ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىندا «گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىنىڭ جۇزەگە اساتىندىعى جازىلعان ەدى. بۇل باستاما بۇگىندە ءوز باعدارىن تاۋىپ، جەمىسىن بەرۋدە.

ايتا كەتۋ كەرەك، باعدارلامانىڭ «100 جاڭا وقۋلىق» جوباسىنىڭ نەگىزگى ماقساتى – مەملەكەتتىك تىلدە گۋمانيتارلىق ءبىلىم باعىتتارى بويىنشا ستۋدەنتتەردىڭ تولىققاندى ءبىلىم الۋى ءۇشىن جاعدايلار جاساۋ، الەمنىڭ وزىق وقۋلىقتارىن ءتۇپنۇسقادان قازاق تىلىنە اۋدارۋ. بۇگىنگى تاڭدا جامبىل وبلىسىنا جوبا اياسىندا اۋدارىلعان 19 كىتاپتىڭ 7000-عا جۋىق داناسى  كەلىپ ءتۇستى.

اتالعان كىتاپتار وبلىستىق، قالالىق جانە اۋداندىق جانە جوعارى وقۋ ورىندارىنىڭ كىتاپحانالارىنا ۇلەستىرىلىپ بەرىلدى. قازىرگى تاڭدا كىتاپتاردىڭ ەلەكتروندى ۇلگىلەرى ازىرلەنىپ، ينتەرنەت جەلىلەرىنە ورنالاستىرىلعان. جوبالىق وفيس كىتاپتاردىڭ QR-كودتارى بەدەرلەنگەن ارنايى تاقتايشالار ازىرلەپ، تاراز قالاسى مەن اۋدان ورتالىقتارىندا ادام كوپ شوعىرلاناتىن ورىندارعا ورنالاستىرۋدى قولعا الۋدا.

سونىمەن قاتار جوبالىق وفيس م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ قولداۋىمەن ءار اپتا سايىن ءبىر كىتاپتى تانىستىرىپ كەلەدى. وسى جىلى 30 كىتاپ اۋدارىلىپ، وقىرمانعا تانىستىرىلادى دەپ جوسپارلانۋدا.

سونداي-اق ايماقتا لاتىن الىپبيىنە كەزەڭ-كەزەڭىمەن كوشۋ بويىنشا دا جوسپارلى  جۇمىستار جۇرگىزىلۋدە.

– ق ر پرەمەر-مينيسترىنىڭ 2018 جىلعى 13 ناۋرىزداعى №27 وكىمىمەن قازاق ءتىلى ءالىپبيىن لاتىن گرافيكاسىنا 2025 جىلعا دەيىن كەزەڭ-كەزەڭىمەن كوشىرۋ جونىندەگى ءىس-شارالار جوسپارى بەكىتىلگەن. وسىعان سايكەس وبلىستىق ءىس-شارالار جوسپارى ازىرلەنىپ، جۇيەلى جۇمىستار جولعا قويىلعان.

جاڭا قازاق ءالىپبيىن ءوڭىر تۇرعىندارىنا كەڭىنەن ءتۇسىندىرۋ ماقساتىندا ارنايى بەينەروليك ازىرلەنىپ، ءاقپاراتتىق-تۇسىندىرۋ جۇمىستارىندا پايدالانۋ ءۇشىن ءتيىستى مەملەكەتتىك ورگاندارعا جولداندى.

م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ جانىنان لاتىن ءالىپبيىن ۇيرەتۋ وقۋ-ادىستەمەلىك كابينەتى، تاراز مەملەكەتتىك پەداگوگيكالىق ۋنيۆەرسيتەتىندە «قازاق فيلولوگياسى جانە لاتىن گرافيكاسىن وقىتۋ ادىستەمەسى» كافەدراسى، وبلىس اكىمدىگىنىڭ تىلدەردى دامىتۋ باسقارماسىنىڭ تىلدەردى وقىتۋ ورتالىعىندا «رۋحاني جاڭعىرۋ: لاتىن ءالىپبيى» كابينەتى اشىلىپ، لاتىن نەگىزدى قازاق الىپبيىنە كوشۋ جونىندە وبلىس تۇرعىندارىنا ادىستەمەلىك كومەكتەر كورسەتىلدى،-دەيدى «جامبىل وبلىسىنىڭ «رۋحاني جاڭعىرۋ» جوبالىق ءوفيسى» مەكەمەسىنىڭ ديرەكتورى سەرىكبول بەرىكقوجا.

لاتىن گرافيكاسىنا نەگىزدەلگەن قازاق جازۋىن ءتۇسىندىرۋ، ازاماتتاردىڭ جاڭا ءالىپبيدى ۇيرەنۋلەرىنە مۇمكىندىكتەر جاساۋ ماقساتىندا وبلىستىق تىلدەردى دامىتۋ باسقارماسى تاراپىنان 4 الەۋمەتتىك جوبا اياسىندا 120-دان اسا ءىس-شارا وتكىزىلىپ، وعان 150 مىڭعا جۋىق ادام قامتىلعان. سونداي-اق  بيىلعى جىلى 2 الەۋمەتتىك جوبا جۇزەگە اسىرىلۋدا.

باقىت جالعاس