ەلباسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا «سىبايلاس جەمقورلىقتان ادا وڭىرلەر» جوباسى اياسىندا استانا قالاسىنىڭ جەمقورلىققا قارسى تاجىريبەسىن بارلىق وڭىرلەرگە ەنگىزۋ تاپسىرىلعان بولاتىن. وسىعان وراي وبلىس اكىمدىگى وتكەن جىلدىڭ سوڭىندا «جامبىل – ادالدىق الاڭى» جوباسىن جانداندىرعان ەدى. بۇل باستامانىڭ بۇگىنگى باعدارى قانداي؟ ارتىلعان سەنىم ۇدەسىنەن شىعا الىپ جاتىر ما؟ مىنە، وسى ساۋالدارعا جاۋاپ تاپپاق ماقساتتا «جامبىل – ادالدىق الاڭى» جوبالىق كەڭسەسىنە ارنايى ات باسىن بۇرعان ەدىك.
جالپى كەڭسە باسشىسى قايرات مەكليسوۆتىڭ ايتۋىنشا، جوبا وتكەن جىلدىڭ جەلتوقسان ايىندا ىسكە قوسىلعاندىقتان ءقازىر باعدارىن ايقىنداۋ جۇمىستارى جۇرگىزىلىپ جاتىر ەكەن.
– جوبالىق كەڭسە ءۇش سالا بويىنشا جۇمىس اتقارادى. ولار تۇرمىستىق جەمقورلىقتى جويۋ جانە قولايلى ورتا قۇرۋ، قوعامدىق باقىلاۋدى جۇزەگە اسىرۋ جانە سىبايلاس جەمقورلىققا قارسى مادەنيەتتى قالىپتاستىرۋ. ونىڭ ىشىندە تۇرمىستىق جەمقورلىقتى جويۋ جانە قولايلى ورتا قۇرۋ ءۇشىن ءبىلىم بەرۋ، دەنساۋلىق ساقتاۋ، الەۋمەتتىك قامتاماسىز ەتۋ، ساۋلەت، قۇرىلىس جانە تۇرعىن ۇي-كوممۋنالدىق شارۋاشىلىق، اۋىل شارۋاشىلىعى، جەر قاتىناستارى، مەملەكەتتىك كىرىس، سوت جانە قۇقىق قورعاۋ ورگاندارى سالالارى بويىنشا زەردەلەۋ جۇمىستارى جۇرگىزىلۋدە.
جەكەلەي ايتساق، ءبىلىم بەرۋ باعىتى بويىنشا مەكتەپتەردەگى اقشا جيناۋدى جويۋ، ءبىلىم وردالارىنا بولىنەتىن بيۋدجەتتىك قاراجاتتىڭ اشىقتىعىن قامتاماسىز ەتۋ سىندى تۇرمىستىق جەمقورلىقتى جويۋعا باعىتتالعان شارالار قولعا الىنۋدا. سونداي-اق مەكتەپتەردە «ادال ۇرپاق»، «سانالى ۇرپاق» سىندى كلۋبتاردىڭ جۇمىسىن جولعا قويىپ، جاستاردى مەكتەپ قابىرعاسىنان جەمقورلىققا بويالدىرماۋعا ناسيحاتتاۋدامىز.
جوبالىق كەڭسەمىز اقپان ايىندا اشىلعاندىقتان ازىرگە مۇندا التى مامان جۇمىس جاساۋدا. ءار مامانعا ەكى سالادا بەلگىلەنىپ بەرىلگەن. ءوزىم «پاناراما» اقپاراتتىق ورتالىعىنان وسى قىزمەتكە كەلسەم، وزگە ماماندارىم وزدەرى جاۋاپتى بولىپ وتىرعان سالالار بويىنشا جولدانعان. جانە ايلىق جالاقىلارى دا تىركەلگەن مەكەمەلەرىنەن تولەنەدى. ءبىزدىڭ دەربەس بيۋدجەتىمىز بولماعاندىقتان نەگىزگى قارجى كوزىمىز مەملەكەتتىك تاپسىرىس بولىپ وتىر. مىنە، وسى نەگىزدە نەگىزگى جۇمىسىمىزدى جانداندىرۋدامىز، - دەيدى كەڭسە باسشىسى.
