ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسى اياسىندا جامبىلدا جاڭا مەكەمە پايدا بولدى. جامبىل وبلىسى اكىمدىگىنىڭ قاۋلىسىمەن بيىلعى اقپان ايىندا قۇرىلعان «جامبىل وبلىسىنىڭ «رۋحاني جاڭعىرۋ» جوبالىق ءوفيسى» كوممۋنالدىق مەملەكەتتىك مەكەمەسىنىڭ قۇرامى تولىقتاي جاساقتالدى.  ال، ونىڭ باسشىلىعىنا تاراز قالالىق ءماسليحاتىنىڭ دەپۋتاتى سەرىكبول بەرىكقوجا تاعايىندالدى.

مەكەمە قىزمەتىنىڭ ءمانى قوعامدىق سانانى جاڭعىرتۋمەن تىعىز بايلانىستى. ال ماقساتى – ەلباسى ن.ءا.نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسى مەن «ۇلى دالانىڭ جەتى قىرى» جوباسىنىڭ جۇزەگە اسىرىلۋىن باقىلاۋ. باعدارلامالىق ماقالالار اياسىنداعى بارلىق ارنايى جوبالارى بويىنشا جۇمىس جۇرگىزۋ.

جالپى، مەكەمە جاڭادان قۇرىلعاندىقتان الداعى ۋاقىتتا كوپتەگەن ءىس-شارالار مەن جوبالاردى جۇزەگە اسىرۋ جوسپارلانۋدا. وسى ماقساتتا جوبالىق وفيس باسقارمالارداعى، اۋداندار مەن تاراز قالاسى اكىمدىگىندەگى «رۋحاني جاڭعىرۋ» باعدارلاماسىن ىسكە اسىراتىن جاۋاپتى قىزمەتكەرلەرمەن، ۇكىمەتتىك ەمەس ۇيىمداردىڭ كوشباسشىلارىمەن، بۇقارالىق اقپارات قۇرالدارى مەن قوعام بەلسەندىلەرىمەن كەزدەسۋلەر وتكىزىلىپ، جۇمىستى جۇيەلەۋگە، جانداندىرۋعا قاتىستى كوپتەگەن ۇسىنىستار جينالعان.

باستى ماڭىزدى جوبالارعا توقتالىپ وتەيىن. الداعى ۋاقىتتا «اۋليەاتا ءۇمىتى» سىيلىعىن ۇيىمداستىرۋدى جوسپارلاپ وتىرمىز. ماقساتىمىز – جاس تالانتتاردىڭ ەڭبەگىن باعالاۋ، ولاردى ىنتالاندىرۋ. جامبىل جەرى داڭقتى دا تالانتتى تۇلعالاردىڭ كىندىك قانى تامعان جەر دەسەك ارتىق ەمەس. مىنە، سول ازاماتتار وزىنەن كەيىنگى ۇرپاققا سەنىم بىلدىرە وتىرىپ، «سەن وسى ءوڭىردىڭ مەنەن كەيىنگى جارىق جۇلدىزى بولۋىڭ ءتيىس» دەگەن ۇرانمەن سىيلىقتى ءوز قولىمەن تابىستاپ، جاستارعا جىگەر بەرەدى دەگەن سەنىمدەمىن. سونىمەن قاتار وبلىسىمىزداعى قايىرىمدى جاندار مەن كاسىپكەرلەردى ىنتالاندىرۋ ماقساتىندا «جومارت جۇرەك» وبلىستىق بايقاۋىن ۇيىمداستىرۋدى دا قولعا الىپ وتىرمىز.

سونداي-اق، «قازاقستاننىڭ ساكرالدى گەوگرافياسى» جوباسى اياسىندا «جايناعان جامبىلىم» اتتى فوتوجيناق باسىپ شىعارۋ، «تۋعان جەرگە تۋىڭدى تىك!» فورۋمىن، «لاتىن ءالىپبيى – رۋحاني تۇتاستىق نەگىزى» اتتى رەسپۋبليكالىق كونفەرەنسيا ۇيىمداستىرۋ كوزدەلۋدە.

وبلىسىمىزداعى اعا بۋىن مەن جاس تولقىننىڭ شىعارماشىلىق  بايلانىسىن نىعايتۋ ماقساتىندا اقىنداردىڭ دۋەلىن، ۇلتىق سپورتتى دامىتۋ ماقساتىندا تەگىن ۇيىرمەلەر مەن ءىس-شارالار ۇيىمداستىرۋدى جوسپارلاپ وتىرمىز. «ۇلى دالانىڭ ۇلى ەسىمدەرى» اتاۋىمەن «سانالى TALKS» ينتەللەكتۋالدى كەشتەرىن، «قوعامدىق لەكسيا» الەۋمەتتىك جوباسىن، «جامبىل جاۋھارلارى» اتاۋىمەن وبلىسىمىزدىڭ تاريحي-مادەني كەشەندەرى مەن تابيعاتىن، كورنەكتى جەرلەرىن دارىپتەۋ ماقساتىندا وبلىستىق فوتو كورمەنى دە قولعا الساق دەگەن جوسپار بار،-دەيدى سەرىكبول بەرىكقوجا.

 باقىت جالعاس