الماتىداعى باۋىرجان مومىش ۇلى اتىنداعى رەسپۋبليكالىق اسكەري مەكتەبىنىڭ ديرەكتورى جەلىدە اتالعان مەكتەپ تۇلەكتەرنىڭ قىمبات كولىكتەردەن قۇرالعان اۆتو شەرۋىنىڭ ۆيدەوسى پايدا بولعاننان كەيىن جۇمىسىنان بوساتىلدى. بۇل تۋرالى قورعانىس مينيسترلىگى Tengrinews.kz سايتىنىڭ تىلشىلەرىنە رەسمي مالىمدەگەن دەپ جازادى Qamshy.kz اقپارات اگەنتتىگى. 

جەلىگە جۇكتەلگەن اتالمىش ۆيدەودا  "جاس ۇلان" مەكتەبىنىڭ تۇلەكتەرى شەتەلدىڭ قىمبات كولىكتەرىمەن اۆتو شەرۋ ۇيىمداستىرعان. اسكەري كيىم كيگەن تۇلەكتەر 20-دان اسا اۆتوكولىككە ءمىنىپ، قولدارىنداعى سمارتفونمەن كولىك تەرەزەسىنەن شىعىپ وز-وزدەرىن تۇسىرگەن. ۆيدەوداعى بۇل كورىنىس جەلى قولدانۋشىلارنىڭ ىزاسىن تۋدىرىپ، ولار بولاشاق وفيسەرلەرگە ءتۇرلى سىني پىكىرلەر جازعان.

قورعانىس مينيسترلىگىنىڭ كادرلار جانە اسكەري دايىندىق دەپارتامەنتىنىڭ باستىعى قايرات كوپبايەۆتىڭ ايتۋىنشا، بۇل ۆيدەوعا قاتىستى تەرگەۋ جۇرگىزىلدى.

«ءسوز جوق، بۇل ۆيدەو تەك قوعامدا عانا ەمەس، ءبىزدىڭ، ياعني، اسكەري ادامداردىڭ اراسىندا دا تەرىس كوزقاراس تۋعىزدى. بۇل ءدال وسىنداي بەدەلدى مەكتەپتى بىتىرگەن تۇلەكتەردىڭ بۇل جەڭىل ويلى ىس-اركەتەرى كۇتپەگەن جاعداي. ءبىز بۇنداي جاعداي ءۇشىن ۇلكەن وكىنىش بىلدىرەمىز. قىمبات شەتەلدىك كولىكتەر اتا-انالاردىڭ باستامالارىمەن  جالعا العانىن  اتاپ ءوتۋ كەرەك. ولاردىڭ مۇنداي باستامالارىنا مەكتەپتىڭ قاتىسى جوق. قوعامدا بۇل جاعدايعا بايلانىستى تەرىس پىكىر تۋعانى تۇسىنىكتى. "جاس ۇلان" مەكتەبى بولاشاق وفيسەرلەردى جوعارى پاتريوتيزم رۋحىندا تاربيەلەيدى، مۇندا اسكەري ىس-ارەكەتتى تەرەڭدەتە، زەردەلەي وتىرىپ وقىتىلادى، سوندىقتان بۇل جەردە تەمىردەي ءتارتىپ بولعانى قاجەت. بۇلار بولاشاق وفيسەرلەر، سوندىقتان اسكەري ومىردە مۇنداي ارەكەتتەرگە جول بەرىلمەيدى"، - دەپ ءتۇسىندىردى كوپبايەۆ.

"بۇل جاعدايدى وقۋ ورنىندا ءتارتىپتىڭ السىرەۋى جانە جالپى باسقارۋ جاعدايىنداعى  ءبىلىم بەرۋ جۇمىسىنىڭ ناشارلىعىنىڭ ناتيجەسى دەۋگە بولادى. سول سەبەپتى بۇگىنگى كۇنى اسكەري مەكتەپتىڭ باستىعى پودپولكوۆنيك جاباعين جانە ونىڭ ەكى ورىنباسارى ءوز لاۋازىمىنان بوساتىلدى"، - دەدى ول.

كوپبايەۆ سونداي-اق، قىمبات اۆتوكولىكتەردىڭ جۇرگىزۋشىلەرىنىڭ ارەكەتتەرى اكىمشىلىك قۇقىق بۇزۋشىلىققا جاتاتىنان اتاپ ءوتتى. قازىرگى ۋاقىتتا ولاردىڭ جاۋاپكەرشىلىگى تۋرالى ماسەلە شەشىلۋدە. ال تۇلەكتەرگە ەشقانداي جازا قولدانىلمايدى. ولارعا تەك پروفيلاكتيكالىق جۇمىستار جۇرگىزىلگەن.

تۇلەكتەردىڭ ءبىرىنىڭ اناسىنىڭ ايتۋىنشا، اتا-انالار بالالارىنا توسىن سىي جاساماق بولعان، ءبىراق قىمبات اۆتوكولىكتەردەن قۇرالعان اۆتو شەرۋ قوعامدا وسىنشالىقتى رەزونانس تۋعىزادى دەپ ويلاماعان قىمبات اۆتوكولىكتەردىڭ جالعا الىنعانىنان تۇلەكتەر دە، وقىتۋشى-وفيسەرلەر دە بەيحابار بولىپتى.