«ۇلكەن الماتى اينالما اۆتوكولىك جولى» جوباسى 150 ملرد تەڭگەگە باعالانىپ وتىر، دەپ جازادى LS سايتى. التى جولاقتى جولدىڭ جالپى قاشىقتىعى 66 شاقىرىمدى قۇراماق. جول بويىندا 38 وتپەجول مەن وتكەل جانە 7 كولىك جولايرىق سالىنادى. ونىڭ قۇرىلىسىنا ساپالى قىزمەتتى قامتاماسىز ەتۋگە ارنالعان الدىڭعى قاتارلى تەحنولوگيا قولدانىلماق.

ينۆەستوردى انىقتاۋعا ارنالعان كونكۋرس 2015 جىلى جاريالانعان بولاتىن. ول تۇستا بىرنەشە حالىقارالىق كومپانيا قىزىعۋشىلىق تانىتقان-دى. الايدا كەلىسىمشارت تەك 2018 جىلعى 7 اقپاندا تۇرىك-كورەي كونسورسيۋمىمەن جاسالدى.

2018-2019 جىلدارى جوبالىق-سمەتالىق قۇجاتتار مەن دايارلىق جۇمىستارى ازىرلەندى. بۇگىندە الماتىدا 26،5 شاقىرىم جولدا قۇرىلىس-مونتاج جۇمىستارى جۇرۋدە. كەلىسىم-شارتقا سايكەس ۇلكەن الماتى اينالما اۆتوكولىك جولىن 2020 جىلى ىسكە قوسۋ جوسپارلانۋدا.

جول اقىلى بولادى. جەڭىل كولىكتەرگە بولەك، جۇك كولىكتەرى بولەك تاريف بەكىتىلەدى. زەرتتەۋ قورىتىندىسىنا ساي، جولمەن كۇنىنە 30 مىڭ – 70 مىڭ كولىك جۇرەدى دەپ كۇتىلۋدە. بۇنداي قارقىنمەن 15 جىلدا 231 ملرد تابىس تۇسپەك. ال 25 جىلدا 570 ملرد تەڭگە كىرىس كىرمەك.