ەلباسى  «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىن سوت ۇستەمدىگىن ارتتىرۋمەن قاتار،  داۋ جانجالداردى  مامىلە تۇرىندە شەشۋدى باسا تاپسىرعانى بەلگىلى. وسىعان وراي، بۇگىندە ەلىمىزدەگى سوت پروسەستەرىندە مەدياسيا جۇيەسى كەڭ قولدانىلۋدا. بۇل باعىتتا  «قوعامدىق كەلىسىم» مەكەمەلەرى دە ەلەۋلى ىستەر اتقارىپ كەلەدى.

 جامبىل وبلىسى اكىمى اپپاراتىنىڭ «قوعامدىق كەلىسىم» مەكەمەسى  وسكەلەڭ ۇرپاق اراسىندا شەكسىز ورتانى دامىتۋ ماقساتىندا ءوڭىردىڭ مەكتەپتەرى مەن كوللەدجدەرىندە ءبىرقاتار ءىس-شارالار ۇيىمداستىرۋدا.  داۋلار مەن جانجالداردى شەشۋگە مەدياتيۆتىك ءتاسىلدى قولدانۋ تۋرالى قۇقىقتىق ءتۇسىندىرۋ جۇمىسىن وبلىستىق اسسامبلەيا  مەدياتورلارى  جانە انالار كەڭەستەرىنىڭ وكىلدەرى جۇرگىزۋدە.

وبلىستىق  كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىمەن ىنتىماقتاستىق تۋرالى مەموراندۋمىن ءىس جۇزىندە جۇزەگە اسىرۋ ماقساتىندا مەدياسيا كابينەتى سۋديالارمەن بىرلەسە  №10 س. نۇرماعانبەتوۆ اتىنداعى ورتا مەكتەپتە تالىمدىك شارا وتكىزدى. وندا داۋلار بارىسىندا تۋىنداعان الەۋمەتتىك-پسيحولوگيالىق ماسەلەلەردى شەشۋ الگوريتمى تاڭدالدى.

«مەكتەپ مەدياسياسى» كابينەتىندە 11 سىنىپ وقۋشىلارىنا ارنالعان «مەدياسيا نەگىزدەرى»  اتتى العاشقى كەڭەستىك - ادىستەمەلىك ساباق ءوتتى. دارىستە مەدياسيا كابينەتىنىڭ مەڭگەرۋشىسى ن.دوسىبييەۆا  قاتىسۋشىلاردى مەدياسيا پروسەدۋراسىمەن، ونىڭ قاعيداتتارىمەن، قۇرالدارىمەن جانە قولدانۋ سالاسىمەن تانىستىردى. ءوز سوزىندە ول جانجال، داۋلى جاعدايلار ءار ادامنىڭ ومىرىندە بولاتىندىقتان، الايدا ورىن العان شيەلىنىستەن شىعا ءبىلۋ ماڭىزدى ەكەنىنە توقتالدى.

قحا مەدياتورلار كەڭەسىنىڭ ءتوراعاسى ل.سافونوۆا بولسا،  قاتىسۋشىلاردى مەدياسيانى ومىردە قولدانۋدىڭ پراكتيكاسى نەگىزىندە ءوز تاجىريبەسىنەن مىسال كەلتىرە وتىرىپ ءتۇسىندىردى.  وقىتۋ بارىسىندا شاعىن-دارىستەر، پراكتيكالىق جاتتىعۋلار، رولدىك ويىندار، ميعا شابۋىل، ديسكۋسسيالار جانە  جەكە بايلانىسى بار يميتاسيالىق مەدياسيا قولدانىلدى. بۇدان بولەك، 11 سىنىپ وقۋشىلارىنا داۋلى جاعدايلار جانە ونى شەشۋ كەزىندە مەدياسيانى قولدانۋ شارتتارى قويىلدى. وقۋشىلار ۇسىنىلعان جاعدايدى دەلدالدىق جانە كەلىسسوزدەر ارقىلى ءساتتى شەشتى.

مەكتەپ وقۋشىلارىنا ارنالعان مۇنداي  وقۋ ساباقتارى الداعى ۋاقىتتا دا جالعاسىن تاپپاق.  سەبەبى  دارىستەر مەدياسيا ينستيتۋتىن مەكتەپ قابىرعاسىنان باستاپ ماقساتتى تۇردە دامىتىپ، وسكەلەڭ ۇرپاقتى داۋدى نەمەسە جانجالدى شەشۋگە مەدياتيۆتىك كوزقاراسپەن قاراۋعا ۇيرەتەدى.

جايدار ازامات