قىتايدىڭ قازاقستانداعى ەلشىسى چجان سياو شىڭجاڭدا قازاقتارعا قىسىم جاسالىپ جاتقانى تۋرالى حابارلاردى "جالعان اقپارات" دەدى. بۇل تۋرالى ول 28 مامىردا نۇر-سۇلتاندا وتكەن قازاق-قىتاي قاتىناسىنا ارنالعان جيىننىڭ الدىندا ايتتى دەپ حابارلايدى Qamshy.kz اقپارات اگەنتتىگى azattyq.org سايتىنا سىلتەمە جاساپ.
جۋرناليستەر جۇڭگو ەلشىسىنەن "الماتىدا تۇرعىندار بىرنەشە جيىن وتكىزىپ، قىتايداعى تۋىسقاندارىنا قىسىم جاسالعانىن، ولاردىڭ قازاقستانعا وتە الماي وتىرعانىن ايتتى. قىتايدان قازاقستانعا كەلىپ وقىپ جۇرگەن قازاق ستۋدەنتتەر كەرى قايتساق، قامايدى دەيدى. بۇل اقپارات قانشالىقتى راس؟" دەپ سۇرادى.
چجان سياو تىلشىلەردىڭ سۇراعىنا "بارلىق اقپارات جالعان. بۇل اقپاراتتاردى قايدان الدىڭىز؟ اقپاراتتى قايدان العانىڭىزدى ايتا الاسىز با؟ [ستۋدەنتتەردىڭ ايتقانى] دا تەرىس اقپارات. شىڭجاڭداعى جاعداي ءبىرقالىپتى. شىڭجاڭداعى شارالار - تەرروريزم جانە ەكسترەميزممەن كۇرەسۋ ارەكەتى" دەدى.
27 مامىردا الماتىدا "جۇڭگو زەرتتەۋ ينستيتۋتى" ۇيىمىنىڭ وفيسىندە ءبىر توپ ادام باسپا ءسوز ماسليحاتىن وتكىزىپ، تۋىستارى ساياسي لاگەردەن بوساعانىمەن قازاقستانعا كەلە الماي ولار قازاقستان بيلىگىنەن، حالىقارالىق ۇيىمداردان كومەك سۇراعان.
شىڭجاڭ ايماعىنداعى لاگەرلەر جايلى العاش رەت 2017 جىلدىڭ كوكتەمىندە ايتىلا باستاعان. بۇۇ شىڭجاڭداعى "ساياسي تاربيەلەۋ ورتالىقتارىندا" ميلليونعا جۋىق ادام "ەركىنەن تىس" قاماۋدا وتىرعانىن مالىمدەگەن.
قازاقستاننىڭ بىرنەشە قالاسىندا ازاماتتار جينالىپ، "قىتايدا جاقىندارىمىز قىسىم كورىپ جاتىر، ءۇيقاماقتا وتىر، قازاقستانعا وتە المايدى" دەگەن.
جۇڭگو ۇكىمەتى باسىندا بۇل ورتالىقتاردىڭ بارىن جوققا شىعارىپ كەلدى. كەيىن پەكين شىڭجاڭداعى ساياساتىن "ەكسترەميزمگە قارسى شارا" دەپ اتاپ، ادامدار ەركىنەن تىس وتىرعان لاگەرلەردى "ءتىل ۇيرەنىپ، كاسىپكە باۋليتىن " ورتالىقتار دەپ تۇسىندىرگەن.
ۇسىنعان: داۋرەن سىبانباي
