بۇگىن، 3 قىركۇيەكتە الماتى اكىمى جانىنداعى ىسكەرلىك كەڭەستىڭ العاشقى وتىرىسى جانە شوب قولداۋ شارالارىن تالقىلاعان كاسىپكەرلەردىڭ جىل سايىنعى V كونفەرەنسياسى ءوتتى.
كەزدەسۋگە الماتى اكىمى باقىتجان ساعىنتايەۆ جانە «اتامەكەن» ۇكپ پرەزيديۋمىنىڭ ءتوراعاسى تيمۋر قۇلىبايەۆ قاتىستى.
الماتى اكىمى باقىتجان ساعىنتايەۆ كاسىپكەرلىككە قولداۋ كورسەتۋ مەن ونى دامىتۋ اكىمدىك جۇمىسىنىڭ ستراتەگيالىق باستى باعىتتارىنىڭ ءبىرى ەكەنىن اتاپ ءوتتى.
«بۇگىنگى كۇنى شاعىن بيزنەس – جاڭا جۇمىس ورىندارىن قۇرۋدىڭ باستى درايۆەرى، سوندىقتان اۋداندار اكىمدىكتەرى مەن قالا باسقارمالارىنىڭ جۇمىستارى جەرگىلىكتى جەرلەردە ساپالى ەڭبەكپەن قامتۋ ارقىلى باعالاناتىن بولادى»، – دەدى قالا باسشىسى.
نەگىزگى ماقسات – الماتىنى ورتالىق ازيانىڭ بيزنەس-حابى جاساۋ. قالادا وڭتۇستىك استانانىڭ ازيانىڭ ماڭىزدى ەكونوميكالىق جانە قارجى ورتالىعى، وڭىرلەر مەن الەمنىڭ وزگە مەاپوليستەرىمەن باسەكەگە تۇسە الاتىن قالاسى بولۋى ءۇشىن بارلىق جاعدايلار جاسالادى. ب. ساعىنتايەۆ كاسىپكەرلىكتى دامىتاتىن «الماتى بيزنەس 2025» ءبىرىڭعاي وڭىرلىك باعدارلامانىڭ جاسالعانىن حابارلادى. ول نەگىزگى بەس باعىتتان تۇرادى، اكىمشىلىك كەدەرگىلەردى ازايتۋ، بيزنەستى قارجىلاندىرۋدى ۇلعايتۋ، ءوندىرىس، سەرۆيس جانە ساۋدا ءۇشىن ينفراقۇرىلىمدى دامىتۋ، كاسىپكەرلىك نەگىزدەرىن وقىتۋ جانە ينۆەستيسيالىق جوبالاردى كەشەندى جۇرگىزۋ سىندى ماسەلەلەردى قامتىعان.
باعدارلاما تەتىكتەرى ەڭ الدىمەن شاعىن بيزنەستى جانە ءىسىن جاڭا باستاعان كاسىپكەرلەردى قولداۋعا، جاس ازاماتتاردىڭ جەكە تۇلعا رەتىندە قالىپتاسۋىنا جاعداي جاساۋعا باعىتتالعان.
كەزدەسۋ بارىسىندا كاسىپكەرلەر بيزنەستى دامىتۋ جونىندە ۇسىنىستارىن ايتتى. مىسالى، «Red Dragon Almaty» ج ش س قۇرىلتايشىسى كونستانتين اۆەرشين ساۋدا وبەكتىلەرى مەن كولىك ارقىلى قىزمەت كورسەتەتىندەردىڭ جۇمىسىن رەتتەۋ ءۇشىن ءنورماتيۆتى-قۇقىقتىق اكتىلەر ازىرلەۋدى ۇسىندى. ول قۇجاتتى ازىرلەيتىن جۇمىسشى توبىنىڭ قۇرامىنا ىسكەر بيزنەسمەندەردىڭ ەنۋى ءتيىس ەكەنىن ايتتى.
«جالايىر» ج ش س كومپانياسى توبىنىڭ باس ديرەكتورى ارتۋر كوتەنوۆ ەدب مەن پنق-دا كەپىلدە تۇرعان پايدالانىلماعان جەرلەردى اينالىمعا شىعارۋ مەحانيزمىن ازىرلەۋدى ۇسىندى. كاسىپكەردىڭ پىكىرىنشە، بۇل بوس جەر ۋچاسكەلەرىنىڭ تاپشىلىعىن جويۋعا ىقپال ەتەدى.
جەڭىل ونەركاسىپكە، اسىرەسە Made in Kazakhstan برەندى بويىنشا كيىم شىعاراتىن كاسىپكەرلەرگە قولداۋ كورسەتۋ قاجەت ەكەندىگى ءسوز بولدى. كاسىپكەرلەر جەر قاتىناستارى سالاسىنىڭ جۇمىسىن جاقسارتۋدى ءوتىندى.
almaty.gov.kz
