ءبىز بايقاي بەرمەيمىز. جالپى ۋاقىت جىلدام ءوتىپ جاتادى. ءبىراق ونى ءتيىمدى پايدالانۋدىڭ ءادىسى كوپ. نەگىزى جاپوندىق فيلوسوفيا كايدزەن تسۋرالى اڭگىمە قوزعالعاندا، ءبىز ونى ۇنەمى ءوندىرىس پروسەسىمەن نەمەسە بيزنەسپەن شاتاستىرىپ جاتامىز. ءبىراق كايدزەن جۇيەسىن كۇندەلىكتى ومىرىڭىزگە دە پايدالانۋعا بولادى. ال ونىڭ پايداسى وتە زور. تەك بىلە بەرمەيتىنىمىز وكىنىشتى.

جالپى ادام بالاسىنا ءتان ءبىر جامان ادەت بار. كەي ساتتە قينالساق، «ونى ەرتەڭ -اق باستاي سالايىنشى» دەپ جالقاۋلاناتىنىمىز بار. بۇل جالقاۋلىق تا بولۋى مۇمكىن. ونىڭ ۇستىنە ءبىر جۇمىستى ۇنەمى ىستەي بەرسەڭ ول جالىقتىرىپ جىبەرمەي مە؟ ونداي جاعدايدا نە ىستەۋ كەرەك؟ تىرلىكتى وزگەرتىپ تۇرۋ كەرەك. تاعى ءبىر مىسال، اپتاسىنا ءۇش رەت جاتتىعۋ زالىنا باراسىز. ول ايعا، سوسىن جىلعا سوزىلادى. ءبىر سارىندى تىرلىك سوسىن ءسىزدى جالىقتىرىپ جىبەردى دە، ءبارىن تاستاپ كەتتىڭىز. تاعى دا «نە ىستەۋ كەرەك؟» دەگەن ساۋال الدىڭىزدان شىعادى. مۇنداي جاعدايدا نە ىستەگەن دۇرىس؟ ارينە، يىعىڭىزعا جۇك كوپ ءتۇستى، بۇل ارەكەت ءسىزدى شارشاتتى. تۇسىنۋگە تۇرارلىق نارسە. دەگەنمەن ونىڭ جولىن تابۋعا بولادى، شەكتەن تىس دەنە قيمىلى ارينە ادامدى شارشاتىپ جىبەرەدى..

مۇنداي جاعدايدا سىزگە كايدزەن كومەكتەسەدى، وندا 1 ميننۋتتىڭ ءقادىرىن بىلۋگە تۇرارلىق امال-ارەكەت بار. ول نە سوندا؟ بۇل – 1 مينۋتتىق ىس-ارەكەت. بۇل ءادىستىڭ ءمانى مىنادا: سىزگە مىسالى، ءبىر اپتادا 3 رەت جاتتىعۋ زالىنا بارىپ، شارشاپ-شالدىعىپ قايتۋدىڭ قاجەتى جوق. كۇندەلىكتى بەلگىلى ءبىر ۋاقىتتا جاتتىعۋدى 1 مينۋتتىڭ ىشىندە باستاپ كەتىڭىز.  1 مينۋت ادامنىڭ ۋاقىتىن كوپ المايدى. 1 مينۋتتا تالاي نارسە ىستەي الاسىز. سكاكالكامەن سەكىرۋگە بولادى، سان ءتۇرلى جاتتىعۋ جاساۋعا مۇمكىندىك بار. وسىلاي ۋاقىتتى باعالاي بىلسەڭىز، ءبىر مينۋتتىڭ بار ءومىرىڭىزدىڭ ءمانى ەكەنىن تۇسىنە الاسىز. 1 مينۋتتا جاسايتىن جاتتىعۋعا العاشقىدا جارتى ساعات ارناۋدىڭ قاجەتى شامالى. ءار مينۋتتا ءارتۇرلى جاتتىعۋ جاساڭىز. دەمەك، بۇدان شىعاتىن قورىتىندى نە؟ ءسىز ەڭ باستىسى، جالقاۋلىقتان مۇلدە ارىلاسىز. ەرىنشەكتىك ءسىزدىڭ جولىڭىزدا ۇنەمى كوسە كولدەنەڭدەپ تۇرمايدى. ودان كەيىن...

ارى قاراي ءسىزدىڭ ۋاقىتتى باعالاۋ ءپرينسيپىڭىز باستالادى. 1 مينۋت ۇزارىپ، 5 مينۋتتىق ارەكەتكە ۇلاسۋى ىقتيمال. دەمەك ءسىز كىشكەنتاي قادام ارقىلى ۇلكەن مۇمكىندىكتەرگە جول اشىپ وتىرسىز. ال ودان ارى 5 مينۋتتا جاسالاتىن ارەكەت كەيىننەن جارتى ساعاتقا سوزىلۋى مۇمكىن. ۇزاماي مۇنىڭ دا ناتيجەسى كورىنە باستايدى.

جاپونيادا ومىرگە كەلگەن بۇل كايدزەن فيلوسوفياسىنىڭ اۆتورى – ماسااكي يماي. ماسااكي يمايدىڭ ايتۋىنا قاراعاندا، بۇل تۇجىرىمدامانى بيزنەستە دە، جەكە ومىردە پايدالانۋعا بولادى. دەمەك، ءبىزدىڭ شىعاراتىن قورىتىندى: ادام بالاسىنىڭ ءوز ءومىرىن وزگەرتىپ وتىرۋعا مۇمكىندىگى وتە مول. ول ءۇشىن كايدزەننىڭ ءامال-تاسىلىن ومىرىڭىزگە مۇرات ەتىڭىز. كايدزەن جەكە ءومىرىڭىزدى تۇراقتى تۇردە ۇنەمى وزگەرتىپ وتىرۋعا كومەكتەسەدى. ويتكەنى ۋاقىت ولشەۋلى، ءار مينۋتتىڭ ءقادىرى بار..

ەركىن قالدان