ءوز جوسپارلارىڭىزدى قۇپيا ۇستاۋدىڭ ماڭىزى قانشا؟ ءبىر اي ىشىندە قالاي رومان جازىپ شىعۋعا بولادى؟ ەگەر ءوزىڭدى كۇن سايىن فوتوعا تۇسىرسەڭ، ومىرىڭدە نە وزگەرەدى؟

بۇل سۇراقتارعا كاسىپكەر دەرەك سيۆەرس پەن Google كومپانياسىنىڭ ينجەنەرى مەتت كاتس جاۋاپ بەرگەن.

• "ءاربىر ادامدا ءوزىنىڭ ومىرىندە ماڭىزدى ءرول وينايتىن باستى ماقساتتارى بار. ءبىر سەكۋندقا ويلانىڭىزدار. ءارى قاراي وقۋدى جالعاستىرماس بۇرىن سىزگە ءوزىڭىزدىڭ ومىرلىك ماقساتىڭىزدى سەزىنۋ قاجەت. ەلەستەتىڭىز! ءسىز ءوزىڭىزدىڭ ومىرلىك ماقساتىڭىزدى ايقىندادىڭىز جانە ونى ءدال ءقازىر جۇزەگە اسىرۋعا دايىنسىز. تاعى دا ەلەستەتىڭىز! ءسىز سول ايقىن ماقساتىڭىزدى بۇگىن بىرەۋگە ايتۋعا اسىعاسىز. ويلاڭىز! وزگەلەردىڭ، بالكىم، دوستارىڭىز بەن جاقىندارىڭىزدىڭ قۋانىشى، ءسىزدى قۇتتىقتاۋى جاعىمدى عوي؟! ءسىز وسى ارقىلى ءوز ماقساتىڭىزدى ءومىرىڭىزدىڭ ماڭىزدى بولشەگى ەكەنىن سەزىنەسىز جانە ەندى ءبىر قادام جاساساڭىز بارلىعىنا قول جەتكىزگەلى تۇرمىن دەپ ويلايسىز"، - دەيدى CD Baby اتتى ءىرى مۋزىكالىق سايتتىڭ نەگىزىن قالاۋشى دەرەك سيۆەرس.

ول نەگە جوعارىداعى تاقىرىپقا وراي مۇنداي ءسوز ايتتى؟ مۇمكىندىگىمىزشە تالداپ كورەيىك.

دەرەك سيۆەرس جوعارىدا ايتقان سوزىندە ماقساتىڭىزدى جالپاق جۇرتقا جايىپ سالعاندا ادامنىڭ قانداي اسەر الاتىنىن جەتكىزدى. ءبىراق وسى اسەر سىزگە جوسپارىڭىزدى ىسكە اسىرۋ بارىسىندا ءبىرشاما كەدەرگىلەر كەلتىرمەك. ول قانداي كەدەرگى؟

سىزگە بارلىعىن قۇپيا ۇستاعان قولايلى بولار ەدى. ەندى الداعى ۋاقىتتا سول جاعىمدى اسەر ءسىزدىڭ ءاربىر كىشكەنە جەتىستىكتەرىڭىزگە قۋانا المايتىن جاعدايعا جەتكىزەدى. ويتكەنى، ءسىز ءوز جوسپارىڭىزدى وزگەگە ايتۋ ارقىلى ءوزىڭىزدى جەتىستىك شىڭىنا شىعىپ قويعان ادام رەتىندە ەلەستەتىپ الاسىز.

ەگەر ءسىزدىڭ ومىرلىك ماقساتىڭىز ايقىن بولسا، وندا قازىردەن باستاپ قىزمەت ەتكەنىڭىز، ناقتى قادامدار جاساعانىڭىز ءجون. سول باعىتتا بەلگىلى ءبىر جولدى باسىپ ءوتىپ، بەلگىلى ءبىر دەڭگەيدەگى جەتىستىككە قول جەتكىزۋ قاجەت. سول كەزدە ءوزىڭىزدىڭ ويىڭىزعا العان جانە سول باعىت بويىنشا ىسىڭىزدە جۇزەگە اسۋ ۇدەرىسى ءجۇرىپ جاتقاندا وزگەگە سول تۋرالى سىر شەرتەر بولساڭىز، بۇل دۇنيەنىڭ ماڭىزى باسقا. ول كەزدەگى وزگەلەردىڭ قۋانىشى، قۇتتىقتاۋى ءسىزدىڭ پسيحولوگياڭىزعا قاتتى اسەر ەتە قويمايدى. نەلىكتەن ولاي؟

