شىعىس قازاقستان وبلىسىنىڭ زايسان قالاسىندا ارالاس جەكپە-جەكتەن حالىقارالىق تۋرنير ءوتتى. «رۋحاني جاڭعىرۋ» باعدارلاماسى اياسىندا ۇيىمداستىرىلعان «ەۋرازيا كۋبوگىنە» ەلىمىزدىڭ ءار وڭىرىنەن، سونداي-اق قىرعىزستان، وزبەكستان، موڭعوليا قاتارلى كورشىلەس مەملەكەتتەردەن ۇزىن سانى وتىزدان استام سپورتشى قاتىستى.

ءۇش كۇنگە سوزىلعان ءدۇبىرلى دودا اۋدان ورتالىعىنداعى ستاديوندا ءوتتى. بىلەكتىلەر مەن جۇرەكتىلەر سايىسىن تاماشالاۋعا جانكۇيەرلەر قاتارى مول جينالدى. سىنعا ءتۇسىپ جاتقان وتانداستارىنا قولداۋ ءبىلدىرۋ ءۇشىن اۋدان اكىمى سەرىك اقتانوۆ تا كەلىپ، جەكپە-جەكتەردى تاماشالاپ وتىردى.  

ءتۋرنيردىڭ شىمىلدىقاشالار جەكپە-جەگىندە 53 كەلىگە دەيىنگى سالماق دارىجەسىندە ونەر كورسەتكەن قازاقستاندىق دارحان ىسقاقوۆ قىرعىزستاندىق حۋسنيدين ساتىبالدييەۆپەن كۇش سىناستى. تارتىستى وتكەن بۇل جەكپە-جەكتە جەرگىلىكتى جانكۇيەرلەردىڭ قولاۋىنان جىگەرلەنگەن دارحاننىڭ ءباسى بيىك بولدى. جالپى، بۇدان كەيىنگى باسەكەلەردە دە كوك بايراعىمىزدى جەلبىرەتىپ شىققان قازاق سپورتشىلارىنىڭ باعى مەن بابى قاتار شاۋىپ، شەتەلدەن كەلگەن قارسىلاستارىن الىپ تا، شالىپ تا جىعىپ جاتتى. ناتيجەسىندە ساراپقا سالىنعان التى بەلبەۋدىڭ بەسەۋى قازاقستاندىق ساڭلاقتاردىڭ بەلىندە كەتتى. اتاپ ايتساق،  53 كەلىگە دەيىنگى سالماقتا دارحان ىسقاقوۆ (قازاقستان)، 57 كەلىدە ەرزات ساقابانوۆ (قازاقستان)، 61 كەلىدە بەكزات ءالماحان (قازاقستان)، 65 كەلىدە ميراس ۇلىقپانوۆ (قازاقستان)، 70 كەلىدە مۇناربەك بەكتۇربەك ۇلى (موڭعوليا)، 80 كەلىدە يمران تايسۇلتانوۆ (قازاقستان) چەمپيون اتاندى.

– اۋىلدىق جەردە مۇنداي سپورت مەرەكەسىنىڭ ءوتۋى ۇلكەن جاڭالىق بولدى زايساندىقتار ءۇشىن. ءۇش كۇن بويى جەكپە-جەك ونەرىن تاماشالاپ، ءوزىمىزدىڭ سپورتشىلارعا جانكۇيەرلىك ەتتىك. ءبىزدىڭ جىگىتتەر ءۇمىتتى اقتادى، جەڭىسكە جەتكەندەردىڭ دەنى وتانداستارىمىز، – دەيدى زايساندىق ەركەبۇلان دوسىمبەك ۇلى.

ايتا كەتۋ كەرەك، اتالمىش تۋرنير تاريحتا اتى اڭىز بوپ قالعان قابانباي باتىردىڭ ۇزەڭگىلەس سەرىگى بولعان بايمۇرات بايىمبەت ۇلىنىڭ رۋحىنا تاعزىم ەتۋ ماقساتىندا ۇيىمداستىرىلدى. «ەۋرازيا كۋبوگىنىڭ وتۋىنە «جەكپە-جەك» دۇنيەجۇزىلىك قاۋىمداستىعىنىڭ پرەزيدەنتى سابىرجان ماحمۋتوۆ قولداۋ كورسەتتى.