قالانىڭ زاماناۋي اعىمداعى توپتارى: BMX، گراففيتي، ۆوركاۋت، كوشە بيلەرى، ستريتبول 3*3، ارمرەسلينگ، ارت-ينستاللياسيا جانە باسقالارى ءبىر الاڭدا باس قوستى.
ەكى كۇندىك باعدارلامالىق شارانى كورۋگە ءارى جارىستارعا قاتىسۋعا نەمەسە كوشە ونەرىنىڭ احۋالىنان ءنار الۋعا 10 000 استام ادام جينالدى. سپورتشىلاردىڭ باسىم كوپشىلىگى ۇزدىك اتانۋ ءۇشىن سايىسقا ءتۇستى.
ولاردىڭ اراسىندا نۇر-سۇلتان، پەتروپاۆل، سەمەي، وسكەمەن، شىمكەنت، تاراز جانە تالدىقورعان قالالارىنىڭ تۇرعىندارى مەن قىرعىزستان، وزبەكستان مەن رەسەيدەن كەلگەن شەتەلدىك قاتىسۋشىلار دا بولدى. بۇلاردىڭ بارلىعى – وسىناۋ سپورتتىق شاراعا وراي الماتىعا ارنايى كەلگەندەر.
فەستيۆالعا الماتى قالاسى اكىمىنىڭ ورىنباسارى ەرجان باباقۇماروۆ، قازاقستان رەسپۋبليكاسى مادەنيەت جانە سپورت مينيسترلىگىنىڭ سپورت جانە دەنەشىنىقتىرۋ ىستەرى جونىندەگى كوميتەت ءتوراعاسى سەرىك ساپييەۆ قاتىستى.
«بۇگىن ۋربان فەستيۆال ءبىزدىڭ قالامىزدا العاش رەت ءارى مەنىڭ ويىمشا جوعارى دەڭگەيدە ءوتتى. مەن مۇنداي مەرەكەلەردىڭ ءبىزدىڭ قالامىزدا ءجيى وتۋىنە تىلەكتەسپىن. سىزدەردىڭ ءارقايسىلارىڭىز ءۇشىن جەڭىستەر مەن باعىندىراتىن اسۋلار كوپ بولسىن. وسىناۋ جولعا تۇسكەندەر – ۇلكەن سپورتتا ءوز جولىن تاپقاندار. بارلىقتارىڭىزدى قۇتتىقتايمىن جانە تابىس تىلەيمىن»، – دەدى فەستيۆالعا قاتىسۋشىلار مەن قوناقتاردى قۇتتىقتاعان ە. باباقۇماروۆ.
فەستيۆالعا قازاق كينوسىنىڭ، تەلەارنالارىنىڭ جۇلدىزدارى، تانىمال سپورتشىلار، قوعامدىق پىكىر جەتەكشىلەرى قولداۋ ءبىلدىرىپ، شارا سوڭىندا «QazaqstanJastarFest» چەللەندج اياسىندا ۋربان مادەنيەتتى دامىتۋ ەستافەتاسىن باتىس قازاقستاننىڭ قالالارىنا تاپسىردى.
پىكىر قالدىرۋ