ەلباسى ن.نازاربايەۆ 2018 جىلعى 5 قازانداعى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىندا اۋىلدىق اۋماقتاردىڭ الەۋمەتتىك ورتاسىن جاڭعىرتۋ جانە اۋىلدىق جەرلەردە ەڭبەك يدەولوگياسىن ىلگەرىلەتۋ مىندەتتەرىن العا قويىپ، وعان قول جەتكىزۋ ءۇشىن «اۋىل – ەل بەسىگى» جوباسىن ىسكە قوسۋدى تاپسىرعان بولاتىن.

جوبا اياسىندا جامبىل وبلىسىندا «قارقىندى باقتار – ءبىزدىڭ بولاشاق» تاقىرىبىمەن  ەلدى مەكەندەردە كوكتەمدە باقتار وتىرعىزۋ، كۇزدە جيناۋ اكسيالارىن ۇيىمداستىرۋىلىپ، باقتاردا «ەكولوگيالىق تازالىق» اكسيالارى وتەتىن بولادى.

سونىمەن قاتار جوبا اياسىندا الدىڭعى ۋاقىتتا اۋىل شارۋاشىلىعى ونىمدەرىن ءوندىرۋ بويىنشا جوعارى كورسەتكىشتەرگە قول جەتكىزگەن ۇزدىك شارۋا قوجالىقتاردى اۋدان جانە وبلىس كولەمىندە انىقتاۋ ماقساتىندا «ۇزدىك فەرمەر» بايقاۋى مەن «100 جاڭا فەرمەر» جوباسىن، «جىل فەرمەرى» رەسپۋبليكالىق كونكۋرسى، اۋىل ەڭبەككەرلەرىنە مەملەكەتتىك ماراپاتتار مەن ءبىرقاتار جەڭىلدىكتەر ەنگىزۋ، اۋىل تاقىرىپتارىندا سەريال، كوركەمدىك جانە دەرەكتى كينوفيلمدەر شىعارۋ جوسپارلانىپ وتىر.

بۇدان بولەك جامبىل وبلىسىندا «رۋحاني جاڭعىرۋ» باعدارلاماسى اياسىنداعى شارالار دا وڭ ناتيجەسىن بەرۋدە. اسىرەسە، ءتۋريزمدى دامىتۋعا ايرىقشا نازار اۋدارىلۋدا.

مىسالى،  «اقىرتاس» ساراي كەشەنىندە «تاراز – وتكەن مەن بولاشاقتىڭ تۇيىسكەن قالاسى» تاريحي-ولكەتانۋ كونفەرەنسياسى ۇيىمداستىرىلدى. كونفەرەنسيادا جاسوسپىرىمدەر ءتۋريزمىن دامىتۋ پەرسپەكتيۆالارى مەن ماسەلەلەرى پلەنارلىق سەسسيالاردا تالقىلانعان. كونفەرەنسياعا وبلىستىڭ بارلىق اۋداندارىنان، تاراز، الماتى، تۇركىستان قالالارىنان، الماتى جانە تۇركىستان وبلىستارىنان 100-گە جۋىق ادام قاتىستى. سونداي-اق جۋالى اۋدانى، بەرىكقارا شاتقالىندا «تيۋلپان – جامبىل وبلىسىنىڭ تابيعي مۇراسى» تاقىرىبىندا عىلىمي-تاجىريبەلىك كونفەرەنسيا ءوتتى.

جالپى باعدارلاما قويعان ناقتى تاپسىرمالار جوعارى دەڭگەيدە ىسكە اسۋدا. بيىل 21 قاڭتاردا جامبىل وبلىسىنىڭ  اكىمى اسقار مىرزاحمەتوۆ بارلىق ارنايى جوبالار قامتىلعان سالاارالىق ءىس-شارالار جوسپارىن بەكىتكەن. جوسپار بويىنشا بارلىعى 83 ءىرى ءىس-شارالار ۇيىمداستىرىلۋى كەرەك. جۇزەگە اسىرىلاتىن ءىس-شارالارعا وبلىستىق بيۋدجەتتەن 304،3 ميلليون تەڭگە قاراجات جۇمساۋ كوزدەلگەن. سونداي-اق جوسپاردان تىس ءىس-شارالار دا تۇراقتى تۇردە وتكىزىلىپ كەلەدى.

باقىت جالعاس