كوشى-قون ۇدەرىسىن باقىلاۋ جانە زاڭسىز ەڭبەك ميگرانتتارىنىڭ تاسادا قالۋىنا تىيىم سالۋ ماقساتىندا ءبىر تەرەزە ادىسىمەن قۇرىلعان «ازاماتتارعا ارنالعان ۇكىمەت» مەملەكەتتىك كورپوراسياسىنىڭ الماتى كوشى-قون قىزمەتى ورتالىعىنا ءبىر جىل تولىپ وتىر. ورتالىق جۇمىسىنا اسىرەسە، شەتەلدىك جۇمىسشىلار ءدان ريزا.

 –بىزدە دە مۇنداي ورتالىق بار، الايدا قۇجاتتارىمىزدى ءدال وسىلاي جىلدام راسىمدەي المايمىز. مۇندا ءبىر جەردە، 1-2 ساعاتتا قۇجاتىڭىز دايىن، - دەيدى باكۋدەن كەلگەن رۋستام ارمانوۆ ورتالىق قىزمەتىنە ريزاشىلىعىن ءبىلدىرىپ.

 –ورتالىقتا ەڭبەك رۇقساتتارىن بەرۋگە تارتىلعان بارلىق قۇرىلىمدار (بانك، نوتاريۋس، مەديسينالىق قىزمەتكەرلەر، ساقتاندىرۋ اگەنتتەرى) ورنالاسقان. بۇل قىزمەتتىڭ مەرزىمىن 7 كۇننەن 2 ساعاتقا دەيىن قىسقارتۋعا جانە ەڭبەك ميگرانتتارىنا ەكونوميكانىڭ "كولەڭكەلى سەكتورىنان" شىعۋعا جانە سىبايلاس جەمقورلىق كورىنىستەرىن ازايتۋعا مۇمكىندىك بەردى، - دەيدى  «ازاماتتارعا ارنالعان ۇكىمەت» مەملەكەتتىك كورپوراسياسى الماتى قالاسى فيليالى ديرەكتورى دانيار قىرىقبايەۆ.

      جىل سايىن قازاقستانعا شامامەن 6 ملن شەتەل ازاماتى كەلەدى ەكەن. سونىڭ كوپشىلىگى رەسپۋبليكانىڭ ەڭ ۇلكەن مەگاپوليسىنىڭ ءبىرى - الماتى قالاسىنىڭ ۇلەسىنە تيەتىن كورىنەدى.

 –ءبىزدىڭ ورتالىقتاعى 26 مامان كۇنىنە 400-500 ادامعا قىزمەت كورسەتەدى. جاز مەزگىلىندە كەلۋشىلەر سانى 800-گە دەيىن بولادى. كەلەتىندەر نەگىزىنەن رەسەي، وزبەكستان، قىرعىزستان سياقتى تمد ازاماتتارى،- دەيدى الماتى قالاسى كوشى-قون ورتالىعىنىڭ باسشىسى عالىم ىسكەندىر ۇلى.

         الماتىداعى ميگراسيالىق ورتالىقتىڭ جۇمىسىنا شەتەلدىكتەر ريزا بولىپ، جۇمىستارىنىڭ جىلدام بىتكەنىنە العىستارىن جاۋدىرىپ جاتادى. اسىرەسە، ميگراسيالىق ورتالىق اشىلماي تۇرعاندا قىزمەت  الىپ كورگەندەر، بۇگىنگىمەن سالىستىرا وتىرىپ قىزمەت الۋدا قازاقستاننىڭ تاجىريبەسىن جوعارى باعالايدى. ءتىپتى، جاقىندا ورتا ازيا ەلدەرىنىڭ ىشكى ىستەر مينيسترلەرى دە كەلىپ ورتالىق جۇمىسىمەن تانىسىپ كەتتى. قىرعىزستان ىشكى ىستەر ءمينيسترى كاشكار دجۋنۋشالييەۆ، تاجىكستان ىشكى ىستەر ءمينيسترى راحيمزودا رامازون جانە وزبەكستان ىشكى ىستەر ءمينيسترى پۋلات بابادجانوۆ ورتالىق جۇمىسىنىڭ قولايلىلىعى مەن تيىمدىلىگىن كورىپ، بۇل تاجىريبەنى ءوز ەلدەرىندە جۇزەگە اسىراتىندارىن ايتتى.

    «ازاماتتارعا ارنالعان ۇكىمەت» مەملەكەتتىك كورپراسياسىنىڭ الماتى كوشى-قون ورتالىعى ءبىر جىل ىشىندە ەڭبەكشى كوشىپ كەلۋشىلەرگە  54 946 رۇقسات بەرگەن جانە مەرزىمىن ۇزارتقان. قازاقستان رەسپۋبليكاسىندا ۋاقىتشا بولاتىن شەتەلدىكتەر مەن ازاماتتىعى جوق ادامداردى تىركەۋ بويىنشا 71900 قىزمەت كورسەتكەن.