءتۇيىندى ماسەلەلەردى شەشۋگە كوپ كومەگىن تيگىزەدى.

قازاقتا «جاس كەلسە – ىسكە» دەگەن ءسوز بار. اقىلدى تەحنولوگيا زامانىندا اقىل دا، تىڭ يدەيا دا جاستاردان شىعادى. 2019 جىلى ءوزىنىڭ تيىمدىلىگىن كورسەتكەن جانە جاستارمەن مەكەن-جايلىق جۇمىسقا باعىتتالعان جوبالاردى جۇزەگە اسىرۋ جوسپارلانۋدا. اتاپ ايتار بولساق، جۇمىسپەن قامتۋعا جاردەمدەسۋ جانە ورنالاستىرۋ، جاستار كاسىپكەرلىگىن دامىتۋ، جاستاردىڭ بوس ۋاقىتىن ۇيىمداستىرۋ سياقتى ۇزاق مەرزىمدى جوبالار جۇزەگە اسىرىلاتىن بولادى.

باقىت جالعاس