سەنات وتىرىسىندا مەملەكەتتىك شارالاردى وتكىزۋگە جۇمسالىپ جاتقان قاراجات كولەمى ءسوز بولىپ، جاۋاپتى باسشىلاردان ەسەپ سۇرالدى دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.

"ەسەپ كوميتەتىنىڭ مالىمەتىنشە، 2016 جىل مەن 2018 جىل ارالىعىندا كونفەرەنسيالار مەن كورمەلەر وتكىزۋگە جۇمسالاتىن قاراجات مولشەرى 4 پايىزدان 80 پايىزعا دەيىن وسكەن. EXPO-نى قوسپاعاندا وسى باعىتتا جۇمسالعان قاراجاتتىڭ جالپى مولشەرى 825 ميلليون تەڭگەنى قۇرايدى. ونىڭ ىشىندەگى 664 ميلليون تەڭگەسى 2018 جىلى شىعىندالعان. بۇل كورسەتكىشتەردىڭ بارلىعى مەملەكەت باسشىسىنىڭ بارىنشا ەل بيۋدجەتىن ۇنەمدەۋ تۋرالى بۇيرىعىنان كەيىنگى كورسەتكىشتەر"، - دەدى سەناتور ولگا پەرەپەچينا سەنات وتىرىسىندا.

ونىڭ ايتۋىنشا، اتالعان نارسەلەرگە مادەنيەت جانە سپورت مييسترلىگى، ءسىم، اقپارات جانە قوعامدىق دامۋ مينيسترلىگى باسا نازار سالۋى كەرەك.

اتالعان ماسەلەلەرگە قاتىستى ءبىرىنشى ۆيسە-مينيستر بەرىك شولپانقۇلوۆ جاۋاپ بەردى. ونىڭ سوزىنە سەنسەك، قازىرگى ۋاقىتتا ارنايى جۇمىس توبى قۇرىلىپ، اتالمىش شارالارعا ۇستىمىزدەگى جىلى قانشا ءوارجى شىعىندالعانىن انىقتايتىن ريەۆيزيا جاساقتاپ جاتىر. ارنايى توپتى پرەمەر-مينيستردىڭ ءبىرىنشى ورىنباسارى، قارجى ءمينيسترى ءاليحان سمايلوۆ باسقارادى.

"الداعى ءۇش جىلدىقتا جۇزەگە اساتىن شارالارعا قاراستىرىلاتىن قاراجات كولەمىن باعامداۋدامىز. بۇل جۇمىس قازىرگى ۋاقىتتا وتە قارقىندى ءجۇرىپ جاتىر. جاقىن ارادا ناقتى شەشىم شىعارامىز"، - دەدى شولپانقۇلوۆ.

سەنات سپيكەرى داريعا نازاربايەۆا بەرىك شولپانقۇلوۆتان ناقتى سانداردى اتاۋىن سۇراپ شۇيلىگە ءتۇستى.

"داريعا نۇرسۇلتان قىزى، 10-ماۋسىمعا دەيىن ءاربىر مەملەكەتتىك مەكەمە وزدەرىنىڭ جەكە مالىمەتىن جىبەرۋى ءتيىس. شىلدە ايىنىڭ ورتاسىنا دەيىن كوميسسيا كونفەرەنسيالار مەن كورمەلەر تۋرالى قورىتىندى شىعارىپ، قولدانىلاتىن شارالاردى اتايدى"، - دەدى سۇراققا سۇرىنە قويماعان شولپانقۇلوۆ.