23 قازان كۇنى الماتى قالالىق قورعانىس ىستەرى دەپارتامەنتىنىڭ جيناۋ پۋنكتىندە «ەل تىرەگى – 2019» رەسپۋبليكالىق اكسياسى اياسىندا 45 ساربازدى وتان الدىنداعى بورىشىن وتەۋگە سالتاناتتى تۇردە شىعارىپ سالۋ شاراسى ءوتتى. قازاقستاننىڭ قارۋلى كۇشتەرىنىڭ ساپىنا قوسىلعالى وتىرعان ساربازدار ابىرويلى دا جاۋاپتى مىندەتىن وسكەمەن قالاسىنداعى اسكەري بولىمدە اتقارماق.

اسكەرگە شاقىرىلۋشىلار قالانىڭ 8 اۋدانىنان جينالعان. ولاردىڭ ءارقايسىسى مورالدىق-ىسكەرلىك قاسيەتكە، كەمى ارنايى ورتا بىلىمگە يە.

سالتاناتتى شاراعا اۋعان سوعىسىنىڭ ارداگەرلەرى، اۋەزوۆ اۋدانىنىڭ قورعانىس ىستەرى باسقارماسىنىڭ باستىعى دەنيس ناسىروۆ، اۋەزوۆ اۋدانى اكىمشىلىگىنىڭ وكىلدەرى جانە اسكەرگە اتتانىپ بارا جاتقان ساربازداردىڭ اتا-انا، تۋعان-تۋىستارى قاتىستى.

شىعارىپ سالۋ ءراسىمىن اۋەزوۆ اۋدانىنىڭ قورعانىس ىستەرى باسقارماسىنىڭ باستىعى دەنيس ناسىروۆ اشىپ، جاس جاۋىنگەرلەرگە ساتتىلىك، قىزمەتتەرىنە اق جول تىلەدى.

– وتاندى قورعاۋ، ايبىندى ارميامىزدىڭ ساپىندا وتان الدىنداعى بورىشتى وتەۋ – ءار ەر ازامات ءۇشىن ابىرويلى ءىس. ەلىن، جەرىن قورعاۋعا اركەز ءازىر جاۋىنگەرلەردى دايىنداۋ مەملەكەتتىك ساياساتتىڭ باسىم باعىتتارىنىڭ ءبىرى ءارى بىرەگەيى. قۇرمەتتى ساربازدار! اسكەري قىزمەت سىزدەردى باتىر، وجەت، اۋىزبىرلىگى مول، بولاشاقتان زور ءۇمىت كۇتتىرەتىن ناعىز ەر ازامات، وتانىمىزدىڭ قورعانى، حالقىنىڭ قاھارمانى ەتىپ شىعاراتىنىنا سەنىمدىمىز. سىزدەرگە زور دەنساۋلىق، قاجىر-قايرات، سارقىلماس ەنتۋزيازم جانە اسقاق ماقساتتارعا جەتەلەيتىن ەرىك-جىگەر تىلەيمىن! وتانعا ادال دا ابىرويلى قىزمەت ەتىپ، ماقتانارلىقتاي ىستەرمەن كوزگە تۇسىڭدەر! وز-وزدەرىڭە ەشقانان كۇماندانباڭدار!، – دەدى باسقارما باستىعى.

وسىنداي بىرنەشە جۇرەكجاردى قۇتتىقتاۋ-لەبىزدەردەن كەيىن مەكتەپ وقۋشىلارى اسكەرگە شاقىرىلعاندارعا اۋەزوۆ اۋدانى اكىمشىلىگى تاعايىنداعان العاشقى قاجەتتى زاتتاردان جاسالعان سىيلىقتاردى تاپسىردى.

ارتىنشا، ساربازدارعا اتا-انا، جاقىن-جۇراتتارىمەن قوشتاسۋىنا رۇقسات ەتىلدى. شارا سوڭىندا كونسەرتتىك نومەرلەر قويىلدى.

وسى كۇزدە الماتى قالاسى بويىنشا 1992-2001 جىلدارى تۋعان 1500 جاستى اسكەر قاتارىنا الۋ جوسپارلانعان. ولار ق ر قارۋلى كۇشتەرى، مەملەكەتتىك كۇزەت قىزمەتى، ۇلتتىق گۆارديا، ۇقك شەكارا قىزمەتىندە قىزمەت ەتەدى.