مۇرات قىرعىزباي ۇلى ءۇيىنىڭ اۋلاسىنان ادام سۇيەگى شىققان سوڭ قىرىق جىلدان استام شەشۋىن تابا الماي جۇرگەن جايتتىڭ جاۋابن تۇسىنگەن. ايتۋىنشا، كۇن باتسا بولعانى اق كيىمدى زيالى ادامنىڭ ەلەسى وتباسىنداعى بارلىق ادامعا كورىنەتىن بولعان. سويتسە، ەلۋ جىلداي تۇرىپ كەلگەن ۇيلەرىنىڭ اۋلاسىندا جازىقسىز اتىلعان جۇزدەگەن ادامنىڭ سۇيەگى جاتقان ەكەن. مۇنى ول مونشاعا قۇبىر جولىن قازىپ جاتقاندا ءبىر-اق بىلگەن.

"ءبىر جولى تۇندە قوناق بولمەسىنە كىرىپ بارعانىمدا، اق كيىمدى ادام كورگەنىم ءالى كۇنگە كوز الدىمدا. ول جاي ادام ەمەس، اق شلياپا، اق كوستيۋم كيىپ العان ادام ەدى. كوردىم دە، قاتتى قورقىپ، ۇيدەگىلەرگە ارەڭ جەتكىزدىم. سويتسەم، جالعىز مەن عانا ەمەس، ەكى اپكەم دە، اعام دا، انام دا، ۇيدەگىلەر تۇگەل كورگەن ەكەن. ولاردىڭ بىزگە ەشقانداي زيانى تيگەن جوق. ءبىراق، نەگە ونداي ەلەس كەزىپ جۇرەتىنىن تۇسىنبەدىك.  ەندى مىنە، مىنا جەردىڭ ءبارىن قازىپ، 168 ادامنىڭ سۇيەگى شىققان كەزدە ءتۇسىنىپ وتىرمىز"، – دەيدى ءۇي يەسى مۇرات بايعوجايەۆ.

ال، 6 اي سوت ساراپتاماسى جۇرگىزىلىپ، قۇجاتتارى قاتتالعان ازاماتتاردىڭ اتى-جوندەرى تۇگەل انىقتالماسا دا، ولاردىڭ ءارۋاعىنا قۇران باعىشتالىپ، جيىرمادان استام قوراپقا سالىنعان سۇيەكتەر قايتا جەرلەندى. ءبىراق، بۇل ىسكە الاشتانۋشىلار رازى ەمەس. ايتۋلارىنشا، ءاۋ باستا كەلىسكەندەي، 31 مامىر – ساياسي قۋعىن-سۇرگىن قۇرباندارىن ەسكە الۋ كۇنى كوپتىڭ الدىندا جەرلەيمىز دەگەن جوسپار اياق استىنان وزگەرىپ كەتكەن.  

"مەنىڭ بۇعان كوڭىلىم تولماي وتىر. سەبەبى، حالىق بىلەتىندەي ەتىپ جەرلەۋىمىز كەرەك ەدى. ال، ءبىز باس-اياعى 15-20 ادامدى جيناپ الدىق تا، جاسىرىن جەرلەي سالدىق. تۇسىنبەدىك، كىمنەن تىعىلىپ، تاريحىمىزدى كىمنەن جاسىرىپ ءجۇرمىز ءوزى؟ ەگەر الاش قايراتكەرلەرىنە، كەشەگى قاندى قىرعىن قۇرباندارىنا كورسەتىپ وتىرعان قۇرمەتىمىزدىڭ ءتۇرى وسى بولسا... وسىنداي قاندى قىرعىن، قاسيەتتى تاريحتى ۇرپاقتىڭ ساناسىنا ءسىڭىرۋ ءبىزدىڭ پارىزىمىز، بورىشىمىز ەمەس پە؟"، – دەيدى قازاقستانداعى ساياسي قۋعىن-سۇرگىن قۇرباندارى قاۋىمداستىعىنىڭ ءتوراعاسى جۇمابەك اشۋ ۇلى.

ال جىل بويى قاراۋسىز قالعان اۋماقتى ەندى عانا رەتكە كەلتىرىپ جاتقان تالعار اۋداندىق اكىمدىگى وكىلدەرىنىڭ پىكىرى باسقاشا. ولار 31 مامىر كۇنى قارالى ميتينگىگە كەلەتىن ادامدار سانى از بولمايتىنىن، ال كوپتىڭ الدىندا جەرلەۋ ءراسىمىن وتكىزۋ ۋاقىتتى الاتىنىن ايتادى.

"كەلەتىن ادامدار كوپ، ال ۋاقىت تىعىز بولدى. مىنا جەردە ۇلكەن ميتينگ بولادى. جان-جاقتان ادامدار جينالادى. سوندىقتان، ول كۇنگە قاباتتاستىرماي-اق بۇگىن مىنە مولدانى شاقىرىپ، سول ءىس شارانى وتكىزدىك"، – دەيدى تالعار اۋدانىنىڭ اكىمى رىسكەلدى ساتبايەۆ.  

ال اۋىل تۇرعىندارى بۇرىن دا بىرەڭ-ساراڭ ادام سۇيەگى تابىلعانمەن، ءدال وسىنداي كوپ ادامنىڭ ءبىر جەرگە كومىلگەنىن كەزدەستىرمەگەندەرىن ايتادى. جاڭالىقتاعى ءۇي يەسى اۋلاسىن قازسا، ءالى دە ادام سۇيەكتەرى تابىلادى دەپ وتىر. ال الاشتانۋشىلاردىڭ زەرتتەۋىنشە، باي، فەودال دەگەن جەلەۋمەن اتىلىپ، قۋدالانعان ازاماتتار ءالى كۇنگە اقتالعان جوق. سوندىقتان، ولار الداعى اپتانىڭ سوڭىندا تىڭ دەرەكتەردى جاريا ەتىپ ءارى جاسالاتىن جۇمىس جوسپارىن جاريالاۋ ماقساتىندا ەكى كۇندىك كونفەرەنسيا ۇيىمداستىرماق.