مەكتەپ وقۋشىلارىن تازالىق جۇمىسىنا تارتۋ باستاماسى اينالاسىنداعى داۋ ءالى باسىلار ەمەس. بۇعان قاتىستى اقپارات جانە قوعامدىق دامۋ ءمينيسترى داۋرەن ابايەۆ پىكىر ءبىلدىردى، دەپ حابارلايدى Qamshy.kz اقپارات اگەنتتىگى.
"جالپى، بالالاردى ەڭبەككە تارتۋدا تۇرعان ەشنارسە جوق. البەتتە، بۇل ماسەلەدە بىرنەشە نيۋانستى اتاپ وتكەن ءجون. بىرىنشىدەن، بۇل وقۋ ۇردىسىنە كەدەرگى كەلتىرمەۋى كەرەك. بۇگىندە وقۋشىلاردىڭ ساباعى كوپ. ودان بولەك ۇيىرمەلەر، قوسىمشا سەكسيالار بار دەگەندەي. ەكىنشىدەن، ەدەن جۋۋ ەرىكتى بولۋى ءتيىس. باستاما و باستان سولاي. ياعني، مەكتەپ ۇجىمى اتا-انا جانە وقۋشىلار بىرىگىپ شەشىم قابىلداۋى كەرەك"، – دەدى مينيستر "اشىق ديالوگ" باعدارلاماسىندا.
"الدەكىم قولىنا ەدەن جۋاتىن شۇبەرەكتى ۇستاۋ ار-وجدانىنا تيەدى دەپ ەسەپتەسە، اتا-اناسىنان الىنعان سالىق ونسىز دا ەدەن جۋۋشىلاردىڭ جالاقىسىنا جۇمسالادى دەپ ويلاسا، ونداي وقۋشىنى پارتا استىنداعى قوقىستى تازالاۋعا تارتۋدىڭ قاجەتى شامالى"، – دەيدى ابايەۆ.
سونداي-اق مينيستر مەملەكەت وقۋشىلاردىڭ ارقاسىندا ۇنەمدەۋدى كوزدەپ وتىرماعانىن ايتتى.
"ەدەن جۋۋشىلار جۇمىستان شىعارىلمايدى. مەكتەپتە كەزەكشىلىك، تولىق تازالاۋ جۇمىسىن اتقارعانىمىز ەسىمدە. ءتىپتى قىلشا تەرۋگە دە بارعانبىز. مەكتەپكە تيەسىلى جەر تەلىمىنىڭ كۇتىمىنە جاۋاپتى ەدىك. سونىڭ وزىندە ساباق وقىپ، سپورتپەن شۇعىلدانىپ، ءتۇرلى ۇيىرمەلەرگە قاتىسىپ، ءتىپتى ديسپوتەكاعا بارىپ ۇلگەرەتىنبىز"، – دەپ اتاپ ءوتتى مينيستر.
مينيست اتا-انالاردىڭ كوبى وسى جولدان وتكەنىنە نازار اۋداردى.
"وقۋشىلاردىڭ كوبىنىڭ اتا-انالارى وسى جولدان وتكەنىنە سەنىمدىمىن. ءتىپتى سول كەز تۋرالى ەرەكشە جىلىلىقپەن ەسكە الاتىنى انىق. البەتتە ءبىز مەكتەپتە وقۋشىلاردى باسى ارتىق قاجەتسىز شارالارعا تارتۋمەن كۇرەسۋىمىز كەرەك. ءبىراق بالالاردى ەڭبەككە باۋلىعاندا، جۇمىس ورنىن تازا ۇستاۋعا ۇيرەتكەندە تۇرعان ەش سوكەتتىك جوق"، – دەيدى مينيستر.
پىكىر قالدىرۋ