ش. ءۋاليحانوۆ اتىنداعى جامبىل وبلىستىق امبەباپ عىلىمي كىتاپحاناسىندا قازاقستان جازۋشىلار وداعى وبلىستىق فيليالىنىڭ ۇيىمداستىرۋىمەن وڭىردەگى جاس اقىندار باس قوسىپ، بيىلعى جاستار جىلى اياسىندا اتقارىلاتىن رۋحاني شىعارماشىلىق جۇمىستاردى تالقىلادى. سياسى كەپپەگەن ولەڭدەرىن وقىپ، ۇسىنىستارىن جەتكىزدى.

قازاقستان جازۋشىلار وداعى وبلىستىق  فيليالىنىڭ ءتوراعاسى حاميت ەسامان باستاعان جاس اقىندار جۋىردا عانا وبلىستىق «ARAI» گازەتىندە جارىق كورگەن بەلگىلى جازۋشى، فيلوسوف، ادەبيەت سىنشىسى ديدار امانتايدىڭ  اۋليەاتالىق جاستار شىعارماشىلىعى جايلى جازىلعان سىني ءھام تۇڭعىش رەت كەڭىرەك تالدانعان «سەگىز اقىن:دەرەكسىز پوەزيا» اتتى ماقالاسىن تالقىلادى. ايتا كەتۋ كەرەك، بۇرىن-سوڭدى جامبىلدىق جاس اقىنداردىڭ شىعارماشىلىعى جايلى قاۋزالماعان بۇل ماقالا  بەلگىلى جازۋشى، حالىقارالىق «الاش» ادەبي سىيلىعىنىڭ لاۋرەاتى، شىعارماشىل جاستاردىڭ جاناشىرى  نەسىپبەك ءداۋتاي ۇلىنىڭ ارنايى تاپسىرىسىمەن ازىرلەنگەن ەدى.

ماقالا بارىسىندا ديدار امانتاي قازىردە رەسپۋبليكالىق دەڭگەيدەگى تالاي پوەزيا دودالارىندا توپ جارىپ، ادەبيەتسۇيەر قاۋىمعا ەسىمى تانىلىپ ۇلگەرگەن  حاميت ەسامان، تابيعات ابايلدايەۆ، دانيار ءالىمقۇل، جانعازى احمەت، نۇرجان ءقادىرالى، ارايلى جاقسىلىق، فايزۋللا ءتولتاي، شاپاعات ءابدىر ۇلىنىڭ شىعارماشىلىعىنا كەزدىك باتىرماسا دا، كەيبىر تۇستارىن كەرتىپ تۇرىپ كەڭىنەن تالداعان بولاتىن.

باسقوسۋدى اشىپ، جۇرگىزىپ وتىرعان وداق فيليالىنىڭ ءتوراعاسى حاميت ەسامان اتالمىش ماقالاداعى ورىندى ايتىلعان ورالىمدى ويلاردى ورتاعا سالىپ، اعا بۋىننىڭ تاراپىنان وسىنداي دۇنيەلەر جاس قالامگەرلەرگە كوبىرەك قاجەت ەكەنىن تىلگە تيەك ەتتى. ال وبلىستىق «ARAI» گازەتى باس رەداكتورىنىڭ ورىنباسارى، اقىن تۇرسىنبەك سۇلتانبەك  جاستاردىڭ شىعارماشىلىعىن قولداۋ باعىتىندا جاستار باسىلىمىندا «سامۇرىق»، «تالاپتىڭ ءمىنىپ تۇلپارىن» اتتى تۇراقتى ايدارلاردىڭ بار ەكەنىن، جاريالانعان ماقالانىڭ جاستار ءۇشىن ماڭىزى زور بولعاندىعىن اتاپ ءوتتى. رەسپۋبليكالىق «جاس الاش» گازەتىنىڭ وبلىستاعى مەنشىكتى ءتىلشىسى نۇربولات الديبەك پەن وبلىستىق «Aq jol» گازەتىنىڭ مادەنيەت جانە سپورت ءبولىمىنىڭ رەداكتورى، اقىن تابيعات ابايلدايەۆ الداعى ۋاقىتتا اتالعان سەگىز اقىننان بولەك، باسقا دا تالانتتى جاستاردىڭ شىعارماشىلىعىنا تۇراقتى تۇردە ءدال وسىنداي تالداۋ جاسالىپ وتىرسا دەگەن ۇسىنىستارىن ءبىلدىردى.

بۇدان كەيىن اقىندار نۇربولات ساتىمقۇل، نۇرجان ءقادىرالى، نۇربولات جولداسبەك  نوسەرلەتە جىر توكتى. اتالمىش ماقالادا شىعارماشىلىعى تالدانعان اقىندار ءوز وي-پىكىرلەرىمەن، ۇسىنىستارىمەن ءبولىستى. باسقوسۋ بارىسىندا حاميت ەربولات ۇلى وبلىس اكىمدىگى مادەنيەت، ارحيۆتەر جانە قۇجاتتاما باسقارماسى، جاستار ساياساتى ماسەلەلەرى باسقارماسى ءھام وداق فيليالى اراسىندا رۋحاني ارىپتەستىك بايلانىستىڭ نىعايعانىن جەتكىزىپ، ورتاق ماقساتتا اتقارىلاتىن ءبىرقاتار شارۋالاردى  اتاپ ءوتتى. سونىڭ ىشىندە مامىر ايىندا جەرگىلىكتى جاس اقىندار وڭىردەگى اۋدانداردى ارالاپ، جىر كەرۋەنىن ۇيىمداستىرۋ جوسپارلانىپ وتىر ەكەن. ونىڭ قورىتىندىسى وبلىس ورتالىعىندا وتپەك. 

جاستار جىلىندا جاستاردىڭ شىعارماشىلىعىنا وسىنداي باسىمدىق بەرىلىپ وتىرعانى كوڭىل قۋانتادى.

باقىت جالعاس