اعىمداعى جىلدىڭ 1 ماۋسىمىنان باستاپ جىل سايىنعى «كوكنار-2019» رەسپۋبليكالىق جەدەل-الدىن الۋ ءىس-شاراسى باستالادى، ول جابايى وسەتىن ەسىرتكى وسىمدىكتەرىنىڭ زاڭسىز ەگىستىكتەرى مەن اۋماقتارىن انىقتاۋعا جانە جويۋعا، ەسىرتكىنىڭ زاڭسىز تارالۋىنا قاتىسى بار تۇلعالاردى ۇستاۋعا جانە ەسىرتكى ارنالارىنىڭ جولىن كەسۋگە باعىتتالعان.

«كوكنار-2019» جەدەل-الدىن الۋ ءىس-شاراسىن وتكىزۋ قارساڭىندا قازاقستان رەسپۋبليكاسى ىشكى ىستەر ءمينيسترىنىڭ ورىنباسارى،  پوليسيا گەنەرال-مايورى ماحامبەت ابيساتوۆ جامبىل وبلىسىنىڭ شۋ قالاسىنا جۇمىس ساپارىمەن كەلدى. ماحامبەت قايىرجان ۇلى جامبىل وبلىسىنىڭ پوليسيا دەپارتامەنتى باستىعىنىڭ ورىنباسارى،  پوليسيا پولكوۆنيگى نۇرجان قالمەتوۆپەن بىرگە پوليسيا دەپارتامەنتىنىڭ «دەلتا-دولينا» ەسىرتكى قىلمىسىنا قارسى ءىس-قيمىل جونىندەگى ءوڭىرارالىق بولىمىندە بولىپ، ءبولىمنىڭ جەكە قۇرامىمەن تانىستى.  سونداي-اق قىزمەتكەرلەر  قولداناتىن تەحنيكالىق قۇرالدار مەن جابدىقتاردى قاراپ، ناقتى ۇسىنىستار بەردى.

-ەسىرتكى قىلمىسىنا قارسى ءىس-قيمىلدىڭ تيىمدىلىگىن ارتتىرۋ جانە وبلىس اۋماعىنان تىس جەرلەرگە ەسىرتكىنى شىعارۋعا جول بەرمەۋ ءۇشىن ءىس-شارانى جۇرگىزۋ كەزەڭىندە قازىرگى زامانعى تەحنيكالىق قۇرالدارمەن جابدىقتالعان جەدەل-ىزدەستىرۋ توپتارى پايدالانىلاتىن بولادى. ارنايى ءىس-شارالاردى وتكىزۋ  ءۇشىن شالعاي ءارى جەتۋگە جولى قيىن اۋدانداردا اۆياتەحنيكانى قولدانۋ قاراستىرىلاتىن بولادى. سونىمەن قاتار قۇمعا جاقىن ايماقتاردا ارنايى ماقساتتاعى بولىنىستەر مەن قىزمەتتىك يتتەردىڭ قاتىسۋىمەن پاترۋلدەۋدى جۇزەگە اسىرۋ  ءۇشىن جوعارى وتىمدىلىگى بار اۆتوكولىكتەر جۇمىلدىرىلادى، - دەپ اتاپ ءوتتى ماحامبەت قايىرجان ۇلى.

بۇدان كەيىن م. ءابيساتوۆ رەسپۋبليكالىق نۇسقامالىق كەڭەسكە قاتىسىپ، قازاقستاننىڭ بارلىق وڭىرلەرىنىڭ ەسىرتكى قىلمىستارىنا قارسى ءىس-قيمىل جونىندەگى باسقارمالارىنىڭ اعىمداعى جىلدىڭ ءتورت ايىنداعى  اتقارعان قىزمەتىنىڭ قورىتىندىسىن تىڭدادى. كەزدەسۋ بارىسىندا  وزەكتى ماسەلەلەر تالقىلانىپ، الداعى جوسپارلار ايتىلدى، سونداي-اق ناقتى مىندەتتەر قويىلدى.

جالپى، «كوكنار» جەدەل-الدىن الۋ ءىس-شاراسى جامبىل وبلىسىنىڭ اۋماعىندا ءداستۇرلى تۇردە جىل سايىن ءوتىپ كەلەدى. مۇنداعى ماقسات ەسىرتكى اينالىمىنىڭ جولىن كەسۋگە نەگىلدەلگەن. بۇل تۇرعىدا جامبىل وبلىستىق پوليسيا دەپارتامەنتى «دەلتا-دولينا» ەسىرتكى قىلمىسىنا قارسى ءىس-قيمىل جونىندەگى ءوڭىرارالىق ءبولىمىنىڭ اتقارىپ جاتقان جۇمىستارى دا اۋقىمدى.

باقىت جالعاس