تۇركىستان وبلىسىنىڭ اكىمى ءومىرزاق شوكەيەۆ 16 جاستاعى جىگىتتى ءۇش جىل بويى زورلاپ، اقشا بوپسالاعان پوليسيانىڭ بۇرىنعى قىزمەتكەرىنە قاتىستى قىلمىستىق ءىس تەرگەلىپ جاتقانىن ايتتى، – دەپ Qamshy.kz اقپارات اگەنتتىگى حابارلايدى.

ءوڭىر باسشىنىڭ ايتۋىنشا، قازىرگى تاڭدا قىلمىستىق ءىستى وڭىردەگى ءتارتىپ ساقشىلارى تەرگەپ جاتىر.

"بۇل ءىستى بىلەمىن. پروكۋراتۋرا، وڭىرلىك پوليسيا دەپارتامەنتى ءالى كۇنگە دەيىن جۇمىس جۇرگىزىپ جاتىر. تانىمال بلوگەرلەر ىسكە ارالاسقىسى كەلەدى. دەگەنمەن، بۇل قىلمىس. ونى ساياسيلاندىرىپ، ەلدى دۇرلىكتىرمەۋ كەرەك"، – دەدى ءو.شوكەيەۆ ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.

سونداي-اق اتالمىش ءىس زاڭ اياسىندا شەشىلەتىنىن، ونى ءاربىر باسپا ءسوز ءماسليحاتىندا كوتەرە بەرۋ دۇرىس ەمەس ەكەنىن اتاپ ءوتتى.

"قۇزىرلى ورگاندار رەتتەسىن. سوت ۇكىم شىعارادى. ەگەر ۇكىم ءادىل بولماسا، ءىستى قايتا قاراسىن. مەنىڭ ويىمشا، ءار باسپا ءسوز ءماسليحاتىندا بۇل ماسەلەنى قايتا-قايتا كوتەرۋدىڭ قاجەتى جوق"، –دەپ تۇيىندەدى ءسوزىن تۇركىستان وبلىسىنىڭ اكىمى.

ەسكە سالساق، 2019 جىلدىڭ جازىندا تۇركىستان وبلىسىنىڭ اباي اۋىلىندا 16 جاستاعى جىگىتتى ءۇش جىل بويى زورلاپ، اقشا بوپسالاعان پوليسيانىڭ بۇرىنعى قىزمەتكەرى ۇستالدى. بۇل اقپاراتتى تانىمال قازاقستاندىق ادۆوكات ايمان وماروۆا الەۋمەتتىك جەلىدە جاريالاعان ەدى. جىگىتتى زورلاعان بۇرىنعى ءتارتىپ ساقشىسى 15 جىلعا دەيىن باس بوستاندىعىنان ايىرىلۋى مۇمكىن. بۇگىنگى كۇنگە دەيىن تەرگەۋ امالدارى ءجۇرىپ جاتىر.