قازىلار القاسى مەن كوپشىلىك قاۋىمنىڭ كوڭىلىنەن شىعۋ ءۇشىن حالىق اندەرىن اۋەلەتە شىرقاپ، ۇلتتىق اسپاپتاردا ويناپ، ستەنداپ كورسەتىپ، ءارتۇرلى سيقىرلاردى كورسەتتى.
اسىرەسە، بەسقاراعاي اۋدانىنان كەلگەن دانيار بەكبولاتوۆتىڭ سەرىكتەسىمەن بىرگە ارالاس جەكپە-جەكتەن ءۇزىندى كورسەتكەنى كورەرمەندەردىڭ ەسىندە ۇزاق ۋاقىت بويى ساقتالارى ءسوزسىز.
– بارلىق قاتىسۋشىلاردىڭ دايىندىعى مىقتى. جارىس جوعارى دەڭگەيدە ءوتتى. بۇل سايىس ماعان ەرەكشە كۇش-جىگەر بەردى. قول كۇرەستەن ەكىنشى ورىن الدىم. دومبىرامەن تەرمە ايتىپ، مۋزىكانىڭ سۇيەمەلدەۋىمەن ولەڭ وقىدىم. بۇدان سوڭ جولداسىممەن بىرگە ارالاس جەكپە-جەكتىڭ ادىس-تاسىلەرىن كورسەتتىك. مۇنداعى باستى ماقسات – جاستاردىڭ سپورتقا دەگەن قىزىعۋشىلىعىن وياتىپ، سالاۋاتتى ءومىر سالتىن ناسيحاتتاۋ، – دەدى دانيار بەكبولاتوۆ.
شىعارماشىلىق بايقاۋدىڭ سوڭىندا ۆيكتورينالىق سۇراقتار قويىلدى. قاتىسۋشىلار قازاق حالقىنىڭ ءسالت-داستۇرى مەن ادەبيەتىنەن، اقىن-جازۋشىلاردىڭ شىعارماشىلىعىنان سىر شەرتەتىن ساۋالدارعا جاۋاپ بەردى. بۇدان سوڭ قازىلار القاسى ءمىردىڭ وعىنداي مىقتى جىگىتتەردىڭ ىشىنەن جەڭىمپازدى انىقتاۋعا جونەلدى. ال اۋدان تۇرعىندارى مەن قوناقتارى ورتالىق الاڭعا بارىپ، انشىلەر مەن بيشىلەردىڭ ونەرلەرىن تاماشالادى.
بايقاۋدىڭ قورىتىندىسى بويىنشا ءۇشىنشى ورىندى پاۆلوداردان كەلگەن باتىربەك قوشقاربايەۆ يەلەندى. وعان 500 مىڭ تەڭگە تابىستالدى. ەكىنشى ورىندى العان تىلەۋحان نۇرحانعا 700 مىڭ تەڭگە ۇسىنىلدى. ال بايقاۋدىڭ ەكى كەزەڭىنەن سۇرىنبەي وتكەن تۇركىستان وبلىسىنىڭ تۋماسى اقبار ەلۋباي ۇلى 1 ميلليون تەڭگەنى قانجىعاسىنا بايلادى. باس جۇلدە اباي اۋدانىنىڭ نامىسىن قورعاعان ايدوس ۇركىمبايەۆقا بۇيىردى. ول سۋجاڭا Lada Granta اۆتوكولىگىن تىزگىندەدى.
مەرەكە دەمەۋشىلەردىڭ قولداۋىمەن ءوتتى. بايقاۋ بارىسىندا اتالمىش شارانىڭ وتۋىنە مۇرىندىق بولعان كوكپەكتى اۋدانىنداعى "ەلىماي" اگروونەركاسىپتىك كەشەنىنىڭ ديرەكتورى بولات بەكبەردينوۆ ءسوز الىپ، جيىلعان قاۋىمعا جىلى لەبىزىن ءبىلدىردى. وسى ورايدا كاسىپكەردىڭ ايتۋلى دودانىڭ جەڭىمپازىنا Lada Granta اۆتوكولىگىن تارتۋ ەتكەنىن اتاپ وتكەن ورىندى.
ءىس شاراعا كوكپەكتى اۋدانىنىڭ دامۋىنا ولشەۋسىز ۇلەس قوسقان جاندار مەن قۇرمەتتى ازاماتتار دا قاتىستى. سونىڭ ءبىرى ورتا ءبىلىم بەرۋ جۇيەسىنە اقپاراتتاندىرۋدى ەنگىزگەن تانىمال فيزيك، پروفەسسور، ماتەماتيك ادامبەك تاتەنوۆ. ول تاياۋدا تاسساي اۋىلى مەن بەسقاراعاي اۋدانىنداعى مەكتەپكە ۆيرتۋالدى-ينتەراكتيۆتى لابوراتوريالىق جۇمىستاردى جۇرگىزەتىن كەشەندى تارتۋ ەتتى. ونىڭ كومەگىمەن حيميا، بيولوگيا، فيزيكا پاندەرىن جۇرگىزۋگە بولادى.
بۇل كەشەننىڭ ەرەكشەلىگى سول، وندا وقۋشىلار ەش الاڭسىز حيميالىق رەاكسيالاردى جۇرگىزىپ، كومپيۋتەر ارقىلى فيزيكا مەن ماتەماتيكا پاندەرىنەن ءارتۇرلى سىناق جۇمىستارىن جاساي الادى. بۇگىندە بۇل كەشەننىڭ قازاقستاندا دا، شەتەلدەر دە بىردە ءبىر انالوگى جوق.
سپورتتىق-شىعارماشىلىق بايقاۋدىڭ اقتىق كەزەڭىندە بايقاۋدىڭ وتۋىنە ۇلكەن ۇلەس قوسقان بۇكىلالەمدىك ارمرەسلينگ فەدەراسياسىنىڭ قۇرمەتتى ۆيسە-پرەزيدەنتى جانە ازيانىڭ گىر سپورتى فەدەراسياسىنىڭ پرەزيدەنتى، مۇحامەدوللا اعزاموۆ، كوكپەكتى اۋدانىنىڭ قۇرمەتتى ازاماتى، ەڭبەك جولىن اۋىل شارۋاشىلىعى سالاسىن باسقارۋعا ارناعان قۇريباي سۇلتانوۆ قاتىستى. سونداي-اق سپورتشىلارعا قولداۋ كورسەتۋ ءۇشىن اۋداننىڭ بۇرىنعى اكىمى اتىمتاي ابەنوۆ، اۋداننىڭ قۇرمەتتى ازاماتى جاقسىلىق فرۋنزە سىندى باسقا دا جەرلەستەر كەلدى. وسىلايشا، ولار بايقاۋدىڭ وتۋىنە قولدان كەلگەنشە كومەك كورسەتتى.
