تاراز قالاسىندا ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسىن جۇزەگە اسىرۋ باعىتىندا جامبىل وبلىسىنىڭ اكىمى اسقار مىرزاحمەتوۆتىڭ باسشىلىعىمەن  قارقىندى جۇمىستار اتقارىلۋدا. اتاپ ايتساق، «اتامەكەن»، «تاربيە جانە ءبىلىم»، «رۋحاني قازىنا»، «اقپارات تولقىنى» كىشى باعدارلامالارى مەن «100 جاڭا كىتاپ»، «تۋعان جەر»، «قازاقستان كيەلى جەرلەرىنىڭ گەوگرافياسى»، «100 جاڭا ەسىم» ارنايى جوبالارى بويىنشا اۋقىمدى باستامالار قولعا الىندى. قازاق ءتىلىن لاتىن ءالىپبيى نەگىزىندەگى گرافيكاعا كوشىرۋ ماسەلەسى دە نازاردان تىس قالعان جوق. جالپى، تاراز قالاسىنىڭ اكىمى قايرات دوسايەۆتىڭ ايتۋىنشا، 25 جوبانى ىسكە اسىرۋعا 2 ميلليارد 472 ميلليون 750 مىڭ تەڭگە قارجى جۇمساۋدى قاجەت ەتىپ وتىر. وتكەن جىلى قالا اكىمدىگىنىڭ ەكونوميكا جانە بيۋدجەتتىك جوسپارلاۋ ءبولىمى 9 جوباعا 321 ميلليون 600 مىڭ تەڭگە بولگەن.  ال وبلىستىق جوبالىق وفيسكە «اتامەكەن» كىشى باعدارلاماسى بويىنشا 2 جوبا ۇسىنىلدى. ولاردىڭ جالپى قۇنى 374 ميلليون تەڭگەنى قۇرايدى. اتالعان جوبالار دەمەۋشىلەردىڭ كومەگىمەن جۇزەگە اسىرىلدى. اتاپ ايتقاندا، جەكە كاسىپكەر الىمبەك جۇمابايەۆ تەمىر جول بەكەتى ماڭىنداعى سكۆەردى اباتتاندىرۋعا 150 ميلليون تەڭگەگە كومەك كورسەتسە، «ارايسترويماركەت» ءجشس-نىڭ ديرەكتورى ارمان ەدىلبايەۆ  «اتشابار»  سكۆەرىنىڭ قۇرىلىسىنا 224 ميلليون تەڭگە جۇمسادى. سونىمەن قاتار، « ءبىر ءسابي  – ءبىر اعاش» جوباسى بويىنشا بىلتىر جاڭادان تۋىلعان  سابيلەردىڭ اتا-انالارى 500 ءتۇپ اعاش وتىرعىزسا، بيىلعى جىلى قالا كولەمىندە 6 200 ءتۇپ  شىبىق تىگىلدى. 

  سونىمەن قاتار، وبلىس كولەمىندە ەلباسىنىڭ «تۋعان جەرگە تۋىڭدى تىك!» اكسياسى بويىنشا دا ءبىرقاتار جۇمىستار اتقارىلعان. وتكەن جىلى «تۋعان جەر» جوباسى اياسىندا قازاقستان رەسپۋبليكاسىنىڭ سپورت شەبەرى، ايەلدەر اراسىندا بوكستان كاسىپقوي الەم چەمپيونى فيرۋزا شاريپوۆا ءوز باستاماسىمەن ەكى مۇمكىندىگى شەكتەۋلى  بالا تاربيەلەپ وتىرعان جولدىبايەۆتار وتباسىنا اۆتوكولىك سىيلادى. سونداي-اق، ۇلتتىق قۇندىلىقتارىمىزدى جاڭعىرتۋ ماقساتىندا «شاۋشەن» شارۋا قوجالىعىنىڭ باسشىسى سايرامباي دونەنبايەۆتىڭ دەمەۋشىلىگىمەن تارازدا «عيبرات» ورتالىعى اشىلدى. 1 جەلتوقسان – قازاقستان رەسپۋبليكاسىنىڭ تۇڭعىش پرەزيدەنتى كۇنىنە وراي وسى يگى باستامالاردىڭ جالعاسى رەتىندە «ارايسترويماركەت» جاۋاپكەرشىلىگى شەكتەۋلى سەرىكتەستىگىنىڭ ديرەكتورى  ارمان ەدىلبايەۆ، «التايس گرۋپپ» جاۋاپكەرشىلىگى شەكتەۋلى سەرىكتەستىگىنىڭ ديرەكتورى الىمبەك جۇمابايەۆ تاراز قالاسىنىڭ تۇرعىندارى تۇرعانوۆتار جانە ابىلباشيروۆتەردىڭ وتباسىنا پاتەر كىلتتەرىن تابىس ەتتى. «قازفوسفات» ءجشس-نىڭ باس ديرەكتورى، قازاقستاننىڭ ەڭبەك ەرى مۇقاش ەسكەندىروۆ ءوز قاراجاتىنا «مىڭبۇلاق» شاعىن اۋدانىندا امبەباپ زاماناۋي سپورتتىق الاڭشاسىن سالىپ بەردى. سپورتتىق الاڭشادا ءبىر مەزگىلدە  25 بالا سپورتتىڭ ۆولەيبول، باسكەتبول، شاعىن فۋتبول ويناۋعا جاعداي جاسالعان. مۇنداي يگى باستامالارعا ءۇن قوسىپ جۇرەتىن مەساناتتار قاتارىندا قالالىق ءماسليحاتتىڭ دەپۋتاتى رۋسلان كان دا بار. ول «سامال» شاعىن اۋدانىندا 25 جانە 30 ۇيلەردىڭ اۋلاسىنا بەينەكامەرالاردى ورناتىپ بەرگەن. ال، تاراز يننوۆاسيالىق-گۋمانيتارلىق ۋنيۆەرسيتەتىنىڭ رەكتورى ەربولات ساۋرىقوۆ 12 تالاپكەرگە، ونىڭ ىشىندە تاراز فۋتبول كلۋبىنىڭ  قوسالقى قۇرامىنىڭ 9 فۋتبولشىسىنا، 3 مۇمكىندىگى شەكتەۋلى ازاماتتارعا تەگىن وقۋ گرانتىن تاعايىندادى. بۇدان وزگە «عىلىمي-كلينيكالىق كارديوحيرۋرگيا  جانە ترانسپلانتولوگيا ورتالىعىنىڭ» باسشىسى سەيىتحان جوشىبايەۆ 7 638  ميلليون تەڭگەگە 3 800 تۇرعىندى تەگىن دارىگەرلىك تەكسەرۋدەن وتكىزسە، «جاسۇلان ي ك» جاۋاپكەرشىلىگى شەكتەۋلى سەرىكتەستىگىنىڭ ديرەكتورى جۇماگۇل وماروۆا  از قامتاماسىز ەتىلگەن ءبىر وتباسىنىڭ  بالاسىنىڭ جوعارى وقۋ ورنىنداعى 5 جىلدىق وقۋ اقىسىن تولەپ بەردى.

دۋلات ايتباي