ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىندا تۋعان جەردى تۇلەتۋ تۋرالى تاعىلىمدى ويلار ايتىلعانى بەلگىلى. ءتىپتى، «تۋعان جەر» جوباسى دا قولعا الىنىپ، ەلىمىزدىڭ اۋماعىندا اۋقىمدى ىستەر اتقارىلۋدا. بۇل تۇرعىدا جامبىلدىق كاسىپكەرلەر دە اۋليەاتا ءوڭىرىن دامىتۋعا وزىندىك ۇلەستەرىن قوسىپ جاتىر.

-«تۋعان جەر» جوباسىنىڭ ەرەكشەلىگى – ونى جۇزەگە اسىرۋعا وڭىرلەردى دە بەلسەندى تارتۋىندا بولىپ تۇر. وبلىستار، شاعىن قالالار، اۋدان، قالا بەردى ءاربىر ەلدى مەكەندى كوركەيتۋگە  ۇمتىلۋدا. بۇل رەتتە كاسىپكەردىڭ، مەساناتتاردىڭ ازاماتتىق بەلسەندىلىگى بىزگە كوپ كومەگىن تيگىزىپ وتىرعانىن ايتقان ءجون. تۋعان جەرگە، ونىڭ مادەنيەتىنە، سالت-داستۇرىنە دەگەن سۇيىسپەنشىلىك ارقىلى كورسەتىلەتىن پاتريوتيزم – ۇلتتىق-گەنەتيكالىق كودتىڭ نەگىزى.

بىلتىر اتالعان «تۋعان جەر» جوباسى اياسىندا قازاقستان رەسپۋبليكاسىنىڭ سپورت شەبەرى، ايەلدەر اراسىندا بوكستان كاسىپقوي الەم چەمپيونى فيرۋزا شاريپوۆا ءوز باستاماسىمەن ەكى مۇمكىندىگى شەكتەۋلى  بالا تاربيەلەپ وتىرعان جولدىبايەۆتار جانۇياسىنا اۆتوكولىك سىيلادى. سونداي-اق ۇلتتىق قۇندىلىقتارىمىزدى جاڭعىرتۋ ماقساتىندا «شاۋشەن» شارۋا قوجالىعىنىڭ باسشىسى سايرامباي دونەنبايەۆتىڭ دەمەۋشىلىگىمەن  شاھاردا «عيبرات» ورتالىعى اشىلدى،-دەيدى تاراز قالاسىنىڭ اكىمى قايرات دوسايەۆ.

وسىنداي يگى باستامالاردىڭ جالعاسى رەتىندە «ارايسترويماركەت» جاۋاپكەرشىلىگى شەكتەۋلى سەرىكتەستىگىنىڭ ديرەكتورى  ارمان ەدىلبايەۆ، «التايس گرۋپپ» جاۋاپكەرشىلىگى شەكتەۋلى سەرىكتەستىگىنىڭ ديرەكتورى الىمبەك جۇمابايەۆ تاراز قالاسىنىڭ تۇرعىندارى – تۇرعانوۆتار جانە ابىلباشيروۆتەردىڭ وتباسىنا پاتەر كىلتتەرىن تابىس ەتكەن.

ال، 2017 جىلى «كازفوسفات» ءجشس-نىڭ باس ديرەكتورى، قازاقستاننىڭ ەڭبەك ەرى مۇقاش ەسكەندىروۆ ءوز قاراجاتىنا «مىڭبۇلاق» شاعىن اۋدانىندا امبەباپ زاماناۋي سپورتتىق الاڭشاسىن سالىپ بەردى. سپورتتىق الاڭشادا ءبىر مەزگىلدە  25 بالا سپورتتىڭ ۆولەيبول، باسكەتبول، شاعىن فۋتبول ويناۋعا جاعداي جاسالعان. مۇنداي يگى باستامالارعا ءۇن قوسىپ جۇرەتىن مەساناتتار قاتارىندا قالالىق ءماسليحاتتىڭ دەپۋتاتى رۋسلان كاندا بار. ول «سامال» شاعىن اۋدانىندا 25 جانە 30 ۇيلەردىڭ اۋلاسىنا بەينەكامەرالاردى ورناتىپ بەردى.

سونداي-اق تاراز يننوۆاسيالىق-گۋمانيتارلىق ۋنيۆەرسيتەتىنىڭ رەكتورى ەربولات ساۋرىقوۆ 12 تالاپكەرگە، ونىڭ ىشىندە تاراز فۋتبول كلۋبىنىڭ  قوسالقى قۇرامىنىڭ 9 فۋتبولشىسىنا، 3 مۇمكىندىگى شەكتەۋلى ازاماتتارعا تەگىن وقۋ گرانتىن تاعايىندادى. ايتا كەتۋ كەرەك، وزگە كاسىپكەرلەر دە يگىلىكتى ىستەن قالىس قالىپ جاتقان جوق.

باقىت جالعاس