ەلباسىنىڭ  «ۇلى دالانىڭ جەتى قىرى» اتتى ماقالاسىنىڭ «ارحيۆ-2025»، «ۇلى دالانىڭ ۇلى ەسىمدەرى»،  «تۇركى الەمىنىڭ گەنەزيسى»، «ۇلى دالانىڭ ەجەلگى ونەر جانە تەحنولوگيالار مۋزەيى»، «دالا فولكلورى مەن مۋزىكاسىنىڭ مىڭ جىلى»، «تاريحتىڭ كينو ونەرى مەن تەليەۆيزياداعى كورىنىسى» ارنايى جوبالارى اياسىندا جامبىل وبلىسىندا بۇگىنگى كۇنگە دەيىن 67 ءىس-شارا وتكىزىلگەن.  

مىسالى، جاقىندا عانا وبلىس اكىمدىگىنىڭ مادەنيەت، ارحيۆتەر جانە قۇجاتتاما باسقارماسى مەن تاراز مەملەكەتتىك پەداگوگيكالىق ۋنيۆەرسيتەتىنىڭ ۇيىمداستىرۋىمەن «ەرلىككە تاعزىم – ۇرپاققا پارىز» اتتى حالىقارالىق عىلىمي-پراكتيكالىق كونفەرەنسياسى وتكەن.  كونفەرەنسياعا «ارحيۆ-2025» عىلىمي-ادىستەمەلىك ورتالىعىنىڭ باسشىسى بەرىك ءابدىعالي، قر-نىڭ پرەزيدەنتى ءارحيۆىنىڭ جانىنداعى قوعامدىق كەڭەس ءتوراعاسى بوريس جاپاروۆ، قر-نىڭ پرەزيدەنتى ءارحيۆىنىڭ ديرەكتورى ءجاميلا ءابدىقادىروۆا،  پولشا رەسپۋبليكاسىنىڭ گدانسك قالاسىنداعى پومورسك گەنەولوگيالىق قوعامى پرەزيدەنتىنىڭ ورىنباسارى، تەحنيكا عىلىمدارىنىڭ كانديداتى، ولكەتانۋشى ۆويسەح بەششينسكيي جانە وزگە دە وڭىرلەردىڭ ارحيۆ باسشىلارى مەن ماماندارى قاتىستى.

ماقالا تاريحتى كينو مەن تەليەۆيزيا ارقىلى تانىتۋ جونىندە دە ءبىراز دۇنيە ايتىلعانى بەلگىلى. راسىندا دا، كينو ءبىر ۇلتتىڭ مادەنيەتى مەن تاريحىن، ءسالت-داستۇرى مەن ۇلتتىق يدەياسىن كورسەتەتىن قۇرال.

باعدارلامانىڭ «تاريحتىڭ كينو ونەرى مەن تەليەۆيزياداعى كورىنىسى» ارنايى جوباسىنىڭ نەگىزگى ماقساتى دا قازاقستاننىڭ وركەنيەت تاريحىنىڭ ۇزدىكسىز دامۋىن كورسەتەتىن دەرەكتى جانە قىسقا مەتراجدى فيلمدەرىن وندىرىسكە ەنگىزۋ.

بۇل ارنايى جوبا اياسىندا قازاقستان جازۋشىلارىنىڭ ەڭبەكتەرىنىڭ نەگىزىندە تاريحي فيلمدەردى ءتۇسىرۋ جانە شىعارماشىل جاستاردى كينو الەمىنە تارتۋ، ۇزدىك سەنارييلەردى جازۋعا ىنتالاندىرۋ باعىتتارىندا اۋليەاتا وڭىرىندە دە جۇيەلى جۇمىس اتقارىلۋدا. الداعى جوسپارلار دا اۋقىمدى.

-بيىلعى جىلدىڭ اۋقىمدى ءىس-شارالارىنىڭ جوسپارىمەن بولىسەتىن بولسام، اعىمداعى جىلدىڭ ماۋسىم ايىندا وبلىس اكىمدىگىنىڭ مادەنيەت، ارحيۆتەر جانە قۇجاتتاما باسقارماسىنىڭ ۇيىمداستىرۋىمەن جاستار اراسىنداعى «ۇزدىك سەنارييلەر»، «جالىندى جاستىق شاق» بەينەروليكتەر بايقاۋىن، مەركى اۋدانى اكىمدىگىنىڭ ۇيىمداستىرۋىمەن مەركى، اسپارا قالاشىعى، مەركى-1،2،3،4،10 قورعاندارى مەن ساندىق، قاراقىستاق شاتقالى، بالبال تاستاردىڭ تاريحي-مادەني مۇرالارى تۋرالى دەرەكتى فيلمدەر ءتۇسىرۋ جوسپارلانۋدا. جۋالى اۋانى اكىمدىگىنىڭ ۇيىمداستىرۋىمەن شەرحان مۇرتازا اتامىزدىڭ «قىزىل جەبە» رومانى جەلىسىندە ت.رىسقۇلوۆ تۋرالى قىسقا مەتراجدى فيلم ءتۇسىرۋ دە جوسپاردا بار،-دەيدى «جامبىل وبلىسىنىڭ «رۋحاني جاڭعىرۋ» جوبالىق ءوفيسى» مەكەمەسىنىڭ باسشىسى سەرىكبول بەرىكقوجا.

باقىت جالعاس