جامبىل وبلىسىنىڭ باتىسىندا ورىن تەپكەن سارىسۋ اۋدانى بۇگىنى بەرەكەلى، بولاشاعى باياندى. ايماقتا ەلباسى جولداۋلارىنىڭ نەگىزىندە ومىرگە كەلگەن ممەلەكەتتىك باعدارلامالار ءساتتى جۇزەگە اسىپ، جاڭا جۇمىستارى اشىلۋدا. وڭىردەگى ىرگەلى ءوندىرىس ورنى «قاراتاۋ» تاۋ-كەن وڭدەۋ كەشەنى جۇمىس اۋقىمىن ارتتىرا تۇسسە، رەسەيلىك «ەۆروحيم» كومپانياسى دا ىلكىمدى ىستەرىمەن ىلگەرى ۇمتىلۋدا. سونىمەن قاتار بيىل جەل ەلەكتر ستانساسىنىڭ قۇرىلىسى دا قارقىندى جۇرگىزىلىپ جاتىر. ودان بولەك مونوقالالاردى دامىتۋدىڭ مەملەكەتتىك باعدارلاماسى شەڭبەرىندە جاڭاتاس قالاسى دا كوركەيە تۇسۋدە. ەندى مىنە، سارىسۋدىڭ سودسى دا برەندكە اينالاتىن كۇن جاقىن.

مۇنداي جاعىمدى جاڭالىق جۋىردا جامبىل وبلىسىنىڭ  اكىمى اسقار مىرزاحمەتوۆتىڭ  «Yildirim Holding» تۇرىك كومپانياسىنىڭ وكىلدەرىن قابىلداۋى بارىسىندا ايتىلدى.   ەكى جاقتى كەزدەسۋگە وبلىس اكىمىنىڭ ءتيىستى ورىنباسارلارى مەن سالالىق باسقارما جانە  «KazakhInvest» ۇك اق-نىڭ وبلىس بويىنشا فيليالىنىڭ باسشىلارى قاتىستى.

بۇعان دەيىن بەلگىلى بولعانداي تۇركيالىق كومپانيا وڭىرىمىزدە «كالسيلەندىرىلگەن سودا ءوندىرىسى» ينۆەستيسيالىق جوباسىن جۇزەگە اسىرماق. سارىسۋ اۋدانىنان ىرگە قالايتىن جوبانىڭ جالپى قۇنى 270 ميلليون اقش دوللارىن قۇرايدى. زاۋىتتىڭ جىلدىق قۋاتى 400 مىڭ توننا ءونىم وندىرۋگە قۋاتتى. جوبانى 2019-2022 جىلدار ارالىعىندا ىسكە اسىرۋ كوزدەلۋدە.

كەزدەسۋ بارىسىندا  «Yildirim Holding Soda Ash&Derivatives» كومانياسىنىڭ باس ديرەكتورى يسمايل دجەيلان وبلىس باسشىسىنان ءبىرقاتار ماسەلەلەردى شەشىپ بەرۋىن سۇرادى. اسىرەسە جەر، سۋ ماسەلەلەرىن الدىعا تارتتى. سونداي-اق، ول جوبا ىسكە اسقاندا ونىممەن ىشكى جانە سىرتقى نارىقتى قامتاماسىز ەتىپ، سارىسۋ سوداسىن برەندكە اينالدىرۋعا بولاتىنىنا نازار اۋدارتتى.

ءوز كەزەگىندە وبلىس اكىمدىگىنىڭ جەر قويناۋىن پايدالانۋدى باسقارۋ باسقارماسىنىڭ باسشىسى باقتيار كوپبوسىنوۆ جەر ماسەلەسى شەشىلەتىنىن، ول بويىنشا جۇمىستار جۇرگىزىلىپ  جاتقانىن جەتكىزدى. ال، سۋ ماسەلەسىن شەشۋ بويىنشا ءتيىستى شارالاردى جۇيەلى تۇردە اتقارۋ ءۇشىن ءوڭىر باسشىسى جاۋاپتى تۇلعالارعا ناقتى تاپسىرمالار جۇكتەدى.

اسقار يسابەك ۇلى ينۆەستورلارعا وبلىس تاراپىنان ءتيىستى قولداۋلار جاسالاتىنىن باسا ايتىپ،   بۇل باعىتتا تاراپتاردىڭ قول قويعان مەموراندۋمى اياسىندا ورتاق جۇمىس جوسپارىن بەكىتۋ كەرەكتىگىن ۇسىندى. بەكىتىلەتىن جۇمىس جوسپارى ارقىلى ناقتى شارالار اتقارىلماق. ءوڭىر باسشىسى كەن ءوندىرۋ بارىسىندا ەكولوگيالىق قاۋىپسىزدىك شارالارىنىڭ ساقتالۋىنا دا اسا كوڭىل ءبولۋ كەرەكتىگىنە كوڭىل ءبولدى.

ايتا كەتەيىك، «Yildirim Holding» - ءتورت قۇرلىقتا جۇمىس ىستەيتىن ءىرى حولدينگ. قازىرگى كەزدە حولدينگ قازاقستاندا بيزنەس جۇرگىزۋدە ايتارلىقتاي تاجىريبەسى بار كومپانيا بولىپ ەسەپتەلىنەدى.

بۇگىنگى تاڭدا سوركول كەنىندە بارلاۋ جۇمىستارى باستالىپ كەتتى. سونداي-اق، جوبالىق-سمەتالىق قۇجاتتاما مەن تەحنيكالىق-ەكونوميكالىق نەگىزدەمە جۇمىستارى ازىرلەنۋدە.

باقىت جالعاس