ەلباسىنىڭ «100 ناقتى قادام» ۇلت جوسپارىندا مەملەكەتتىك باعدارلامالار اياسىندا شاعىن جانە ورتا كاسىپكەرلىكتىڭ كوكجيەگىن كەڭەيتۋ مىقتاپ تاپسىرىلعانى بەلگىلى. ال ءوندىرىس ورىندارىنىڭ ءورىسىن ورىستەتۋ ءۇشىن بىلىكتى كادرلار قاجەت ەكەنى ايتپاسا دا تۇسىنىكتى. وسى ورايدا  «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى قولداۋدىڭ 2017-2021 جىلدارعا ارنالعان» مەملەكەتتىك   باعدارلاماسىنىڭ تيگىزىپ جاتقان پايداسى وراسان. بۇگىندە جامبىل وبلىسىندا اتالعان باعدارلامانىڭ ەكىنشى باعىتى بويىنشا «باستاۋ بيزنەس» جوباسى نەگىزىندە ءبىر اي وقىتۋ كۋرسىنان ءوتىپ، كاسىبىن دوڭگەلەتىپ وتىرعاندار جەتەرلىك.

اتاپ ايتساق،  ءبىر عانا مال شارۋاشىلىعىمەن اينالىسۋ ءۇشىن بىلتىر1003 ادام شاعىن نەسيە العان. ولارعا بولىنگەن نەسيە قاراجاتىنىڭ كولەمى 4 ميلليارد 111 ميلليون تەڭگەنى قۇراعان. وبلىس اكىمدىگى اۋىل شارۋاشىلىعى باسقارماسى باسشىسىنىڭ ورىنباسارى قايرات امانوۆتىڭ ايتۋىنشا، بيىل دا وقۋ كۋرسىنان ءوتىپ، مال شارۋاشىلىعىمەن اينالىسقىسى كەلگەن 1020 اۋىل تۇرعىنىنا وسى كولەمدە قارجى  بولىنبەك  ەكەن.

– باعدارلامانىڭ ماقساتى – قولىنان ءىس كەلەتىن اۋىل تۇرعىندارىنا جان-جاقتى قولداۋ كورسەتۋ. مونوقالالاردا مال اسىراپ، بورداقىلاۋمەن اينالىسقىسى كەلەتىن ادامدار دا وسى باعدارلامانىڭ ءتيىستى باعىتى ارقىلى وقىپ، قارجىلاي نەسيە الا الادى. بۇل بۇگىنگىدەي ەڭبەك نارىعىندا ءاربىر ادامنىڭ ءوز الەۋەتىن ىسكە اسىرا الۋىنا بەرىلىپ جاتقان زور مۇمكىندىك. ولار مال شارۋاشىلىعىمەن اينالىسىپ، تاسى ورگە دومالاسا وزگەنى دە جۇمىسپەن قامتيتىنى انىق. بيىل وسى باعىتتا بولىنگەن نەسيە قاراجاتىنىڭ 2 ميلليارد 466،6  ميلليون تەڭگەسى «اۋىل شارۋاشىلىعىن قارجىلاي قولداۋ قورى» اكسيونەرلىك قوعامىنىڭ وبلىستىق فيليالى، ال 1 644،4 ميلليون تەڭگەسى «اگرارلىق نەسيە كورپوراسياسى» اكسيونەرلىك قوعامىنىڭ وبلىستىق فيليالى ارقىلى بەرىلەدى. سونىمەن قاتار  اعىمداعى جىلى رەسپۋبليكالىق بيۋدجەتتەن قوسىمشا 1ميلليارد تەڭگە بولىنگەنىن ايتا كەتكىم كەلەدى، – دەيدى قايرات تىلەۋباي ۇلى.

تاعى ءبىر جاعىمدى جاڭالىق، «اۋىل شارۋاشىلىعىن قارجىلاي قولداۋ قورى» اكسيونەرلىك قوعامىنىڭ وبلىستىق فيليالىنىڭ نەسيە ءبولىمىنىڭ باسشىسى باۋىرجان تاجىبايەۆ  اتالمىش  قور شارۋالاردى ەشقانداي ەكىنشى دەڭگەيلى بانك نەمەسە نەسيە سەرىكتەرىنسىز وزدەرى تىكەلەي قارجىلاندىراتىن، اۋىلدىق جەردەگى كەز-كەلگەن ءۇي، اۋلاسىنداعى 5-10 تۇياعىنا  سالىنعان قورا-جايدىڭ بارلىعىن  كەپىلگە قوياتىن مۇلىك رەتىندە جارايتىن، ونىڭ قۇنىن تاۋەلسىز باعالاۋشىلار ەسەپتەپ بەرەتىنىن تەتىك تاۋىپ وتىر.

ءيا، بۇل ءسوز جوق، جانعا جىلۋ بەرەتىن جاڭالىق. ەندى باعدارلاما اياسىندا شارۋالار ءوز تىرلىكتەرىن تىكتەپ عانا قويماي، قورا-جايلارىنا دەيىن كەپىلدىككە قويىپ نەسيە الا الادى. ال بۇل دەگەنىڭىز، ءار اۋىلدىق جەردەن جۇزدەگەن شاعىن جانە ورتا بيزنەس سۋبەكتىلەرى اشىلادى دەگەن ءسوز. ودان وبلىستىڭ ەكونوميكاسى تاعى قارىشتاپ  دامي تۇسەتىنى داۋسىز.

جايدار ازامات