27 تامىز كۇنى وتكەن ۇكىمەتتىڭ كەزەكتى وتىرىسىندا ق ر ءبىلىم جانە عىلىم ءمينيسترى اسحات ايماعامبەتوۆ "پەداگوگ مارتەبەسى تۋرالى" زاڭ جوباسىنىڭ جاي-جاپسارىن تانىستىردى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

ءمينيستردىڭ اتاپ وتۋىنشە، زاڭ جوبالارىن دايىنداۋ بارىسىندا پەداگوگيكالىق قىزمەتتى رەتتەۋدىڭ حالىقارالىق تاجىريبەسى ەسكەرىلدى. اتاپ ايتقاندا ءبىرقاتار شەت ەلدىڭ زاڭدارى، يۋنەسكو-نىڭ مۇعالىمدەردىڭ جاعدايى تۋرالى ۇسىنىستارى قاراستىرىلدى.

"پەداگوگ مارتەبەسى تۋرالى" زاڭ جوباسى  19-باپتان تۇرادى. ال قوسىمشا زاڭ جوباسى 192-باپتى قامتيدى. جالپى زاڭ جوباسى اۋقىمدى 5 باعىتتان تۇرادى. اتاپ ايتقاندا، ماتەريالدىق جانە ماتەريالدىق ەمەس ىنتالاندىرۋ، الەۋمەتتىك كەپىلدىكتەر، ۇستازداردىڭ قۇقىقتارىن كەڭەيتۋ، مۇعالىمدەردىڭ جۇكتەمەسىن ازايتۋ. ماتەريالدىق ەمەس ىنتالاندىرۋعا كەلەر بولساق، ولار مۇعالىمدەردىڭ جۇكتەمەسىن تومەندەتۋ، ار-نامىسى مەن قادىر-قاسيەتىن قورعاۋ كەپىلدىگى، مۇعالىمدەردىڭ بالالارىنا بالاباقشاعا ءبىرىنشى كەزەكتە ورىن بەرۋ، قازاقستاننىڭ ەڭبەك سىڭىرگەن ۇستازى مەملەكەتتىك ناگراداسىنە بەرۋ، تاعى باسقا دا ماتەريالدىق ەمەس ىنتالاندىرۋلار قاراستىرىلعان. نەگىزگى ماتەريالدىق ىنتالاندىرۋعا كەلەر بولساق، ونىڭ ىشىندە  سىنىپ جەتەكشىلىگى مەن داپتەرلەردى تەكسەرگەنى ءۇشىن اقىنى ەكى ەسە ءوسىرۋ جانە پەداگوگتەرگە پەداگوگيكالىق شەبەرلىگى ءۇشىن قوسىمشا اقى تولەۋ قاراستىرىلعان. سونىمەن قاتار زاڭ جوباسىندا بارلىق پەداگوگتەر ءۇشىن دەمالىس ۋاقىتىن 56 كۇنگە دەيىن ۇلعايتۋ قاراستىرىلدى. ماگيستر دارەجەسى ءۇشىن جانە تالىمگەر بولعانى ءۇشىن قوسىمشا اقى تولەۋ جانە تاعى دا باسقا شارالار قاراستىرىلىپ وتىر. ەڭ باستىسى مەملەكەت باسشىسىنىڭ تاپسىرماسىنا سايكەس، 4 جىلدىڭ ىشىندە جالاقىنى 2 ەسە ءوسىرۋ بويىنشا ماسەلە قاراستىرىلدى"، – دەدى ول. 

ءمينيستردىڭ ايتۋىنشا، جوعارىدا اتالعان ءبىرقاتار نورمالاردى ىسكە اسىرۋ اياسىندا قوسىمشا زاڭ جوباسى ازىرلەندى. اتالعان زاڭ جوباسىمەن ءۇش كودەكسكە، 15 زاڭعا تولىقتىرۋلار مەن وزگەرتۋلەر ەنگىزىلەدى.

"اتالعان زاڭ نورمالارى مۇعالىمدەرگە كەلەسىدەي مۇمكىندىك  بەرەتىن بولادى: سىنىپ جەتەكشىلىگى ءۇشىن 173 مىڭ ءمۇعالىمنىڭ، ال داپتەرلەردى تەكسەرگەنى ءۇشىن 165 مىڭ ءمۇعالىمنىڭ قوسىمشا اقىسى ەكى ەسەگە كوبەيەدى. 212 مىڭنان استام قىزمەتكەردىڭ بىلىكتىلىك ساناتى ءۇشىن ايلىق جالاقىدان 30-دان 50 پايىزعا دەيىنگى مولشەردە قوسىمشا اقى الۋىنا مۇمكىندىك بەرىلەدى. 7 مىڭ قىزمەتكەردىڭ ماگيستر دارەجەسى ءۇشىن 10 اەك  مولشەرىندە قوسىمشا اقى الۋىنا مۇمكىندىك جاسالادى. 18 مىڭ قىزمەتكەردىڭ تالىمگەرلىگى ءۇشىن 1 بازالىق لاۋازىمدىق مولشەرىندە قوسىمشا اقى الۋىنا مۇمكىندىك بەرىلەدى دەپ كۇتىلۋدە. جانە دە 100 مىڭنان استام پەداگوگتەر قوسىمشا 14 كۇن جازعى دەمالىس الىپ، ەندى 56  كۇن دەمالاتىن بولادى"، – دەدى اسحات ايماعامبەتوۆ.

ەندى مۇعالىمدەردى وزىنە ءتان ەمەس قىزمەتكە تارتاتىندار زاڭدىق تۇردە جازالاناتىنى ايتىلدى.

"پەداگوگتىڭ جۇكتەمەسىن  قىسقارتۋ بويىنشا جەكە نورمالار كوزدەلگەن. بۇل ورايدا، ءمۇعالىمنىڭ كاسىبي فراكسياسىنا كىرمەيتىن مىندەتتەردى جۇكتەۋگە، شامادان تىس ەسەپ بەرۋگە، نەگىزسىز تەكسەرۋلەر جۇرگىزۋگە  تىيىم سالىناتىن بولادى. قۇقىق بۇزۋشىلىق سۋبەكتىسىنە بايلانىستى مۇعالىمدەردى وزىنە ءتان ەمەس فۋنكسيالارعا جانە ارتىق ەسەپ بەرۋگە تارتقانى ءۇشىن 20-دان 120 اەك-كە دەيىن ايىپپۇل زاڭ جوباسىندا قاراستىرىلعان"، – دەدى مينيستر.