اتالمىش الاڭعا ابايدىڭ ەسكەرتكىشى كورىك بەرىپ تۇر. ورتالىق الاڭدا ءبيشى سۋبۇرقاق ىسكە قوسىلىپ، ماڭايىندا گۇلدەردىڭ جۇپار ءيىسى اڭقىپ تۇر، دەپ حابارلايدى شقو اقپارات ورتالىعى.
ەسكەرتكىش تاستان جاسالعان. ونى ءمۇسىنشى، ق ر سۋرەتشىلەر وداعىنىڭ مۇشەسى، تارباعاتاي اۋدانى، اقجار اۋىلىنداعى ونەر مەكتەبىنىڭ ءمۇعالىمى الىبەك شوقانوۆ جاساعان.
جەرگىلىكتى تۇرعىنداردىڭ پىكىرىنشە، اقىننىڭ ولەڭدەرىندە قازاق حالقىنىڭ تۇرمىس-تىرشىلىگى جاقسى سۋرەتتەلگەن. بۇگىندە اباي قۇنانبايەۆتىڭ ەڭبەكتەرى وقىرماندار اراسىندا جوعارى باعالانادى.
– بۇگىن ءبىزدىڭ اۋىلىمىزدا تاريحي كۇن. اۋىلدىڭ تۇرعىندارى ورتالىق الاڭداعى جاڭا ەسكەرتكىشىنىڭ بوي كوتەرگەنىنە شىن جۇرەكتەن قۋانىپ ءجۇر. ءبىز ءارقاشان ابايدىڭ ناقىل سوزدەرىن ومىرلىك ۇستانىم رەتىندە قولدانامىز، – دەدى «نۇر» شارۋاقوجالىعىنىڭ باسشىسى زامامبەك نۇرپەيسوۆ.
كوكپەكتى اۋدانىنىڭ اكىمى اسحات سمايلوۆتىڭ ايتۋىنشا، بۇل ورتالىققا اباي ەسكەرتكىشىن ورناتۋ تۋرالى ۇسىنىستى شىعىس قازاقستان وبلىسىنىڭ اكىمى دانيال احمەتوۆ ايتىپتى. بۇدان سوڭ اۋدان باسشىسى اقساقالدار القاسىمەن كەڭەسە وتىرىپ، سامار اۋىلىنىڭ ورتالىق الاڭىنا اباي ەسكەرتكىشىن سالۋ جۇمىستارىن باستاپتى.
– ءبىز مۇنىمەن توقتاپ قالمايمىز. كەلەسى جىلى بۇل الاڭدى ءۇش ەسە ادەمى ەتىپ، كوركەيتەتىن بولامىز. ويتكەنى بارلىق ەلدى مەكەندە تۇرعىنداردىڭ دەمالۋى ءۇشىن بارلىق جاعداي جاسالۋى ءتيىس، – دەدى اسحات سمايلوۆ.
سونداي-اق بۇل كۇنى جاستار اراسىندا "اباي وقۋلارى" وبلىستىق بايقاۋى ءوتتى. ال الاڭدا مادەنيەت ءۇيىنىڭ شىعارماشىلىق ۇجىمدارى ءان مەن كۇيدەن شاشۋ شاشتى.
