شىمكەنتتە تاەكۆوندودان ازيا چەمپيوناتى كەزىندە جانجال شىقتى. جارىس قارساڭىندا چەمپيونات وتكىزەتىن ورىن تابىلماي قالعان – دەپ Qamshy.kz اقپارات اگەنتتىگى حابارلايدى، "استانا" تەلەارناسىنا سىلتەمە جاساپ.

ەكى كۇن بولاتىن چەمپيوناتقا قازاقستان، وزبەكستان جانە تاجىكستاننان 400-گە جۋىق سپورتشى كەلگەن.

ITF تاەكۆوندو فەدەراسياسىنىڭ پرەزيدەنتى ايدوس امانجولوۆتىڭ ايتۋىنشا، جارىستى وتكىزۋ ءۇشىن  جەرگىلىكتى ۋنيۆەرسيتەتتىڭ زالىن جالعا الىنعان. ال كەيىن وقۋ ورنىنىڭ باسشىلىعى كەلىسىمنەن باس تارتىپتى.

ودان كەيىن ۇيىمداستىرۋشىلار سپورت مەكتەبىمەن كەلىستى. الايدا تۋرنير باستالار كەزدە قاتىسۋشىلاردىڭ ءبارى دالادا قالدى. ەشكىم سەبەبىن تۇسىندىرمەگەن.

ITF تاەكۆوندو فەدەراسياسىنىڭ پرەزيدەنتى بۇل قاساقانا جاسالعان ارەكەت ەكەنىن ايتىپ وتىر. ول بۇعان شىمكەنت جانە تۇركىستان وبلىسى سپورت بىرلەستىكتەرى اراسىنداعى باسەكەلەستىك سەبەپ بولعانىن العا تارتتى.

ال جانجالدان سوڭ چەمپيونات وتكىزەتىن ورىن تابىلدى. اتاپ ايتقاندا، جارىس جەكە وقۋ ورنىندا وتكىزىلدى. الايدا، شەتەلدىك قاتىسۋشىلار مۇنداي جايتتان كەيىن شىمكەنتكە جارىسقا كەلمەيتىنىن ايتىپ وتىر.

شىمكەنتتىڭ دەنە شىنىقتىرۋ جانە سپورت باسقارماسىندا ITF تاەكۆوندو فەدەراسياسى جارىستى زاڭسىز وتكىزدى دەپ وتىر.

"ازيا چەمپيوناتى ءبىر جىل بۇرىن جوسپارلاناتىن شارا. رەسپۋبليكالىق فەدەراسيا، سپورت كوميتەتى، مادەنيەت جانە سپورت مينيسترلىگى بىرلەسە اككرەديتاسيادان وتكىزەدى. فەدەراسيا اككرەديتاسيادان وتپەسە، مادەنيەت جانە سپورت مينيسترلىگى مويىندامادى دەگەن ءسوز. بۇل جارىستاردا وقىس وقيعا بولىپ قالسا، كىم جاۋاپ بەرەدى؟"، – دەدى باسقارما جەتەكشىسى الىبەك نۇرتاي.

وقيعادان كەيىن قازاقستاننىڭ تاەكۆوندو فەدەراسياسى پوليسياعا ارىز جازعان. ولار وزدەرىنە جەرگىلىكتى سپورت قاۋىمداستىقتارى قوقان-لوقى كورسەتىپ جاتقانىن ايتىپ وتىر.