«رۋحاني جاڭعىرۋ» باعدارلاماسى اياسىندا اۋليەاتا وڭىرىندە اۋىز تولتىرىپ ايتارلىقتاي اۋقىمدى جوبالار جاندانۋدا. اسىرەسە، «تۋعان جەر» جوباسىنىڭ تيگىزىپ جاتقان شاراپاتى مول.

 -«وتان وتباسىنان باستالادى» دەيدى دانا حالقىمىز. ياعني، وتاندى ءسۇيۋدىڭ ىرگەتاسى الدىمەن تۋعان جەرگە، كىندىك قانىڭ تامعان جەرگە دەگەن سۇيىسپەنشىلىكتەن قالانادى. ءار ادامنىڭ ءوزىنىڭ شىعۋ تەگى مەن تامىرى تەرەڭگە جايىلعان تۋعان ولكەسى بار. مىنە، وسى نەگىزدە باعدارلامانىڭ «تۋعان جەر» جوباسىنىڭ «اتامەكەن» كىشى باعدارلاماسى بار.

قازاق ءار ۋاقىتتا بارىن جاقسىلىققا، قۋانىشقا شاشۋدى جاقسى كورەتىن، قانى تەكتىلىكتە جاتقان حالىقپىز عوي. سول سەبەپتى بۇل باعىتتىڭ جاقسى دامىپ كەلە جاتقانىن قۋانىشپەن ايتۋعا بولادى. زيالىلىقتىڭ ءبىرىنشى شارتى ادامنىڭ تۋعان جەرگە، حالىققا جانە ۇلت بولاشاعىنا دەگەن شىنايى جاناشىرلىعىنان باستاۋ الماق،- «جامبىل وبلىسىنىڭ «رۋحاني جاڭعىرۋ» جوبالىق ءوفيسى» مەكەمەسى قوعاممەن بايلانىس ءبولىمىنىڭ مەڭگەرۋشىسى اسحات ولجاباي.

اتالمىش جوبانى اۋليەاتا وڭىرىندە  جۇزەگە اسىرۋدا ەكى جىلدىڭ ىشىندە ءبىرقاتار جۇمىستار اتقارىلعان. جالپى، سوماسى 2 ميلليارد تەڭگە كولەمىندە 129 جوبا، 13 ءىس-شارا ۇيىمداستىرىلىپتى.

ال اعىمداعى جىلى وسى ۋاقىتقا دەيىن دەمەۋشىلىك جانە مەسەناتتىق كومەكتەر ەسەبىنەن 765 ميلليون تەڭگەگە 29 جوبا جۇزەگە اسىرىلدى. مىسالى، تاراز قالاسىنداعى «اتشابار» سكۆەرى جاڭعىرتىلىپ، «جاستار اللەياسى» دەپ قالا يگىلىگىنە قايتا بەرىلدى. قورداي، ت.رىسقۇلوۆ، جۋالى اۋداندارىندا از قامتىلعان جانە كوپبالالى وتباسىلارعا تۇرعىن ۇيلەر بەرىلسە، تالاس اۋدانىندا جول اباتتاندىرىلىپ، كوشەلەر جارىقتاندارىلدى. مۇنىڭ بارلىعى كاسىپكەرلەر مەن قالتالى ازاماتتاردىڭ ءوز تۋعان جەرىنە تۋىن تىگۋى دەپ ەسەپتەۋگە بولادى.

 جىل سوڭىنا دەيىن جالپى سوماسى 1،4 ميلليارد تەڭگە قاراستىرىلعان بارلىعى 29 جوبانى جۇزەگە اسىرۋ جوسپارلانۋدا. «ۇلى دالانىڭ جەتى قىرى» ماقالاسىنىڭ «ۇلى دالانىڭ ەجەلگى ونەر جانە تەحنولوگيالار مۋزەيى» ارنايى جوباسى اياسىندا وزىق ونەر مەن تەحنولوگيا ۇلگىلەرى نەگىزىندە مۋزەيلەر، ونەر جانە مادەنيەت ورتالىقتارىن قازىرگى زامانعى تالاپقا ساي جۇيەگە كەلتىرۋ كوزدەلگەن. وسى باعىتتا وبلىس اكىمى اسقار مىرزاحمەتوۆتىڭ باستاماسىمەن «شاحريستان» ەتنو-مادەني كەشەنىندە «ولكەتانۋ» مۋزەيى، «قولونەر شەبەرلەر»، «رۋحانيات» ورتالىقتارىنىڭ قۇرىلىسى باستالعالى وتىر.

باقىت جالعاس