الماتى اكىمدىگىنىڭ باسپا ءسوز ورتالىعىندا وتكەن بريفينگتە ناۋرىزباي اۋدانىنىڭ اكىمى سانجار توعاي 10 ەلدى مەكەننىڭ جسق جاسالعانىن، ال تورتەۋىنىڭ مەمساراپتاماسىنىڭ دايىن ەكەنىن ايتتى. الداعى ەكى جىل ىشىندە تاۋجولى، قۇرامىس، جايلى ىقشام اۋداندارى سۋمەن قامتۋ جەلىسىنە قوسىلادى. اقجار ەلدى مەكەنى بويىنشا كونكۋرستىق پروسەدۋرالار جاسالۋدا، دەپ حابارلايدى Qamshy.kz اقپارات اگەنتتىگى اكىمدىكتىڭ باسپا ءسوز قىزمەتىنە سىلتەمە جاساپ.

س. توعاي ۇزاق جىلدار بويىنا سۋسىز بولعان تۇرعىنداردىڭ سابىر ساقتاۋىن ءوتىندى. قالا اكىمىنىڭ تاپسىرماسىنا ساي جۇمىستار قولعا الىنعان. سۋ جانە كارىز جەلىلەرى تارتىلعان سوڭ جولدار جوندەلەدى.

جالپى، اۋدان تۇرعىندارىنىڭ تەڭ جارتىسى نەمەسە 70 مىڭعا جۋىق ادام اسىرەسە، جاز ايلارىندا سۋدىڭ تاپشىلىعىنان زارداپ شەگۋدە.

ناۋرىزباي اۋدانىنىڭ اكىمى جىل اياعىنا دەيىن يەسىز كوممۋنالدىق جەلىلەردىڭ قالا بالانسىنا وتەتىنىن حابارلادى. قازىرگى كەزدە 362 ترانسفورماتور قوندىرعىلارىن، 80 كم كارىز جەلىلەرىن، 36 سۋ قۇبىرلارى سكۆاجينالارىن كوممۋنالدىق مەنشىككە بەرۋ ماسەلەسى قاراستىرىلۋدا.

«سۋ جەلىلەرىن جوندەۋ جۇمىستارىنا وزدەرى قارجى جيناپ، تۇرعىندار شىعىنعا باتۋدا. مىسالى، ترانسفورماتورلاردىڭ 70%-ى توزعان. الماتى اكىمى باقىتجان ساعىنتايەۆ جىل اياعىنا دەيىن ماسەلەنى شەشۋدى تاپسىردى، ءبىز بۇل باعىتتا جۇمىستار جۇرگىزۋدەمىز. تۇرعىندار قوسىمشا شىعىنداردان ارىلىپ، كوممۋنالدىق قىزمەتتەردى جالپىقالالىق تاريفتەر بويىنشا تولەيتىن بولادى»، – دەپ اتاپ ءوتتى س. توعاي.