اۋىل-ايماقتارداعى جاستاردى مەملەكەتتىك باعدارلامالارمەن تانىستىرۋ جانە سىبايلاستىققا قارسى قوعامدىق باقىلاۋدى كۇشەيتۋ ماقساتىندا كوشپەلى كەڭەس ۇيىمداستىرىلماقشى. «بولاشاققا باعدار» دەپ اتالعان بۇل كوشپەلى كەڭەستىڭ الداعى اتقارار جۇمىستارىن جۋرناليستەرگە وڭىرلىك كوممۋنيكاسيالار قىزمەتىنىڭ اقپارات الاڭىندا وبلىس اكىمدىگىنىڭ جاستار ساياساتى ماسەلەلەرى باسقارماسىنىڭ باسشىسى ءمادي ماتەن مەن قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ باسشىسى راۆيل تولەبايەۆ تانىستىردى.

كاسىپكەرلىك بويىنشا جاستارعا جاسالاتىن قولداۋلاردى وبلىس اكىمدىگىنىڭ كاسىپكەرلىك جانە يندۋستريالىق-يننوۆاسيالىق دامىتۋ باسقارماسى باسشىسىنىڭ ورىنباسارى جانداۋلەت كەنجەبەكوۆ مالىمدەدى.

كوشپەلى كەڭەستە ءاربىر اۋىل، ەلدى مەكەندەرىندەگى جاستاردىڭ ءتۇرلى ساناتتارىنا «ديپلوممەن اۋىلعا»، «سەرپىن»، «بيزنەستىڭ جول كارتاسى»، «جاستار پراكتيكاسى» سىندى مەملەكەتتىك قولداۋ تەتىكتەرى، ءبىلىم، جۇمىسقا ورنالاسۋ، ءدىن، كاسىپكەرلىك باستامالاردى قولداۋ، اۋىل شارۋاشىلىعى سالاسىن مەملەكەتتىك قولداۋ تەتىكتەرى، مەملەكەتتىك قىزمەتكە ورنالاسۋ ءتارتىبى سياقتى ماسەلەلەر بويىنشا قابىلداۋلار وتكىزىلەدى.

سونداي-اق، وسى كەڭەستە تۇرعىنداردىڭ سىبايلاس جەمقورلىققا قارسى مىنەز-قۇلىق ۇلگىسىن دامىتۋ مەن جەمقورلىق ماسەلەسىن مەملەكەتتىك قىزمەت كورسەتۋ ساپاسىن ارتتىرۋ ارقىلى شەشۋ جولدارىن ءتۇسىندىرۋ، مەملەكەتتىك ورگاندار قىزمەتىنىڭ اشىقتىعىن جەتكىزۋ دە كوزدەلگەن. ءار اۋداندا 3 كۇننەن تۇراقتايتىن كوشپەلى كەڭەس جاستارمەن قاتار بارلىق تۇرعىندارعا ءتۇرلى سالا اياسىنداعى ماسەلەلەر جونىندە كەڭ اۋقىمدى ءتۇسىندىرۋ جۇمىستارىن جۇرگىزەدى.

تىڭ يدەيالى بيزنەس جوسپارى بار جاستارعا ارنالعان قايتارىمسىز 3 ميلليون تەڭگە گرانت تۋرالى دا تولىققاندى مالىمەت بەرىلەدى. بۇل گرانتقا ءوتىنىش بەرۋشىلەر ازىرگە از كورىنەدى. ەگەر يننوۆاسيالىق جوباسى بار جاس ازاماتتار بولسا، بيزنەس جوسپارىن جاساپ، قايتارىمسىز گرانتتى الىپ، ءوز كاسىبىن اشۋعا مۇمكىندىك بار.

— ەلباسىنىڭ تاپسىرماسىنا سايكەس، ەلىمىزدە شاعىن جانە ورتا كاسىپكەرلىكتى دامىتۋعا ايرىقشا كوڭىل بولىنۋدە. ونىڭ ۇستىنە بيىل جاستار جىلى بولعاندىقتان جاستار كورسەتىلىپ جاتقان كومەك تە كوپ. ەڭ باستىسى مەملەكەت تاراپىنان جاسالىپ جاتقان وسىنداي مۇمكىندىكتەردى ءمۇلت جىبەرمەۋ كەرەك. دانا قازاقتا «جاس كەلسە-ىسكە» دەگەن ءسوز بار. لايىقتى جاعداي جاسالىپ جاتقاندا قول قۋسىرىپ قاراپ وتىرۋعا بولمايدى. ءوز ءىسىن اشىپ، تىرلىك باستايمىن دەگەندەرگە كوشپەلى كەڭەس بارىسىندا تولىققاندى مالىمەتتەر بەرىپ، باعىت-باعدار كورسەتەتىن بولامىز،-دەيدى وبلىس اكىمدىگىنىڭ كاسىپكەرلىك جانە يندۋستريالىق-يننوۆاسيالىق دامىتۋ باسقارماسى باسشىسىنىڭ ورىنباسارى جانداۋلەت كەنجەبەكوۆ.

باقىت جالعاس