سينوپتيكتەر 2019 جىلدىڭ شىلدە ايىنا ارنالعان كونسۋلتاتيۆتىك اۋا-رايى بولجامىن جاريالادى دەپ حابارلايدى Qamshy.kz اقپارات اگەنتتىگى kazhydromet.kz سايتىنا سىلتەمە جاساپ. 

شىلدە ايىندا سينوپتيكالىق جاعدايدىڭ ءجيى وزگەرۋى بولجانىلادى: باتىس انتيسيكلونداردىڭ ەنۋى وڭتۇستىك سيكلونداردىڭ شىعۋىمەن اۋىستىرىلادى.

ايدىڭ باسىندا سولتۇستىك وڭىرلەرگە سكانديناۆيا اۋداندارىنان سيكلون ىعىسادى، ونىمەن بىرگە داۋىلدى جەل سوعادى، جاڭبىر، كەي جەرلەردە قاتتى جاڭبىر بولجانادى، سونداي-اق بۇرشاق، نايزاعاي جانە داۋىل تۇرىندەگى كونۆەكتيۆتى قۇبىلىستار كۇتىلەدى.ەلدىڭ سولتۇستىگىندە، سولتۇستىك-باتىسىندا جانە ورتالىعىندا اۋا تەمپەراتۋراسى كۇندىز +17+26ºس-قا دەيىن تومەندەۋى بولجانادى. وڭتۇستىكتە قاتتى ىستىقتان كەيىن اۋا تەمپەراتۋراسى +25+33ºس-قا دەيىن تومەندەۋىمەن قاتار نوسەر جاڭبىر جاۋادى. ءبىرىنشى ونكۇندىكتىڭ سوڭىنا قاراي اۋا تەمپەراتۋراسى بىرتىندەپ جوعارىلاي باستايدى.

ەكىنشى جانە ءۇشىنشى ونكۇندىكتەردە سىناپ باعانالارى سولتۇستىك، ورتالىق پەن شىعىستا تۇندە +10+15ºس-تان +15+20ºس-قا دەيىن، كۇندىز +25+30ºس-تان +30+38-قا دەيىن اۋىتقيدى؛ رەسپۋبليكانىڭ وڭتۇستىك، وڭتۇستىك-شىعىس جانە باتىسىندا تۇندە +15+20ºس-تان+20+30ºس-قا دەيىن، كۇندىز +30+38ºس-تان +35+45ºس-قا دەيىن اۋىتقيدى دەپ ايتىلعان.