ەلباسىنىڭ باعدارلامالىق ماقالاسىندا العا قويىلعان ماقساتتار مەن مىندەتتەر نەگىزىندە جامبىل وبلىسىندا ءىرى جوبالار مەن باستامالار قولعا الىنىپ، وڭ ناتيجەسىن بەرۋدە. بۇل تۋرالى «جامبىل وبلىسىنىڭ «رۋحاني جاڭعىرۋ» جوبالىق ءوفيسى» مەكەمەسىنىڭ باسشىسى سەرىكبول بەرىكقوجا اڭگىمەلەپ بەردى.

– 2017-2018 جىلى جالپى كولەمى 2،5 ميلليارد تەڭگەگە بارلىعى 230 جوبا جۇزەگە اسىرىلىپ، وعان 620 مىڭ ادام قامتىلدى. قازىرگى تاڭدا، وبلىس اۋماعىندا تۇراقتى تۇردە مونيتورينگ جۇرگىزۋ قولعا الىنعان. جۇرگىزىلگەن مونيتورينگتىڭ قورىتىندىسى بويىنشا ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىن حالىقتىڭ 96 پايىزى بىلەتىنىن جانە اتالمىش باعدارلاماعا قاتىسى بار ەكەنىن جەتكىزگەن،- دەيدى سەرىكبول بەرىكقوجا.

ال «قازاقستاننىڭ كيەلى جەرلەرىنىڭ گەوگرافياسى» بازالىق باعىتى بويىنشا قازاقستاننىڭ كيەلى جەرلەرى كارتاسىنىڭ تىزىمىنە وبلىسىمىزدان 35 تاريحي-مادەني نىسان، ونىڭ ىشىندە 8 جالپىۇلتتىق نىسان، 27 نىسان وڭىرلىك دەڭگەيدە ەنگىزىلدى. اتاپ ايتار بولسام، مەركى-جايسان تۇركى عۇرىپتىق كەشەنى، اقىرتاس بەكىنىسى (VIII-IX عع.)، «ەجەلگى تاراز قالاشىعى» (ءى-حىح عع.)، «تەكتۇرماس» كەسەنەسى (ءحىV ع.)، «قاراحان» كەسەنەسى (ءحىى ع.)، «ايشا ءبيبى» كەسەنەسى (ءحى-حىى عع.)، «باباجى حاتۋن» كەسەنەسى (ءحى-حىى عع.)، «بايزاق باتىر مامبەت ۇلى» كەسەنەسى. بارلىق 35 نىساننىڭ GPS كوورديناتتارى جاسالىپ، نىساندارعا قولجەتىمدىلىك تولىقتاي قامتاماسىز ەتىلگەن. بۇل نىساندار تاراز قالاسىنىڭ 44 تۋريستىك مەكەمەلەرى مارشرۋتتارىنا ەنگىزىلىپ، ەلىمىز بەن الىس-جاقىن شەتەلدەردەن كەلگەن تۋريستەرگە تانىستىرىلۋدا. كيەلى جەرلەردىڭ كارتاسىنا ەنگەن 8 جالپىۇلتتىق نىسانداردىڭ تاريحى تۋرالى ارنايى دەرەكتى فيلمدەر ءتۇسىرىلىپ، كوپشىلىك نازارىنا ۇسىنىلعان بولاتىن. بۇل دەرەكتى فيلمدەردى الەۋمەتتىك جەلىدەگى پاراقشالاردان دا كورۋگە بولادى. سونىمەن قاتار اتالمىش نىساندارعا باراتىن جولدار جوندەلىپ، ونداعى ينفراقۇرىلىمدار مەن قىزمەت كورسەتۋ ساپاسى جاقسارتىلدى.

-قازىرگى تاڭدا وبلىس اكىمدىگىنىڭ تۋريزم باسقارماسىمەن بىرلەسە وتىرىپ ءىس-شارالار ۇيىمداستىرۋدى تۇراقتى تۇردە قولعا الىپ وتىرمىز.

توقتالىپ وتەتىن بولسام، الماتى، تۇركىستان جانە جامبىل وبلىستارىنىڭ ورتا مەكتەپتەرى مەن كوللەدجدەرىنەن 500-دەن اسا وقۋشىلار مەن ستۋدەنتتەر قاتىسقان. «تاراز جەرىنە تاعزىم» اتتى جاس تۋريستەر فەستيۆالىن وتكىزدىك. فەستيۆال اياسىندا تاراز قالاسىنىڭ جانە جاقىن ورنالاسقان اۋداندارىنىڭ تاريحي-مادەني نىساندارى مەن كورىكتى جەرلەرىنە ەكسكۋرسيالىق تۋرلار ۇيىمداستىرىلدى،-دەيدى س.بەرىكقوجا.

باقىت جالعاس