ويتكەنى، ءسىز قىزمەتتىڭ اۋراسىنا كىرىپ، ءوزىڭىزدىڭ جۇزەگە اسىپ جاتقان ماقساتىڭىزدىڭ جەمىسىن جەۋ ءۇشىن قىرۋار تىرلىك اتقارۋ قاجەت ەكەنىن تۇسىنەسىز جانە بۇل ۇلكەن جاۋاپكەرشىلىك ەكەنىن اڭعاراسىز. سودان كەيىن وزگەنىڭ ەموسياسىنا ءسىز سالقىنقاندىلىق تانىتا الاسىز. مىنە – قۇپيانىڭ كىلتى.

مەتت كاتس – Google كومپانياسىنىڭ ىزدەۋ قىزمەتىنە جاۋاپ بەرەتىن ينجەنەرلەردىڭ ءبىر. ول ءوزىنىڭ باياندامالارىندا ادام ءوز ءومىرىن قالاي وزگەرتۋگە بولاتىنى تۋرالى ايتادى جانە ءوزى قولدانىپ، ناتيجە شىعارعان تاجىريبەسى تۋرالى ايتادى.

ءسىزدىڭ بويىڭىزعا سىڭىرگىڭىز كەلەتىن جانە ارىلعىڭىز كەلەتىن قاسيەتتەرىڭىز بار ما؟ بۇل قاسيەتتەردى يگەرۋ ەشقانداي ارمان ەمەس، تەك قانا تۇراقتى ءارى جالقاۋلىققا بوي بەرمەي ەڭبەك ەتۋ كەرەك. مەتت كاتس 30 كۇن ىشىندە كەز-كەلگەن قاسيەتتى يگەرە الاتىن تاجىريبەسى تۋرالى ءسوز ەتەدى. بۇل قانداي تاجىريبە ەكەنىن بىلگىڭىز كەلە مە؟

• "بىرنەشە جىل بۇرىن ماعان ءومىر سونشالىقتى كەرەمەت بولىپ كورىندى. سودان كەيىن مەن امەريكالىق ۇلى فيلوسوف مورگان سپەرلوكتىڭ تاجىريبەلەرىن قولدانا وتىرىپ، ءبىر ايدا وزىمە پايدالى دۇنيەلەرمەن اينالىسۋدى ءجون كوردىم. يدەيا وتە قاراپايىم. الدىمەن ءوزىڭىزدىڭ ومىرىڭىزگە نە ەنگىزگىڭىز كەلەتىنى تۋرالى ويلانىڭىز. سوسىن سول ارەكەتتەردى 30 كۇن بويى قايتالاپ ءجۇرىڭىز"، - دەيدى الىپ كومپانيانىڭ ينجەنەرى مەتت كاتس.

ونىڭ ايتۋىنشا، 30 كۇندىك اينالىم – بارلىق ارەكەتتەرگە بوي ۇيرەتۋگە جەتكىلىكتى ۋاقىت. مىسالى، ءسىز بەي-بەرەكەت فيلمدەر نەمەسە تەلەباعدارلامالار قاراۋعا، شىلىم شەگۋ مەن تۇراقتى تۇردە الكوگولدى زاتتار قولدانۋعا تاۋەلدى بولساڭىز، 30 كۇن بويى قيىندىقپەن بۇل نارسەلەرگە جولاماۋ ارقىلى ءوزىڭىزدى ءوزىڭىز تاربيەلەپ شىعاسىز.

مىسالى، ءسىز ءوز دەنساۋلىعىڭىزعا الاڭدايتىن بولساڭىز، 30 كۇن بويى تاڭەرتەڭ جۇگىرۋ ارقىلى پايدالى ارەكەتتى ادەتكە اينالدىرىپ الاسىز. سونداي-اق، ارتىق سالماقتان ارىلعىڭىز كەلسە، كۇندەلىكتى قولداناتىن اس مازىرىڭىزدەن كالوريالىق مولشەرى ۇلكەن تاعامداردى الىپ تاستاڭىز. 30 كۇن ىشىندە ءوز بويىڭىزدان وزگەرىس بايقايسىز.

