جۇمىستىڭ مۇنداي كولەمى كەلەر جىلعا جوسپارلانعان. بۇل تۋرالى الماتى اكىمدىگىنىڭ باسپا ءسوز ورتالىعىندا وتكەن بريفينگتە ناۋرىزباي اۋدانىنىڭ اكىمى سانجار توعاي حابارلادى.

قالانىڭ پوليسيا دەپارتامەنتىمەن بىرگە جارىقتى ءبىرىنشى كەزەكتە قاجەت ەتەتىن بارىنشا كريمينوگەندى ۋچاسكەلەر انىقتالدى. بيىلعى جىلى قالقامان ەلدى مەكەنىنىڭ 23 كوشەسى جارىقتاندىرىلادى. كەلەر جىلى ناۋرىزباي اۋدانىنىڭ 245 كوشەسىنە جارىق جۇرگىزىلەدى.

«اۋدان قۇرىلعان كەزدەن باستاپ ۇزىندىعى 72 كم بولاتىن 49 كوشەگە جارىق جۇرگىزىلدى. جالپى، اۋدان بويىنشا كوشەلەردىڭ نەبارى 28 پروسەنتى عانا جارىقتاندىرىلعان، ارينە، بۇل جەتكىلىكسىز. قالا اكىمىنىڭ تاپسىرماسىنا سايكەس كەلەر جىلى اۋداننىڭ بارلىق كوشەلەرىن جارىقتاندىرۋدى جوسپارلادىق»، – دەدى س. توعاي.

بۇلاردان وزگە، قوعامدىق قاۋىپسىزدىكتى ساقتاۋعا وراي اۋداندا سەگىز كريمينوگەندى ۋچاسكە انىقتالدى، بۇلاردا پوليسيانىڭ ستاسيونارلى جانە ءموبيلدى پۋنكتتەرى جۇمىس جاسايدى.

«كەلەر جىلى قالقامان ىقشام اۋدانىندا بيزنەستىڭ الەۋمەتتىك جاۋاپكەرشىلىگى اياسىندا ءۇي سالىنىپ، ونىڭ ءبىر جارتىسىنا پوليسيانىڭ ۋچاسكەلىك پۋنكتى ورنالاسادى، ال ەكىنشى جارتىسىندا ۋچاسكەلىك پوليسيا قىزمەتكەرى وتباسىمەن تۇراتىن بولادى»، – دەپ اتاپ ءوتتى ناۋرىزباي اۋدانىنىڭ اكىمى.

almaty.gov.kz