"نەگە حالىقتى سابىرعا شاقىرا بەرەسىزدەر، بيلىكتىڭ دە قاتەسىن ايتپايسىزدار ما؟"

بىرنەشە وقىرمانىم وسىنداي ساۋال جولداعان ەكەن...

✅ەلدەن ۇلكەن ەمەسپىز، كوپتىڭ سۇراعىنا كوكەيىمدەگى بىرنەشە ويمەن بولىسە كەتەيىن.

♦ بىرىنشىدەن، قارايعان xالىق ينتەرنەت قاراپ، ۋاتساب اشىپ، الەۋمەتتىك جەلىدە وتىرعاندىقتان ەلگە ەڭ كەرەك دەگەن ويىمدى وسىندا جازامىن. ول مۇمكىن "سابىر" جايلى، بالكىم "وتباسىلىق قۇندىلىقتار" تۋرالى نەمەسە "ادامي قارىم-قاتىناستار" جايلى بولۋى مۇمكىن...

♦ال، بيلىك وكىلدەرى كوبىندە الەۋمەتتىك جەلىنى پەندە رەتىندە قاراعانمەن، شەشۋشى شەنەۋنىك رەتىندە جانىنا جاقىن قابىلداي بەرمەيتىنى انىق. سوندىقتان دا، ايتقىم كەلگەن اقيقاتىم، جەتكىزگىم كەلگەن تالابىم بولسا، ونىڭ باسقا جولدارىن قاراستىرعاندى ءتاۋىر كورەمىن...

♦ماعان، قولپاشتاۋشىلاردىڭ: "پاx، شىندىقتى ايتتىڭ، باتىر ەكەنسىڭ. سەنى دەپۋتات قىلۋ كەرەك، ءبىزدىڭ مۇxاڭ مولودەس" دەگەن ماقتاۋى كەرەك ەمەس. ەلگە پايدالى شارۋانىڭ شەشىلگەن ناتيجەسى كەرەك. 

♦الەۋمەتتىك جەلىدە اتتانداماي-اق، اكىم، مينيستر، شىنجىر بالاق، شۇبار توستەردىڭ كەز-كەلگەنىنە كىرىپ تە، جازىپ تا جەتكىزە الاتىن بولسام الىستان ارقان لاقتىرىپ قايتەمىن. تالاي مۇقتاجدىڭ تالابىن جەتكىزىپ، تالاي جىرتىققا جاماۋ تاۋىپ بەرگەن بولسام، كىمگە نە دەپ ماقتانۋىم كەرەك؟!
نەمەسە، "ءبۇيتتىم، ءسويتتىم" دەپ، ەسەپ بەرىپ وتىرۋ ادەپكە دە جاتا قويماس، دەپ ويلايمىن.
الەۋمەتتىك جەلى – كەيدە اشىق تاقتا نەمەسە جابىق كۇندەلىگىڭ سياقتى. اڭقىلداعان تۇستا اشىلىپ-شاشىلىپ، كەيدە تىرس ەتىپ، تۇك جازباي، تەرىس قاراپ جۇرەتىن كەزىڭ دە بولادى. 

♦وكپەلى تالاي دوستارىما ايتقانمىن: "اتا زاڭ رۇقسات بەرىپ تۇر، قولىڭنان كەلە مە، اشىنا بەرمەي، اشىق وپپوزيسياعا شىق، بەدەل جينا، قارجى جۇمسا، مۇددەلەس پارتيا تاپ، دەپۋتات بول، وكىمەت قۇرامىنا كىر، باعدارلاما ۇسىن، ەلدىڭ سەنىمىنە يە بول...
"جوعا جولاتپايدى عوي" دەيسىڭ...

♦ ونداي ىرىلىك قولىڭنان كەلمەي مە، ولاي بولسا، قوعامدىق ۇيىمداردى قولدان، بەدەلدى، ىقپالدى تۇلعالارعا شاعىن، ءۇنىڭدى سولار ارقىلى جەتكىز. حات جاز، ۇسىنىس ايت، زاڭعا سۇيەنىپ زار يلە...

