تۇركىستان وبلىسى اكىمىنىڭ ورنىباسارى جولدىمۇرات امانبايەۆ ارىس تۇرعىندارىنا 100 مىڭ تەڭگەلىك اقشالاي كومەك ەكى اپتا ىشىندە بەرىلەتىنىن ايتتى دەپ جازادى Qamshy.kz اقپارات اگەنتتىگى. 

امانبايەۆتىڭ ايتۋىنشا، ارنايى مالىمەتتەر بازاسى ارقىلى 44781 ارىس تۇرعىنى انىقتالىپ، ولاردىڭ بارلىعىنا اقشالاي كومەك بەرىلەدى. 

"قالاداعى ارنايى مالىمەتتەر بازاسى ارقىلى 44781 ادامدى انىقتاپ، قاراجاتىن اۋدارامىز. بۇل جۇمىستاردى 2 اپتادا اياقتاپ ۇلگەرەمىز دەپ ويلايمىن. ەشقانداي قۇجات جيناۋدىڭ، اكىمدىككە كەلىپ شۋ شىعارۋدىڭ، ابىگەرگە ءتۇسۋدىڭ قاجەتى جوق. ءاربىر تۇرعىن انىقتالىپ، ءتيىستى قاراجاتتى الادى. ال بالالارىنىڭ اقشاسى كەلىسىم بويىنشا اكەسىنىڭ نەمەسە اناسىنىڭ ەسەپ-شوتىنا اۋدارىلاتىن بولادى"، - دەدى جولدىمۇرات امانبايەۆ.

ماۋسىمنىڭ 24ء-ى كۇنى تۇركىستان وبلىسى ارىس قالاسىنداعى اسكەري ءبولىمنىڭ ءوق-دارى قويماسىندا جويقىن جارىلىس بولىپ، قالا تۇرعىندارى تۇگەلدەي ەۆاكۋاسيالاندى. وبلىستان اشىلعان ەۆاكۋسيالىق پۋنكتەردى پانالاعان ارىس تۇرعىندارى 28 ماۋسىمنان باستاپ قالاعا قايتا كىرگىزىلە باستادى. رەسمي مالىمەت بويىنشا، ارىستاعى جارىلىس كەزىندە ءۇش ادام ءولدى.

بيلىك جويقىن جارىلىستان جاپا شەككەن ارىس تۇرعىندارىنىڭ ءارقايسىسىنا 100 مىڭ تەڭگە اقشالاي كومەك بەرىلەدى دەگەن.