ق ر ىشكى ىستەر ءمينيسترى ەرجان تۇرعىمبايەۆ مينيسترلىككە قاراستى قىزمەتكەرلەر مەن قولدانىلاتىن قاراجاتتى ۇنەمدەۋ ناتيجەسىندە پوليسيا قىزمەتكەرلەرىنىڭ جالاقىسىن وسىرەتىنى تۋرالى ايتتى دەپ جازادى Qamshy.kz اقپارات اگەنتتىگى.

"ۇنەمدەلگەن قاراجات ەسەبىنەن پاترۋلدىك پوليسيا قىزمەتكەرلەرىنىڭ جالاقىسى ۇستىمىزدەگى جىلدىڭ 1-شىلدەسىنەن باستاپ 65 پايىزعا، جەدەل ارەكەت ەتۋ توبىنىڭ قىزمەتكەرلەر مەن تەرگەۋشىلەردىڭ تابىسى 55 پايىزعا، ۋچاسكەلىك پوليسيا مەن جوو ۇستازدارىنىڭ جالاقىسىن 25، باسقا قىزمەتكەرلەردىڭ ايلىعىن 20 پايىزعا ءوسىرۋ جوسپارلانىپ وتىر"، - دەدى تۇرعىمبايەۆ وتكەن جۇماداعى ەسەپ بەرۋ كەزدەسۋىندە.

ونىڭ ايتۋىنشا، تۇرعىن ءۇي الۋعا ءوتىنىش بەرەتىن ءتارتىپ ساقشىلارىنىڭ دا سانى ارتپاق. سونداي-اق، شەندى مينيستر 2019-2021 جىلدارعا ارنالعان ىشكى ىستەر ورگانىنىڭ جول كارتاسى جۇزەگە اسۋ ۇستىندە ەكەنىن جەتكىزدى.

ەسكە سالا كەتەيىك، 2018 جىلدىڭ 14-قىركۇيەگىندە سول ۋاقىتتاعى ىشكى ىستەر ءمينيسترى قالمۇحانبەت قاسىموۆ مينيسترلىككە قاراستى قىزمەتكەرلەردىڭ سانىن 10 پايىزعا دەيىن قىسقارتۋ تۋرالى ايتقان بولاتىن.