كەڭسە تىنىسىمەن ءبىز دە جان-جاقتى تانىسىپ شىقتىق. ىرگەسى ەندى قالانىپ وتىرعان ورتالىق قاجەتتى قۇرالدارمەن تولىقتاي جابدىقتالىپتى. جانە جوبانىڭ الەۋمەتتىك پاراقشالارى اشىلىپ، ىسكە قوسىلعان. ول جەردەن كەز-كەلگەن قالا تۇرعىنى وزىنە قاجەتتى اقپاراتتى الا الادى. جانە جۋىردا كەڭسە باسشىلىعى بۇل جۇمىسقا ارنايى ماماندى بەلگىلەپ، اقپاراتتاندىرۋ جاعىنا ايرىقشا باسىمدىق بەرگەلى وتىرعاندارىن ايتۋدا.
- ءبىز قاي سالاعا بولماسىن تەكسەرۋشى ەمەس، تۇتىنۋشى رەتىندە بارامىز. سول ارقىلى وزىمىزگە قاجەتتى اقپاراتتى الىپ، كەمشىلىكتەردى كوپتىڭ كوزىمەن بىردەي كورۋدەمىز. جانە جاسالعان زەردەلەۋ جۇمىستارىمىزدى الەۋمەتتىك جەلىلەردەگى پاراقشالارىمىزعا سالىپ، اشىقتىق ءپرينسيپىن ۇستانۋدامىز. ماسەلەن №2 قالالىق اۋرۋحاناعا سارالاۋ جۇمىستارىمەن بارعانىمىزدا ءار ناۋقاسقا WhatsApp ءنومىرىمىزدى بەرىپ كەتتىك. سوندا ەمدەلۋشىلەر تەگىن ءدارىنىڭ بەرىلمەي جاتقانى، دارىگەرلەردىڭ دۇرىس قاراماعاندىعى سىندى شاعىمدارىن جازىپ جاتتى. ونى ءبىز حاتتاماعا ەنگىزىپ، وبلىس اكىمدىگى دەنساۋلىق ساقتاۋ باسقارماسىنا جولدادىق. ءدال سونداي، №55 مەكتەپكە زەردەلەۋ جۇمىستارىن جۇرگىزگەنىمىزدە، قول جۋۋ قۇرىلعىلارىنىڭ ىستەمەي تۇرعانى، ونىڭ ورنىنا باكلاشكامەن سۋ قويىپ قويعانى، راكوۆينالارىنىڭ ءىشى قۇمىرسقاعا تولىپ كەتكەنى، اسحانانىڭ ءبىر بۇرىشىندا تىشقان ولتىرەتىن ءدارىنىڭ اشىقتان-اشىق جاتقانى سەكىلدى ولقىلىقتاردى انىقتادىق. بۇل كەلەڭسىزدىكتەر تۋرالى تاراز قالاسى اكىمدىگى ءبىلىم بەرۋ ءبولىمىن حاباردار ەتىپ، شارا قولدانۋىن وتىندىك. ولار مەكتەپ ديرەكتورىن شاقىرىپ، ءبىزدىڭ قاتىسۋىمىزبەن كەمشىلىكتەردى تۇزەتۋ تۋرالى ۋادەسىن الدى.وسى سىندى جامبىل اۋدانى گرودەكوۆا اۋىلىنداعى حالىققا قىزمەت كورسەتۋ ورتالىعىنا بارعانىمىزدا دا پاندۋستاردىڭ ستاندارتقا ساي كەلمەيتىنى، كەلۋشىلەرگە ارنالعان تۇراققا قىزمەتكەرلەر ءوز كولىكتەرىن قويىپ قويعانى سىندى جايتتارعا كۋا بولدىق. ال ەڭ سوراقىسى ورتالىق باسشىسىنا باراتىنىمىزدى ەسكەرتسەك تە، ول قىزمەت ورنىندا بولماي شىقتى. ءقازىر وسىنداي كەلەڭسىزدىكتەردى انىقتاپ، جاۋاپتى مەكەمەلەردى جاۋاپكەرشىلىككە شاقىرۋدامىز، - دەيدى ق. مەكليسوۆ.