سونىمەن قاتار، تاجىريبەنى ساپالى ورىنداپ، كۇن سايىن ەرىك-جىگەرىڭىزدى ارتتىرىپ وتىرۋ ءۇشىن كۇنىنە ءبىر فوتودان جاساپ وتىرىڭىز. ءوزىڭىزدى سىرتىڭىزدان قاراۋ ارقىلى كەلەسى كۇنى دە ۇلكەن وزگەرىسكە جاساپ كەلە جاتقان قادامىڭىزدان جاڭىلمايسىز.

كەتت ماتس ءوزىنىڭ 30 كۇندىك تاجىريبەسىنىڭ ناتيجەلەرى تۋرالى بىلاي دەيدى:

• "30 كۇن ىشىندە مەن كەڭسە ادامىنان وزگە ادامعا اينالا باستادىم: كوشەدە ۆەلوسيپەدپەن جۇرەتىن جىگىتكە، ءوزىنىڭ ءاربىر ىسىنەن ءلاززات الا بىلەتىن ادامعا اينالدىم. وتكەن جىلى افريكاداعى ەڭ بيىك تاۋلاردىڭ ءبىرى كيليماندجارو شىڭىن باعىندىردىم. 30 كۇندىك تاجىريبەنى قولدانباعان ۋاقىتتاردا وزگەشەلىكتى مۇنشا ىزدەمەيتىن ەدىم. ءقازىر ءبىرسارىندى ءومىر سۇرۋگە مۇلدە قۇلقىم جوق. كۇن سايىن الابوتەن دۇنيەلەردى جاساعىم كەلىپ تۇرادى".

ەگەر ساعان ءبىر دۇنيەنى جاساۋ سونشالىقتى قيىن بولسا دا، ونى 30 كۇن ىشىندە جۇزەگە اسىرۋعا ابدەن بولادى. مىسالى، ءار جىلدىڭ كۇزىندە جازۋشىلار وزدەرىنىڭ جاڭا شىعارمالارىن جازۋعا وتىرادى. ولار 50 مىڭ سوزدەن جوعارى تۇراتىن روماندارىن جازۋ ءۇشىن وزدەرىنە ۇلكەن ۋاقىت جۇمساپ جاتادى. ءسىز دە ءوزىڭىزدىڭ شىعارماشىلىعىڭىزدى شىڭداپ، ءوز جازۋىڭىزدى قالدىرعىڭىز كەلەدى عوي، ءيا؟!

ارينە، جازۋشىلىق بارلىعىنا بىردەي بەرىلەتىن تالانت ەمەس. دەگەنمەن، مىڭداعان دانامەن باسپادان شىعارىپ، سورەگە سامساتىپ قويۋ ماقساتىندا ەمەس، وزىندىك عۇمىرناما رەتىندە رومان جازۋعا ەشكىم قارسى بولا قويماس.

50 مىڭ سوزدەن تۇراتىن رومان جازۋعا بەت بۇردىڭىز دەلىك. 50 مىڭ ءسوزدى 30 كۇن ىشىندە ءبىتىرۋ ءۇشىن كۇنىنە 1667 سوزدەن جازىپ وتىرۋ قاجەت ەكەن. ەلەكتروندى قاعازدىڭ ستاندارتارىنا ساي جازساڭىز بۇل سوزدەر سانى 4-5 بەتكە ەركىن سيادى. ال وعان كەتەتىن ۋاقىت شامامەن 30-45 مينۋت ءارى كەتكەندە ءبىر ساعات. دەمەك، رومان جازۋ دا اسا ءبىر قيىن شارۋالاردىڭ قاتارىنا جاتپايدى.

ادام ءومىرى ءبىرسارىندىلىقتى ۇناتپايدى. ەگەر ءوز ءومىرىڭىزدى وزگەرتكىڭىز كەلسە، بۇگىننەن باستاپ ارەكەت ەتىڭىز. وزىڭىزگە قاتاڭ تالاپتار قويىڭىز جانە ونى مۇمكىندىگىنشە بۇزباۋعا تىرىسىڭىز. سوندا عانا ءوز قالاعان مەجەڭىزگە جەتىپ، ومىردەن ءلاززات الا الاسىز.

اۆتور: جۇلدىز مۇقانوۆا