♦ ول دا ناتيجە بەرمەسە، وتباسىڭا بۇرىل. ۇل-قىزىڭدى ءبىلىمدى، العىر، جان-جاقتى قىپ تاربيەلە. بيىككە ۇشىر، "بولاشاقپەن" وقىت...
بۇرىن پاتشالاردىڭ بالاسى عانا العان ءبىلىمدى، ءقازىر قاراپايىم شارۋانىڭ دا بالاسى الىپ جاتىر...
ءسويتىپ، ءبىرىن بيلىككە، ءبىرىن كاسىپكە باۋلى...
بۋىن اۋىسادى، تولقىن جىلجيدى. ات تۇياعىن تاي باسادى...
مۇمكىن، سولار ارمانىڭدى ورىندار...

♦ وعان دا جاعدايىڭ كەلمەسە ياعني، پارتياعا بارماساڭ، تۇلعالاردى تانىماساڭ، پەرزەنتتەرىڭ تولىمدى بولماسا، الاقان جاي دا اللاعا دۇعا قىل. ول دا ۇلكەن مۇمكىندىك!
اللا ەستىمەيتىن، قابىل ەتپەيتىن دۇعا جوق. ەگەر سوعان لايىق بولساڭ.

♦ ال، مۇنىڭ ءبىرى دە قولىڭنان كەلمەسە، قۇر بەكەر وقىرماندى ىزا قىپ، اشۋىن قوزدىرىپ، وتقا ماي قۇيىپ، ىشىرتكىدەي پوستىڭمەن ءىش بوساتىپ، ەلدىڭ پوستىنا ەكىلەنە پىكىر جازۋ ەرلىك پە؟!

♦ قاراپتان قاراپ، جۇيكەڭدى توزدىرىپ، جۇرەگىڭدى قارايتىپ، الدامشى ماقتاۋعا ءناپسىڭ سەمىرىپ، ۇيدە وتىرىپ ۇرلەنىپ، ءوزىڭ ايتقان ۇلكەن سوزگە ءوزىڭ الدانىپ، "الاڭعا كەتتىك" دەگەندە، "شارۋاڭ شىعىپ قاپ"، "بالپاڭداپ باسقىڭ كەلگەنمەن، بالتىرىڭ شىداماي"، اقىر سوڭىندا "ە، ءبارى ءبىتتى، ەل بولمايمىز" دەپ قول سىلتەپ، ءپۇشايمان xالدە جۇرەسىڭ...

♦ ازدان سوڭ بايبىشەڭە جۋاستۋ كوزبەن قاراپ، قارىنىڭنىڭ اشقانىن ءبىلدىرىپ، قازان جاققا جاۋتاڭداي قاراۋىڭ – ەڭ شىنايى بەينەڭ ەمەس پە؟ مەنمەنسىگەن قۋ ءناپسىنىڭ قالاۋىن xالىقتىڭ اتىنان ايتىپ، جالقاۋلىق مەن قىرسىقتىعىڭدى بىرەۋدىڭ قاتەلىگىنىڭ استىنا جاسىرىپ قايتەسىڭ؟! 

♦ ءوزىڭنىڭ جەكە رەنشىڭ مەن وكپەڭدى، ءوزىڭ جەتە الماي قالعان تابىس پەن مانساپتى ەلدىڭ اتىنان تۇگەندەپ قايتەسىڭ؟!
بىرەۋدىڭ بايلىعى مەن وتباسىلىق ۇستانىمىن كۇستانالاپ، عايباتقا كىرىپ نەمىز بار، بيىك بيلىك تۇگىلى توبەنىڭ توڭىرەگىندە تايعاناپ ءجۇرمىز...
قۇداي باسقا بەرمەسىن! 
باس اينالدىرار ب ا ق قونسا، تالايدىڭ كوزى توبەسىنە ءبىتىپ، تابانى جەلكەڭدە تۇراتىنى ايتپاسا دا تۇسىنىكتى اقيقات قوي...
اللا ءوزى ساقتاسىن!

♦ وسىلاي دەپ ايتقانىمدا، وكپەشىل دوستارىمنىڭ دەنى ويلانىپ قالدى...

♦ ال، ءوزىم وپپوزيسيا بوپ، پارتيا اڭساپ، بيلىككە بالاما جول ۇسىنۋعا نيەتتى ەمەسپىن. ودان بولەك ءۇش باعىتتا قولدان كەلگەن قارەكەتتى جاساپ ءجۇرمىز، ەل مۇددەسى جولىندا ەشتەڭەدەن ايانىپ قالعان جەرىم جوق.
وقىرماندارىما اللا جار بولسىن!!!

مۇحامەدجان تازابەك

فەيسبۋك پاراقشاسىنان