وڭىردە 8 ايماقتىق سايلاۋ كوميسسياسى قۇرىلىپ، بۇگىنگى تاڭدا 390 مىڭنان اسا سايلاۋشى تىركەلگەن. بۇل تۋرالى وڭىرلىك كوممۋنيكاسيالار قىزمەتى الاڭىندا وتكەن بريفينگتە ماڭعىستاۋ وبلىستىق سايلاۋ كوميسسياسىنىڭ ءتوراعاسى اسقار رزاحانوۆ مالىمدەدى.
بيىلعى جىلدىڭ 9-ماۋسىمىندا كەزەكتەن تىس ق ر پرەزيدەنتىنىڭ سايلاۋى وتەدى دەپ بەكىتىلدى. وسىعان وراي، كۇنتىزبەلىك جوسپار بويىنشا 1 وبلىستىق، 5 اۋداندىق، 2 قالالىق سايلاۋ كوميسسيالارى جۇيەلى تۇردە ءوز جۇمىستارىن باستاپ كەتتى. پرەزيدەنتىككە كانديداتتاردى تىركەۋ، سەنىمدى وكىلدەرىن تاعايىنداپ، كۋالىكتەرىن بەرۋ، سايلاۋشىلاردى تىركەۋ - زاڭ تالاپتارى بويىنشا بەلگىلەنگەن كەزەڭدە ءوتۋى كەرەك. بۇگىنگى تاڭدا بارلىق ۇمىتكەرلەردىڭ وبلىستا شتاتتارى اشىلىپ، سەنىمدى وكىلدەرى تىركەلگەن. اتاپ ايتساق: قاسىم-جومارت توقايەۆقا 619 سەنىمدى وكىل تىركەلسە، امانگەلدى تاسپيحوۆقا 47، دانيا ەسبايەۆاعا 228 وكىل سەنىم بىلدىرسە، سادىبەك تۇگەلگە 11، تولەۋتاي راحىمبەكوۆكە 11، 16 ادام جامبىل احمەتبەكوۆكە تىركەلسە، ءامىرجان قوسانوۆقا 21 ادام سەنىمدى وكىل بولۋعا نيەت بىلدىرگەن.
وبلىستا 223 ۋچاسكەلىك كوميسسيا جۇمىس ىستەپ جاتىر. 25-مامىردان باستاپ ءاربىر سايلاۋشى وزىنە جاقىن سايلاۋ ۋچاسكەسىنە بارىپ، تىزىمگە ەنگەن نەمەسە ەنبەگەنى تۋرالى اقپارات الا الادى. ەگەردە 9-ماۋسىم كۇنى ءارتۇرلى سەبەپتەرمەن تۇرعىلىقتى جەرىندە بولمايتىن ازاماتتار ەسەپتەن شىعارۋ كۋالىگىن الۋى كەرەك. سول كۋالىكپەن جۇرگەن جەرىندە تىركەلىپ، داۋىس بەرە الادى. ۆاحتالىق ادىستە قىزمەت اتقاراتىن مۇنايشىلاردىڭ سايلاۋعا قاتىسۋى ءۇشىن تىزىمدەر جاساقتالىپ، كەن ورىندارىندا 5 سايلاۋ ۋچاسكەلەرى اشىلعان. سونداي-اق، مۇمكىندىگى شەكتەۋلى جاندار ءۇشىن بارلىق سايلاۋ ۋچاسكەلەرىندە ارنايى جاعداي جاسالعان. ەستۋ قابىلەتى تومەن ادامدارعا قۇلاققاپتار، كوزى كورمەيتىن توپتاعىلار ءۇشىن ترافارەتتەر ورناتىلعان. ءارتۇرلى ەرەكشەلىكتەرگە ارنايى جاساقتالعان ۋچاسكەلەردە 8000 عا جۋىق سايلاۋشى داۋىس بەرە الادى.
«وبلىستىق سايلاۋ كوميسسياسى كۇنى بۇگىنگە دەيىن اۋدان-قالالاردى ارالاپ كەلدىك. سايلاۋعا تىڭعىلىقتى دايىندىق جۇرگىزىلىپ، پىسىقتالۋدا. وڭىرگە ۇزاق مەرزىمگە حالىقارالىق دەڭگەيدەگى باقىلاۋشىلار كەلدى. ونىڭ ءبىرى امەريكا قۇراما شتاتتارىنان بولسا، ەكىنشىسى رەسەيدەن كەلىپ، جۇمىستارىن اتقارۋدا. سايلاۋ كۇنى جاقىنداعان سايىن باقىلاۋشىلار ءتىزىمى وسەدى» - دەدى مو سايلاۋ كوميسسياسى ءتوراعاسىنىڭ ورىنباسارى يساحان ساعىنبايەۆ.