بۇدان بولەك، كەڭسە ماماندارى مەكتەپ ديرەكتورلارىنىڭ كابينەتتەرىن دە باقىلاۋعا العان. ەگەر مەكتەپ باسشىسىنىڭ كەڭسەسى بەلگىلەنگەن تالاپتان ۇلكەن بولسا، ونى بوساتىپ، شاعىن كابينەتكە كوشۋ تۋرالى ۇسىنىستار بىلدىرۋدە. سونداي-اق مەكتەپ باسشىسىنىڭ كەڭسەسى كەلۋشىلەرگە قولجەتىمدى بولۋى ءۇشىن عيماراتتىڭ ءبىرىنشى قاباتىن ورنالاسۋ جاعى دا ءجىتى قاداعالانۋدا.
-نەگىزى بىزدىكى قوعامدىق جۇمىس بولعاننان كەيىن، ەشكىمنەن ەشتەڭەنى تالاپ ەتە المايمىز. الايدا «جامبىل – ادالدىق الاڭى» جوباسى ىسكە قوسىلار الدىندا وبلىستاعى بارلىق مەكەمە باسشىلارىنان قولداۋ ءبىلدىرۋ تۋرالى كەلىسىمدەرى الىنعان. الايدا كەيبىر باسشىلار ماماندارىمىز بارعاندا قىزمەت ورنىندا بولماي، قيىندىقتار تۋعىزۋدا. دەسە دە، ءبىز العان باعىتىمىزدان تايماي مەكتەپ پەن بالاباقشالارداعى قامقورلىق كەڭەسىنە مۇشە اتا-انالارعا ارناپ WhatsApp جەلىسىنەن توپ اشىپ قويدىق. ولاردىڭ سوندا ارىز-شاعىمدارىن بىلدىرۋگە مۇمكىندىك جاسادىق. جانە الداعى ۋاقىتتا وسىنداي WhatsApp جەلىسىنە قوسىلعان ءنومىرىمىز كورسەتىلگەن جارنامالاردى مەكتەپ جانە بالاباقشالارعا ىلسەك دەپ وتىرمىز. بۇل بىزگە مەكەمەدە بولىپ جاتقان جاعدايدى ىشتەن باقىلاۋعا مۇمكىندىك بەرەدى.
تاعى ءبىر ايتا كەتەرلىگى، جەمقورلىق سيپاتىنداعى كورىنىسكە كۋا بولعان اتا-انالار نەمەسە تۇرعىندار تاراز قالاسى «حيمپوسەلوك» يىنىندەگى كەڭسەمىزگە كەلىپ، قاعاز جۇزىندەگى شاعىمدارىن دا بىلدىرە الادى، - دەيدى جوبالىق كەڭسەنىڭ باسشىسى.
كەڭسە ماماندارى مەكتەپتەردەگى قامقورلىق كەڭەسىنە تۇسكەن قارجىلاردىڭ اشىقتىعىن دا باقىلاماق. سونداي-اق وسى تاڭعا دەيىن جامبىل، بايزاق اۋداندارىنا زەردەلەۋ جۇمىستارىن جۇرگىزسە، ەندى شالعاي اۋىلداردى قامتۋ ءۇشىن جاستار رەسۋرستىق ورتالىقتارىمەن كۇش بىرىكتىرمەك. جانە بولاشاقتا مۇنداي سارالاۋ جۇمىستارىنا بۇقارالىق اقپارات قۇرالدارى وكىلدەرىن دە شاقىرىپ، زاڭسىز ارەكەتتەردى ەلگە جاريا ەتۋدى ماقسات تۇتىپ وتىر.
ارينە، تىرلىگىن ەندى عانا تىكتەپ كەلە جاتقان جوبالىق كەڭسەنىڭ كورسەتەر جەمىسى الدا. الايدا وسى تاڭعا دەيىن جۇرگىزىلگەن زەردەلەۋ جۇمىستارىنىڭ وزىندە كەيبىر مەكتەپ ديرەكتورلارى 8-ناۋرىز حالىقارالىق ايەلدەر كۇنىنە ۇستازدارعا گۇل سىيلاۋعا تيىم سالىپتى. ال كەيبىر بالاباقشالار تاربيەلەنۋشىلەرگە سىيلىق جاساۋعا اقشا جيناۋعا شەكتەۋ قويعان كورىنەدى. دەمەك، جوبا ءوز پارمەنىڭ كورسەتە باستادى دەگەن ءسوز. ەندى تەك باسى ءتاپ-تاۋىر باستالعان تىرلىكتىڭ سوڭى سيىر قۇيىمشاقتانىپ كەتپەسىن دەپ تىلەيىك.
