«رۋحاني جاڭعىرۋ» باعدارلاماسى اياسىندا جامبىل وبلىسىندا قايىرىمدىلىق شارالارىنا دا باسا ءمان بەرىلىپ، تۇرمىسى تومەن وتاسىلارعا كومەك كورسەتىلۋدە. بۇل ىسكە جەرگىلىكتى جەردەگى ىسكەر ازاماتتار دا ءوز ۇلەستەرىن قوسىپ جاتىر. مىسالى،  «عىلىمي-كلينيكالىق كارديوحيرۋرگيا  جانە ترانسپلانتولوگيا ورتالىعىنىڭ» باسشىسى سەيىتحان جوشىبايەۆ 7 638  ميلليون تەڭگەگە 3 800 تۇرعىندى تەگىن دارىگەرلىك تەكسەرۋدەن وتكىزسە، «جاسۇلان ي ك» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ج. وماروۆا  از قامتاماسىز ەتىلگەن ءبىر وتباسىنىڭ  بالاسىنىڭ جوعارى وقۋ ورىنداعى 5 جىلدىق وقۋ اقىسىن تولەپ بەردى.

ء-بىزدىڭ ارامىزدا مۇقتاج جاندارعا قولۇشىن سوزىپ، كومەك كورسەتىپ تۇراتىن ناعىز ازاماتتاردىڭ بارى، ارينە، قۋانتاتىنى ءسوزسىز. وسىعان وراي، يگى ىستەردىڭ باسىندا جۇرگەن ازاماتتار بىلتىر تامىز ايىندا قالالىق مادەنيەت ۇيىندە «جومارت جۇرەك» سىيلىعىنىڭ لاۋرەاتى اتانىپ، سالتاناتتى جاعدايدا ماراپاتالدى.  وسى جيىندا «باتىل جۇرەك» اتالىمىن قالالىق ىشكى ىستەر دەپارتامەنتىنىڭ جەرگىلىكتى پوليسيا قىزمەتىنىڭ جول قاۋىپسىزدىگى پوليسياسىنىڭ اعا لەيتەنانتى سامات الاشيەۆ، الەۋمەتتىك ماڭىزى بار، قايىرىمدىلىق جوبالاردى جانە اكسيالاردى ءتيىمدى جۇزەگە اسىرعانى ءۇشىن، قايىرىمدىلىق كومەك بەرۋدىڭ جاڭا ءتيىمدى تۇرلەرىن ەنگىزگەن، قوعامدىق ماڭىزى بار شارالارعا باس دەمەۋشىلىك جاساعان «مۇگەدەك جاستار قوعامى» قوعامدىق بىرلەستىگىنىڭ ءتوراعاسى رۋسلان تولەگەنوۆ «جىلدىڭ ۇزدىك ۇيىمى» اتالىمىن يەلەندى. بەلسەندى ازاماتتىق ۇستانىمى، ءارتۇرلى باعىتتاعى كەڭ اۋقىمدى قايىرىمدىلىق قىزمەتتى جۇزەگە اسىرعانى ءۇشىن  «جىل تۇلعاسى» اتالىمىنىڭ سىيلىعى «لوگيتەح» جاۋاپكەرشىلىگى شەكتەۋلى سەرىكتەستىگىنىڭ ديرەكتورى انتون سكراموۆسكييگە تابىستالدى. ول «ءقاۋىپسىز مەكتەپ» پيلوتتىق جوباسى بويىنشا  ا. پۋشكين اتىنداعى № 41 كوپسالالىق گيمنازياسىنا 4 ميلليون 436 مىڭ تەڭگەگە  4 تۋرنيكەت ورناتىپ بەرگەن بولاتىن،-دەيدى تاراز قالاسىنىڭ اكىمى قايرات دوسايەۆ.

بىلتىر «دوستىق» ۇيىندە تاراز قالاسى جانە تۇركىستان وبلىسى كاسىپكەرلەرىنىڭ قاتىسۋىمەن «تارازدىڭ تۇرلەنۋى» اتتى ىسكەرلىك-ارىپتەستىك فورۋم وتكەنى بەلگىلى. اۋقىمدى جوبالار اياسىندا مادەني-ىسكەرلىك ورتالىق پەن «شاحريستان»، «كونە تاراز»، تەكتۇرماس كەشەندەرىنىڭ تانىستىرىلىمى ءوتتى. سونداي-اق، كوممەرسيالىق نىسانداردىڭ قۇرىلىسىن جۇرگىزۋگە نيەت بىلدىرگەن كاسىپكەرلەر 800 ميلليون تەڭگەگە  مەموراندۋمىنا قول قويدى.

باقىت جالعاس