بۇگىن، ەرتەڭگىسىن "اقيقات" جسدپ پارتياسىنىڭ 15-سەزىندە ەرمۇرات باپي پارتيا ءتوراعالىعىنان الاستاتىلعانى بەلگىلى. ماسەلەگە بايلانىستى جۋرناليست تۇستەن كەيىن جيىن وتكىزىپ، وقيعانىڭ ءمان-جايىن ايتىپ بەردى، دەپ حابارلايدى Qamshy.kz اقپارات اگەنتتىگى.
ەرمۇرات ءباپيدىڭ سوزىنشە، ونىڭ ورنىنان الىنۋى كۇتپەگەن جەردەن بولعان. ءتىپتى كەشە كەشكە پارتيا مۇشەلەرى داستارحان باسىندا باس قوسقان. وندا بۇل جونىندە ەشقانداي اڭگىمە قوزعالماعان.
ەرمۇرات باپي پارتيا ءتوراعالىعى ءۇشىن تالاسپايتىنىن، ازاماتتىق كوزقاراسىن ءوزى شىعاراتىن "دات" گازەتى ارقىلى بىلدىرە بەرەتىنىن مالىمدەدى.
جيىنعا قاتىسقان قوعامدىق بەلسەندى ءۋاليحان قايساروۆتىڭ پىكىرىنشە، بۇل پرەزيدەنت اكىمشىلىگىنىڭ ارەكەتى. ولاردىڭ ماقساتى – پارتيانى قۇرتۋ، جويۋ. نەمەسە مۇددەلەس ءۇشىنشى تاراپ ارالاسىپ وتىرعان بولۋى دا عاجاپ ەمەس. ونىڭ ارتىندا وليگارحتار تۇرسا كەرەك. ونىڭ ايتۋىنشا، قالاي بولعاندا دا بيلىككە پارتيانىڭ قىزمەتىن توقتاتقانى ءتيىمدى.
جيىن بارىسىندا ەرمۇرات ءباپيدى ساياسي كۇرەس جولىنان كەتپەۋىن، بۇل ءىستى سوڭىنا دەيىن جەتكىزۋىن سۇراعاندار كوپ بولدى. اراسىندا ءسوز العان جۋرناليست سەيتقازى ماتايەۆ پارتيا مۇشەلەرىنىڭ بۇل ارەكەتىنىڭ زاڭسىز ەكەنىن ايتتى.
بۇل ويمەن جينالعان جۇرتتىڭ كوبى كەلىستى. جيىندا الدا بولاتىن پارلامەنت سايلاۋىنا دەيىن جاڭا پارتيا قۇرۋ تۋرالى ۇسىنىستار ايتىلدى.
پىكىر قالدىرۋ