قازاقستاندا كەزەكتەن تىس پرەزيدەنت سايلاۋى باستالدى دەپ حابارلايدى Qamshy.kz اقپارات اگەنتتىگى.

ەلدە سايلاۋ ۋچاسكەلەرى نۇر-سۇلتان ۋاقىتىمەن تاڭەرتەڭگى ساعات 7.00-دە اشىلىپ، كەشكى ساعات 20.00-گە (48 ۋچاسكە تاڭعى 6.00-دەن باستاپ اشىلادى) دەيىن جۇمىس ىستەيدى. ورتالىق سايلاۋ كوميسسياسى (وسك) بۇعان دەيىن ەل اۋماعىندا 9 970 سايلاۋ ۋچاسكەسى، ال قازاقستاننان تىس جەردە 51 ەلدە 65 سايلاۋ ۋچاسكەسى اشىلادى دەپ حابارلاعان بولاتىن.

قازاقستاننىڭ سىرتقى ىستەر مينيسترلىگىنىڭ دەرەگىنشە، 9 ماۋسىمدا العاش بولىپ جاپونيا جانە كورەياداعى قازاقستاندىقتار داۋىس بەرگەن. الدىن الا دەرەك بويىنشا، قازاقستاننان تىس جەردە 13 مىڭ قازاقستاندىق بار.

وسك دەرەگىنشە، قازاقستاندا سايلاۋعا داۋىس بەرۋگە قۇقىعى بار 11 814 019 ادام بار.

ەڭ ءبىرىنشى بولىپ داۋىس بەرگەن جاپونيادا ءبىلىم الىپ جاتقان قازاقستان ازاماتى - ءىلياس قۇرمانعالي ەسىمدى ستۋدەنت.

قازاقستاندى وتىز جىلعا جۋىق باسقارعان نۇرسۇلتان نازاربايەۆ بيىل ناۋرىزدىڭ 19-ى كۇنى پرەزيدەنتتىك وكىلەتىن توقتاتاتىنىن كەنەتتەن مالىمدەپ، سول كەزگە دەيىن سەنات سپيكەرى بولعان قاسىم-جومارت توقايەۆتى ورنىنا ۋاقىتشا پرەزيدەنت ەتىپ قالدىرعان. ال ءساۋىردىڭ 9-ى كۇنى توقايەۆ قازاقستاندا بيىل ماۋسىمنىڭ 9-ى كۇنى كەزەكتەن تىس پرەزيدەنت سايلاۋى وتەتىنىن جاريالاعان.​

قازاقستاندا پرەزيدەنت سايلاۋلارى 1991، 1999، 2005، 2011 جانە 2015 جىلى وتكەن. ولاردىڭ ۇشەۋى كەزەكتەن تىس بولدى. بارلىعىندا ەلدىڭ بۇرىنعى پرەزيدەنتى نۇرسۇلتان نازاربايەۆ جەڭگەن. باتىس باقىلاۋشىلارى قازاقستانداعى پرەزيدەنت سايلاۋلارىنىڭ ەشقايسىسىن حالىقارالىق ستاندارتقا سايكەس ءوتتى دەپ تانىعان جوق.

بيىلعى سايلاۋدىڭ ەرەكشەلىگى - ەلباسى نۇرسۇلتان نازاربايەۆ ۇمىتكەر رەتىندە سايلاۋعا قاتىسپايدى.