ق ر تۇڭعىش پرەزيدەنتى ن.ءا.نازاربايەۆ ۇسىنعان «100 ناقتى قادام» ۇلت جوسپارىندا زاڭنىڭ ۇستەمدىگىن قامتاماسىز ەتۋگە باسا ءمان بەرىلگەنى بەلگىلى. بۇل تۇرعىدا سوت جۇيەسىن ودان ءارى جەتىلدىرۋ بويىنشا دا ناقتى مىندەتتەر جۇكتەلدى.  ايتۋ كەرەك، ەلىمىزدىڭ سوت جۇيەسىندە جۇرگىزىلىپ جاتقان رەفورمالاردىڭ ناتيجەسىندە وركەنيەتى وزىق ەلدەردىڭ تاجىريبەسى قولدانىسقا ەنگىزلىپ، سوتتارعا تولىققاندى جاعداي جاسالۋمەن قاتار، كاسىبي سوت جۇيەسىن دامىتۋ، ولاردىڭ قوعام الدىندا اشىقتىعى مەن قولجەتىمدىلىگى قامتاماسىز ەتۋ قولعا الىندى. ازاماتتاردىڭ قۇقىقتارى مەن بوستاندىقتارىنا زاڭمەن كەپىلدىك بەرىلىپ، سوتتىڭ تاۋەلسىز جانە ءادىل بولۋىنا جول اشىلدى.

جامبىل وبلىستىق سوت عيماراتىندا وبلىستىق سوتتىڭ ءتوراعاسى رۇستەم مىرزاكارىم، وبلىستىق سوت سۋديالارى، قالالىق جانە وعان تەڭەستىرىلگەن سۋديالاردىڭ قاتىسۋىمەن م.ح.دۋلاتي تىنداعى تاراز مەملەكەتتىك ۋنيۆەرسيتەتى زاڭ فاكۋلتەتىنىڭ 3-4 كۋرس ستۋدەنتتەرى اراسىندا وتكىزىلگەن دارىستە جوعارىدا اتالعان، ياعني زاڭنىڭ ۇستەمدىك قۇرۋىنا نەگىز بولعان بەس ينستيتۋتتىق رەفورماعا قاتىستى سوت جۇيەسىندەگى جاڭاشىلدىقتار اڭگىمەگە ارقاۋ بولدى. جالپى، سوت قىزمەتكەرلەرىنىڭ ستۋدەنتتەرمەن كەزدەسۋ وتكىزىپ، ولارعا ءدارىس وقۋداعى باستى ماقسات – جاستارعا ەلىمىزدىڭ سوت جۇيەسىنە ەنگىزىلگەن رەفورمالاردىڭ قالاي جۇزەگە اسىرىلىپ جاتقانىن تانىستىرۋ، ەلباسى نۇرسۇلتان ءابىش ۇلى نازاربايەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا اتاپ كورسەتىلگەن سوت جۇيەسىن ودان ءارى جاڭعىرتۋدىڭ ىسكە اسىرىلۋىن ءتۇسىندىرۋ.

ءدارىس بارىسىندا رۇستەم مىرزاكارىم ۇلى ستۋدەنتتەردىڭ نازارىن سوت جۇيەسىن جاڭعىرتۋعا، ازاماتتاردىڭ سوت تورەلىگىنە قولجەتىمدىلىگىن قامتاماسىز ەتۋگە، تاتۋلاستىرۋ ءراسىمىنىڭ قولدانىس اياسىن كەڭەيتۋگە، سوت ءىسىنىڭ مامانداندىرىلۋى مەن سيفرلاندىرىلۋىنا اۋداردى. سوت جۇيەسىن جەتىلدىرۋدىڭ وسى باعىتتارى «سوت تورەلىگىنىڭ جەتى تاسى» اتتى باسىم جوبالاردىڭ پورتفەلىن جۇزەگە اسىرۋ اياسىندا جەكە پيلوتتىق جوبالاردى ەنگىزۋ ارقىلى جۇزەگە اسىرىلىپ جاتقانىن ءسوز ەتتى.

بۇدان كەيىن ءسوز العان وبلىستىق سوتتىڭ سۋديالارى گۇلنار اسىلبەك پەن دينارا نۇرلىبايەۆا «وتباسىلىق سوت» پيلوتتىق جوباسىن ىسكە اسىرۋداعى وزەكتى ماسەلەلەرمەن جانە بىتىمگەرلىك راسىمدەردى قولدانۋدىڭ جاي-جاپسارىن اڭگىمەلەدى. «وتباسىلىق سوت» پيلوتتىق جوباسى وتباسى قۇندىلىقتارىن ساقتاۋدى، وتباسىلىق داۋلاردى مەيلىنشە تاتۋلاستىرۋ راسىمدەرىن قولدانا وتىرىپ بىتىمگەرشىلىكپەن شەشۋدى، بالالاردىڭ تولىققاندى وتباسىندا تاربيەلەنۋىن، مەيىرىمدىلىك، ىزگىلىك سەكىلدى قاسيەتتەر وتباسىنان باستاۋ الاتىنىن تىلگە تيەك ەتتى. ستۋدەنتتەر «تۇنگى سوت» پيلوتتىق جوباسىنىڭ  ماقساتى مەن مىندەتتەرىنە تاراز قالالىق مامانداندىرىلعان اكىمشىلىك سوتىنىڭ ءتوراعاسى بەرىك ورازىمبەتوۆتىڭ ءدارىسى ارقىلى قانىقتى. وبلىس بويىنشا سوتتار اكىمشىسى باسشىسىنىڭ ورىنباسارى گۋزال تۇردىيەۆا، اقپاراتتىق تەحنولوگيالار جانە اقپاراتتىق رەسۋرستاردى قورعاۋ ءبولىمىنىڭ باسشىسى مۋحيتدين رايىمبەكوۆ سوتتارداعى اقپاراتتىق تەحنولوگيالاردىڭ مۇمكىندىكتەرى جايلى ايتىپ بەردى.

شارا سوڭىندا ستۋدەنتتەرگە تاراز قالالىق سوتىنىڭ قىزمەتكەرلەرى تاراپىنان قويىلعان كورنەكتى سوت پروسەسى كورسەتىلىپ، سوت زالدارىنا ەكسكۋرسيا جاسالدى.  

باقىت جالعاس